1 "Mukamala kuhika na kuyingila mumulima wula wemupewa na Bambu Chapanga winu, muni uvya winu na kutama mwenumo, 2 mtola pandu pa mabenu goha ga kutumbula gemulimili pandima ya pamulima weakuvapela Bambu Chapanga winu, mugega muchidengu. Mupeleka pandu pala peapahagwili Bambu, Chapanga winu, pavya pa kumuyupila. 3 Yati ukumuhambila mteta wa Chapanga mweihengela lukumbi lwenulo na umujovela, ‘Lelu nijova palongolo ya Bambu Chapanga witu, kuvya niyingili mumulima wula Bambu Chapanga weavalagazili kwa vagogo vitu kuvya yati akutipela.’ "

4 "Mteta wa Chapanga yati akupokela chidengu chenicho mumawoko gaku na kuchivika pahi palongolo ya pandu pa kuwusila teta pa Bambu Chapanga waku, 5 penapo yati uluwula malovi aga palongolo ya Bambu Chapanga waku: ‘Dadi wangu avii Mwalami mwealyungilyungi pandi zamahele, kangi akahamba ku Misili kwenuko atamili ngati muyehe. Kwenuko ahambili na vandu vadebe ndu, nambu vakavya vandu vamahele na vevana makakala na kuvya vandu va mulima weuna makakala. 6 Nambu Vamisili vatikitili uhakau na kuting'ang'anisa tihenga mahengu geginonopa ngati vavanda. 7 Kangi tikamuvembela Bambu Chapanga wa vagogo vitu, ndi akayuwanila chivembu chitu. Akagawona mang'aiso geting'aika, na mahengu gitu geginonopa na kulaga. 8 Hinu Bambu Chapanga kwa uhotola waki na makakala atiwusili ku Misili. Akitili milangisu yamahele yihumalila. 9 Atiletili penapa na kutipela mulima uwu wabwina na weuna ludaka lwabwina kwa kulima na kwa kudima mifuya. 10 Hinu nimuletili Bambu mabenu ga kutumbula kuhuma mundima yeanipelili.’ "

"Penapo yati uvika chidengu pahi palonglo ya Bambu Chapanga, Chapanaga waku na kumufugamila. 11 Kangi veve pamonga na Valawi na vayehe voha vevavi pagati yinu yati ugasangalukila muvindu vyoh vyabwina vila Bambu Chapanga waku, gekupelili veve pamonga na vandu va nyumba yaku."

12 "Kila mwaka wa datu mwiganikiwa kila mundu mweavii kwinu awusayi lilundu limonga pagati ya malundu kumi ga mabenu ginu na kuvapela Valawi na vayehe na vakiva na valipwela muni vahotola kulya na kuyukuta pamiji yinu. 13 Kangi mjovela Bambu Chapanga waku, ‘Niwusili kuhuma munyumba yangu lilundu lamsopi, nivapeli Mulawi na muyehe na mkiva na lipwela, kulandana na malagizu gaku goha gewaniluwulili. Nileki lepi kukita chaujovili amala kukosiwa. 14 Nalili lepi lilundu limonga pagati ya malundu kumi lukumbi penavii mumalilu; Nawusili lepi kuvala ya nyumba yangu penavii mwenangayidakiliwa palongolo yaku na nawusili lepi vindu vyenivyo kwa vevafwili. Nikuyuwanili veve Bambu Chapanga wangu, na nikitili goha ngati chewanilagizi. 15 Ulola pahi kuhuma kunani pandu paku pamsopi, uvamotisa vandu vaku Vaisilaeli na mulima weutipelili ngati chewavahaidili vagogo vitu, mulima wabwina kwa kulima na kudima mifuya.’ "

16 "Lelu iyi Bambu Chapanga winu, akuvalagisa kugakamula malagizu na mihilu iyi, mukangamala kugakita kwa mtima woha na mpungu waku woha. 17 Lelu iyi myidakili Bambu kuvya ndi Chapanga winu, na kuvya yati mulanda njila zaki na kuyidakila malagizu gaki na mihilu yaki na kuyidakila lwami lwaki. 18 Na mwene Bambu lelu avayidakili kuvya nyenye ndi vandu vaki mwene ngati cheavalagizi na kuvya muganikiwa kukamula malagizu gaki goha. 19 Yati akuvakita nyenye kuvya vandu va mulima uvaha kuliku milima yoha yeawumbili. Na nyenye yati mwikita lihina laki lilumbiwa na kutopeswa. Nyenye yati mwivya vandu vaki mwene ngati chajovili."