1 Chitabu chenichi chivi na malovi gala Musa geavajovili vandu voha va ku Isilaeli lukumbi pevavili kulugangatu kwelihumila lilanga mwa mfuleni Yoludani. Vavili mulikemba la Yoludani papipi na sufu, pagati ya muji wa Palani upandi umonga wa muji wa Tofeli na Labani na Hazeloti na Dizahabu, upandi wungi. 2 Ndi lugendu lwa magono kumi na monga kuhuma ku chitumbi cha Holebu amala weukemiwa Sinai mbaka Kadeshi Balinea kwa njila yeyihamba chitumbi cha Seili. 3 Ligono la kutumbula la mwehi wa kumi na monga, mwaka wa alubaini pevamali kuhuma ku Misili, Musa avajovili bwina kila chindu chaalagizwi na Chapanga avajovela. 4 Akitili chenicho Bambu Chapanga peamali kumuhotola nkosi Sihoni wa Vaamoli mweatalalila pamuji wa Heshiboni na nkosi Ogu wa Bashani ndi mweatalalila kumuji wa Ashotaloti na Edilei. 5 Musa atumbwili kuvadandaulila vandu malagizu ga Chapanga lukumbi pevavili kumwambu ya mfuleni Yoludani kumulima wa Moabu. Akavajovela.

6 "Petavili kuchitumbi cha Sinai, Bambu Chapanga witu atijovili naha, ‘Mtamili lukumbi lutali pachitumbi ichi, hinu yikoli 7 hinu muwuka na muyendelela na lugendu. Muhamba ku mulima wa Vaamoli weuvii kuchitumbi na pandu pa milima ya papipi ku Alaba, kuhitumbi na makemba, ku upandi wa kusini na kumbwani, ena muhamba mbaka mulima wa Kanaani na mulima wa Lebanoni, mbaka kumfuleni uvaha wa Efulate. 8 Mulola nivapelili nyenye mulima uwu. Hinu muhamba mukautola mumulima wenuwo wula Bambu Chapanga wealapili kuvapela vagogo vinu Abulahamu na Isaka na Yakobo na pamonga na viveleku vyavi.’ "

9 Musa akavajovela vandu, "Petavili takona kuchitumbi cha Sinai, nene navajovili naha, ‘Lihengu la kuvalongosa nyenye ndi livaha neju, nene namwene ndu nihotola lepi. 10 Bambu Chapanga winu, avakitili mvya mwavamahele, lelu mvili mwavamahele ngati ndondo za kumahundi. 11 Bambu Chapanga wa vagogo vinu ndi avakita myonjokesa neju mala elufu kuliku chemuvii hinu na kuvamotisa ngati cheavalagizi! 12 Nambu nene namwene ndu yati nihotola wuli kugega mizigu ya mang'aiso ginu? 13 Muhagula vandu vana luhala na umanya na vandu vevitopeswa kuhuma mumakabila ginu muni nivakita vavyai vachilongosi vinu.’ 14 Nyenye mwaniyangwili naha, ‘Lijambu lewajovili ndi la bwina kwitu.’ 15 Ndi navatolili vachilongosi vinu vevana luhala na vevavii na umanya avo mwevavahagwili kuhuma mumakabila ginu nikavakita kuvya vachilongosi vinu. Navavikili vangi kuvya vakulu va misambi ya vandu elufu, ya vandu miya na ya vandu hamusini na ya vandu kumi. Nahagwili mewa vilongosi vangi mukila kabila."

16 "Palukumbi lula navalagizi vahamula vinu, ‘Muyuwanila mihalu ya valongo vinu, muhamula ngati cheyiganikiwa pagati ya Vaisilaeli kwa Vaisilaeli amala Muisilaeli na muyehe mweitama pamonga navu. 17 Mkoto kumpendelela mundu yoyoha pamuhamula, muvayuwanila changali kupendelela, vavaha na vedebe. Mkoto kumyogopa na mundu yoyoha, muni hukumu yemwiwusa yihuma kwa Chapanga. Matakilu gogoha gakavyai ginonopa neju kwinu ndi mugaletayi kwa nene, ni nene yati nihamula.’ 18 Lukumbi lulolo navajovili mambu goha gemganikiwa kuhenga."

19 "Hinu, ngati Bambu Chapanga witu cheatilagazili, tatumbwili lugendu kuhuma ku chitumbi cha Holebu, tapitili mulugangatu lila livaha leliyogofya lemuliwene, kwa kulanda njila yeyihamba mulima wa vitumbi vya Vaamoli. Petahikili Kadesh Balinea, 20 nene navajovili, ‘Hinu muhikili pamulima wa Vaamoli weuvii kuchitumbi wemwapewili na Bambu Chapanga witu. 21 Mlola, Bambu Chapanga winu avapeli mulima weuvii palongolo yinu. Hinu, muhamba mukautola ngati Bambu Chapanga wa vagogo vinu cheavajovili. Mkoto kuyogopa mewa mkoto kuvagaya!’ "

22 "Ndi mwavoha mwabwelili na mukanijovela, ‘Tivatuma vandu vatilongolela, vakaung'omesa mulima, kangi vawuya kutimanyisa njila yoki na miji yetikuyihambila ndi ya namuna yoki kwenuko.’ "

23 "Lijambu lenilo lalolikini kuvya la bwina kwa nene, nikavahagula vandu kumi na vavili, mundu mmonga mmonga kuhuma mu kila likabila. 24 Vandu venavo vahambili ku mulima wula wa vitumbi, vakahika ku likemba la Eshikoli na kukita umang'omesi. 25 Pavawuyili vatiletili matunda nunuyu gevayavili kuhuma mulima wenuwo na kutijovela kuvya mulima wenuwo weakutipela Bambu Chapanga witu ndi wabwina."

