1 "Lukumbi lula Bambu akanijovela, ‘Hongola vibawu vivili vya maganga ngati vila vya kutumbula na lisanduku la mbawu, kangi ubwela kwangu kunani ya chitumbi, 2 na nene yati niyandika malovi gala geugayandiki muvibawu vila vyawadenyili, kangi vika vibawu vyenivyo mulisanduku.’ "

3 "Hinu natenganizi lisanduku kwa mkongo wa msonobali na vibawu vivili vya maganga ngati vila vya kutumbula, nikagega mumawoko, nikakwela navyu kuchitumbi. 4 Ndi Bambu akayandika muvibawu vila malovi galagala ngati gakutumbula. Mihilu kumi geavapelili gealongela kuhuma mumotu ligono lila la mumngonganu. Kangi Bambu akanipela vibawu vila. 5 Nang'anamwiki na kuhelela kuhuma kuchitumbi, na ngati Bambu Chapanga chanilagizi, navikili vibawu vyenivyo mugati ya lisanduku lenatenganizi, na vivii mugati ya lisanduku lenilo ngati Chapanga chanilagizi."

6 "Isilaeli vagendili kuhuma viliva vya vandu va Yaakani mbaka Mosela. Penapo Haluni afwili na vakamzika. Na Eleazali mwana waki ndi akavya mteta wa Chapanga pahali paki. 7 Kuhuma penapo, vagendili mbaka Gudigoda, na kuhika Yoti Batha, pandu pana vipela vyamahele vya manji. 8 Lukumbi lwenulo Bambu Chapanga ahagwili vandu va likabila la Lawi kugega Lisanduku la Lilaganu la Bambu Chapanga muni vamuhengela ngati vamteta va Chapanga na kuvamotisa vandu kwa kuhengela lihina laki ngati chevikita lelu. 9 Ndava yeniyo vandu va likabila la Lawi livii lepi na pandu pakuhala pamulima pagati ya Vaisilaeli vayavi, chevapokili ndi utopesa wa kuvya vamteta va Bambu, ngati Bambu Chapanga winu, cheavajovili."

10 "Natamili kuchitumbi mumagono alubaini, muhi na kilu, ngati pakutumbula. Bambu Chapanga, aniyuwanili mala yingi kangi na kuyidakila kuvya akuvakomakesa lepi vagogo. 11 Kangi akanijovela, ‘Wuka uyendelela na lugendu lwaku na kuvalongosa vandu muni vahotola kuyingila na kuutola mulima wenalapili kwa vagogo vinu kuvya nikuvapela.’ "

12 "Hinu nyenye Vaisilaeli, Bambu Chapanga winu igana lepi chindu chingi chochoha, nambu kumtopesa ndu Bambu Chapanga winu, kukita gala goha geigana na kumgana na kumhengela kwa mitima winu woha na mpungu winu woha, 13 na kuyikamula mihilu na malagizu ga Bambu zenivavikili lelu, muni vikutangatila muwumi waku mwavene. 14 Lola kumahundi na kunani neju kwa Chapanga ndi kwaki Bambu Chapanga winu, mulima na vyoha vevivili mugati yaki ndi vyaki. 15 Nambu Bambu Chapanga, avi na mnogo neju kwa vagogo vinu, akavagana na akavahagula nyenye viveleku vyavi muvya vandu vaki pagati ya vandu vangi voha, ngati chayivili lelu. 16 Hinu mumyidakila Bambu, mkotoka kuvya na ndindani kangi. 17 Muni Bambu Chapanga winu, ndi Chapanga wa vachapanga na Bambu wa mabambu. Mwene ndi Chapanga mkulu na mweavi na makakala, na wakuyogopwa, ipendelela lepi amala ipokela lepi swinda. 18 Mwene akuvakengelela vakiva na valipwela, akuvagana vayehe na kuvapela chakulya na nyula. 19 Hinu, mvagana vayehe muni na nyenye mewa mwavili mwavayehe ku mlima wa Misili. 20 Mumtopesa Bambu Chapanga winu, na umgundamila mwene ndu, muvya pamonga nayu kwa uchakaka na kulapa kwa lihina laki. 21 Mwene ndi mweiganikiwa kulumbiwa, ndi Chapanga winu mweavahengili mambu gavaha na ga kuyogopwa gemwagalolili kwa mihu ginu mwavene. 22 Lukumbi vagogo vinu pavahambili ku Misili, vavili vandu sabini ndu, nambu hinu Bambu Chapanga winu, avakitili mvyayi mwavamahele ngati ndondo za kunani."