1 "Pemuhamba kungondo kutovana na vamakoko vinu, mwakaziwona falasi na mutuka za ngondo kuhutwa na falasi na manjolinjoli vamahele kuliku nyenye, pena mkotoka kuyogopa. Muni Bambu Chapanga winu mweavawusili ku Misili, yati ivya pamonga na nyenye. 2 Kwakona mwangatumbula kutovana, mteta wa Chapanga yati ibwela kulongela na vandu va ngondo, 3 ‘Nyenye vandu va Isilaeli, muyuwanila! Lelu muhamba kutovana ngondo na vamakoko vinu. Mkotoka kuyogopa na kudenyeka mtima amala kuvagaya, 4 ndava muni Bambu Chapanga winu, mwene ndi mweihamba pamonga na nyenye na yati ikomana na vamakoko vinu ndava yinu na kuvakita nyenye muhotola.’ "

5 "Kangi vachilongosi va manjolinjoli yati vakuvajovela vandu, ‘Wu, avi mundu yoyoha apa mweajengili nyumba ya mupya angagona? Awuya kunyumba, ndava ihotola kufwilila kungondo na mundu yungi akayizindula. 6 Wu, avi mundu yoyoha apa mweana mgunda wa mizabibu angatumbula kubena mizabibu yaki? Awuya kunyumba, muni ihotola kufwila kungondo na mundu yungi akabena na kusangalukila mizabibu ya mumugunda yaki. 7 Wu, avi mgosi yoyoha apa mweahongili mdala na akona avi papipi kugega? Awuya kunyumba, muni ihotola kufwila kungondo na mundu yungi akagega mdala uyo.’ "

8 "Kangi vachilongosi vakajova na vandu, ‘Wu, avii mundu penapa mweadenyiki mtima na iyogopa? Awuya kunyumba muni akotoka kuvakita manjolinjoli vayaki vadenyeka mtima ngati mwene.’ 9 Lukumbi vachilongosi pevimala kulongela na manjolinjoli, hinu yati vivagula vakulu va manjolinjoli muni kuvalongosa."

10 "Lukumbi pemwivya papipi kuutova muji, mutumbula hoti kuvakota ngati vigana uteke. 11 Ngati vandu va muji wenuwo vakaganayi uteke na kubwela kwinu vavya vavanda vinu, hinu yati vakuvahengela kwa kuhenga mahengu geginonopa. 12 Nambu ngati vandu va muji wenuwo vaganili lepi uteke na nyenye, na vakatovana ngondo na nyenye, ndi yati mukuutindila muji wavi, 13 na mwene Bambu Chapanga, Chapanga winu, akavatangatila kuvahotola makoko vinu pamuji wenuo, penapo muvakoma kwa upanga vagosi voha vevavi mwenumo. 14 Nambu vadala na vana pamonga na ng'ombi na vyoha vyevivii mwenumo. Mwihotola kuvitola vivya vinu, na nyenye muhotola kuvihengela muni mupewi na Bambu Chapanga winu, kuhuma kwa vamakoko vinu. 15 Chenicho ndi chemukuhikitila miji yoha yeyivii patali na mulima wemukuutalalila."

16 "Nambu mumiji ya milima yeakupela Bambu Chapanga waku yivya yinu, komakesa vyoha vyevivi mumi. 17 Yati mukuvakomakesa vandu voha, Vahiti na Vaamoli na Vakanaani na Vapelizi na Vahivi na Vayebusi ngati Bambu Chapanga winu, cheavalagizi. 18 Ngati lepi yati vakuvawula kulanda mambu goha ga kuyomesa gevikita kufugamila michapanga yavi, na nyenye yati mukumubudila Bambu Chapanga winu."

19 "Mukautindilayi muji kwa lukumbi lutali, na kukomana ndava ya kuutola, mkotoka kudumula mikongo ya matunda yeyivii mwenumo kwa livagu. Wu, mikongo yeniyo ndi vandu, mbaka muidumulayi? Mwihotola kulya matunda ga mikongo yeniyo, nambu mkotoka kuyidumula. 20 Mwihotola ndu kudumula mikongo yingi yangavya ya matunda na kuyihengela kwa kutindisila muji mbaka muutolayi."