26 "Nambu nyenye mwagabelili malagizu ga Bambu Chapanga winu, mwabelili kuhamba mumulima wenuwo. 27 Mwavembeniki mumandanda ginu mukajova, ‘Bambu Chapanga ativengili ndi mana atiwusili pamulima wa Misili. Vakiti Vaamoli vatikamula muni vatikomakesa. 28 Ndava kyani tihamba kwenuko kuni tidenyiki mitima kwa wogoyu? Vatijovili kuvya vandu va kwenuko ndi majindu vavaha na vatali kuliku tete, na kuvya miji yavi ndi yivaha na luwumba lwaki luhukii kumahundi. Kangi vajovili kuvya vavaweni majindu va viveleku vya Anaki!’ "

29 "Nambu nene navajovili kuvya, ‘Mkoto kuvagaya amala kuvayogopa vandu avo.’ 30 Bambu Chapanga winu mweakuvalongolela, mwene ndi yati itovana navu ndava yinu ngati cheakitili kuni mwilola ku Misili kula, 31 mewa kulugangatu kula. Kwenuko mwalolili cheavagegili mulugendu ulo lwoha ngati dadi cheakumgega mwana waki mbaka mwahikili apa. 32 Pamonga na goha ago geakitili, nambu nyenye mwamsadiki lepi Bambu Chapanga winu, 33 ndi mweavalongolili munjila na kuvalondela pandu pa kupumulila. Kilu avalongolili kwa lihundi lelinonopa lelivi na motu na muhi kwa lihundi, muni kuvalangisa njila."

34 "Bambu Chapanga agayuwini malungamiko ginu, ayomili, akalapa ijova: 35 ‘Kawaka hati mmonga winu muchiveleku ichi chihakau mweiyingila mumulima wula wabwina wenalagizi kuvapela vagogo vinu. 36 Kalebu mwana wa Yefune, mwene ndu ndi mweiyingila mulima wenuwo, ni nene yati nikumpela mulima wenuwo weaulivatili uvya waki mwene na vaveleka vaki muni avii msadikika neju kwangu.’ 37 Bambu Chapanga aniyomili mewa nene ndava yinu akanijovela, ‘Hati veve Musa yati uyingila lepi mumulima wenuwo. 38 Nambu mtangatila waku Yoshua mwana wa Nuni, yati iyingila mwenumo. Hinu mkangamalisa mtima muni mwene yati akuvalongosa Vaisilaeli vautola mulima uvya wavi.’ "

39 "Kangi Bambu Chapanga akatijovela tete tavoha, ‘Venavo vana vinu vemujova kuvya yati vivya mateka va makoko vinu, yaani venavo vevavii vadebe neju ndi vamanyili lepi kudandaula gegavii gabwina na gahakau, venavo ndi yati viyingila kwenuko, na nene yati nikuvapela mulima wenuwo uvya wavi. 40 Nambu nyenye, mng'anamukai na kuwuya kulugangatu kwa njila yeyihambila ku nyanja ya Shamu.’ "

41 "Kangi mwaniyangwili, ‘Tete timbudili Bambu Chapanga, nambu hinu yati tihamba kutovana ngati Bambu Chapanga witu cheatilagizi.’ Hinu, kila mmonga winu akajitendekeha kutovana ngondo, muni mwaholalili kuvya ngalivii lijambu la yenywa kuuzangila mulima wenuwo wa vitumbi."

42 "Nambu Bambu Chapanga akanijovela, ‘Vajovela vandu avo vakoto kuhamba kutovana muni yati nivya lepi pamonga nau, vakoto kuhamba, muni vakahambayi makoko wavi yati vakuvahotola vene.’ 43 Hinu nene navajovili chenicho, nambu nyenye mwayuwini lepi. Pahala paki mwabelili kulanda lilagizu la Bambu Chapanga, kwa ndindani yinu mwayingili mumlima wenuwo wa vitumbi. 44 Penapo, Vaamoli vevatamayi kuchitumbi vakahelela kuvazangila ngati chezikita njuchi vakavavinga mbaka ku Seili na kuvahotola kumuji wa Holima. 45 Ndi pemwawuyili, na kumvembela Bambu Chapanga, nambu Chapanga, avayuwanili lepi amala kuvalola."

46 "Hinu vatamili lukumbi lutali ku Kadeshi ndi lukumbi lwenulo lwoha vatamili kwenuko."