1 Kangi Musa akayendelela kulongela na Vaisilaeli, 2 akavajovela, "Hinu nivii na miyaka miya yimonga na ishilini na nihotola lepi kuvalongosa nyenye neju, Bambu Chapanga anijovi yati nikupuka lepi mfuleni Yoludani. 3 Bambu Chapanga winu yati akuvalongolela na kuvakomakesa vandu vevitama kwenuko, muni muhitalalila mulima wavi, na Yoshua ndi mweakuvalongosai ngati cheajovii Bambu Chapanga. 4 Bambu Chapanga, yati akuvakomakesa venavo ngati cheavakomakisi Sihoni na Ogu, vala vankosi va Vaamoli pamonga na mulima wavi. 5 Bambu Chapanga, yati akuvahotosa muvahotola, na nyenye muganikiwa muvakitila ngati chenivalagizi. 6 Muvyayi vakangamala na ukekesi, katu mkotoka kuvayogopa amala kuyogofya nawu, muni Bambu Chapanga winu ndi mweihamba pamonga na nyenye. Chakaka yati ileka lepi kuvatangatila amala kuvataga."

7 Penapo Musa akamkemela Yoshua, akamujovela palongolo ya vandu voha va Isilaeli, "Uvya ngangali na ukotoka kuyogopa, muni veve yati ukuvalongosa vandu ava kuhamba kuutola mulima uvya wavi wula Bambu Chapanga avalagazili vagogo vavi na veve yati ukuvapela uvya wavi. 8 Muni Bambu Chapanga mwene ndi yati akuvalongosa mwene yati ivya pamonga nawu, katu yati akuvaleka lepi. Ndava yeniyo ndi mkotoka kuyogopa amala kuvya yutiyuti."

9 Penapo Musa akayandika malagizu genago na akavapela vamteta va Chapanga va lukolo lwa Lawi lihengu lavi kugega Lisanduku la Lilaganu la Bambu Chapanga, pamonga na vagogo voha va Isilaeli. 10 Kangi Musa akavalagiza akajova, "Kila mwishu wa mwaka wa saba yati yivya ndi lukumbi lwa kulekekesa madeni, lukumbi lwa Mselebuko wa Vindanda, vya mwaka wenuwo. 11 Malagizu aga yati mukuvasomela Vaisilaeli lukumbi pevibwela pandu pa kumuyupila Bambu Chapanga pala peapahagwili. 12 Muvakemala vandu: Vagosi voha na vadala na vana pamonga na vayehe vevitama mumiji yinu, muni voha vayuwanila malovi aga ga kujiwula kumtopesa Bambu Chapanga winu, na kuyidakila kwa usadikika ngati chegigana malagizu aga. 13 Ngati mwikita ago, viveleku vyavi vangayuwana malagizu ga Bambu Chapanga winu, vahotola kuyiyuwana. Na kujiwula kumyidakila lukumbi lwoha lwemwitama pamulima wemuhamba kuutola uvya winu kumwambu ya mfuleni Yoludani."

14 Kangi Bambu Chapanga akamjovela Musa, "Hinu ligono laku la kufwa lihegalili. Mkemela Yoshua, na ubwela naku mbaka palindanda lamsopi muni nimupela malagizu." Musa na Yoshua vakahamba mulindanda lamsopi, 15 na Bambu Chapanga akavahumalila mwenumo mulipanda la lihundi lelayimili panani ya mulyangu wa kuyingilila mulindanda lamsopi.

16 Bambu Chapanga akamujovela Musa, "Lukumbi lwaku lwa kufwa luhegalili, na ukamala kufwa vandu yati vitumbula kunileka na kuyihambila michapanga yingi ya mulima wenuwo wevihamba kutama. Yati vakunileka na yati videnya lilaganu lenilagini navu. 17 Ligono lenilo yati nikuvayomela venavo na kuvaleka, na yati nikuvatangatila lepi, na venavo yati vikomakeswa. Ng'ani zamahele na mang'aiso yati gakuvakolela mbaka vamanya kuvya gahakahu genago gavakolili ndava muni Chapanga avi lepi pamonga nawu. 18 Chakaka yati nikuvatangatila lepi kavili, muni vakitili mambu gahakahu na vayigundamili michapanga yingi."

19 "Hinu uyandika lunyimbu ulu na uvawula Vaisilaeli na vauyimbayi, muni uvya usaidi wangu wenijova kwavi. 20 Penimala kuvayingisa mumulima weuvi bwina kwa kulima na kudimila mifuya, ngati chenavahaidili vagogo vavi. Na mambu gavi gavahambila bwina na kukulupala, yati vakuing'anamukila michapanga yingi na kuyifugamila. Na vene yati vakunivevesa na kubela kukita lilaganu langu. 21 Lukumbi pezikuvabwelela matovilu na ng'ani, lunyimbu ulu yati luyendelela kuyibwa na kuvya usaidi kwavi, pamonga na viveleku vyavi. Nimanyili chevigana kukita hati kwakona vangayingila mumulima wenavalapakisi kuvapela."

22 Ndi Musa akayandika lunyumbu lula ligono lilalila na akavawula Vaisilaeli.

23 Kangi Bambu Chapanga akamulagiza Yoshua mwana wa Nuni akamjovela, "Uvya mkangamala na mkekesi, muni yati ukuvalongosa Vaisilaeli kuhamba kumulima wenavalapakisi kuvapela, na nene yati nivya pamonga na veve."

24 Musa peamali kuyandika malagizu genago muchitabu tangiya kutumbula mbaka pa mwishu, 25 akavajovela Valawi vevii na lihengu la kugega Lisanduku la Lilaganu la Bambu Chapanga, 26 "Muchitola chitabu ichi cha malagizu, muchivika pamuhana ya Lisanduku la Lilaganu la Bambu Chapanga winu, muni chivya usaidi wa kuvavala nyenye. 27 Muni nivamanyili chemung'anamuka na chemuvi na ndindani. Yikavya mumubudili Bambu Chapanga kwakona nene kufwa, yati yivya wuli nikamala kufwa? 28 Muniletela palongolo yangu vagogo voha va makabila ginu pamonga na vachilongosi vinu muni penijova malovi aga vayuwana kwa makutu gavi, kunani na pamulima zivya vasaidi kuvavala vene. 29 Muni nimanyili kuvya nikamala kufwa chakaka nyenye yati mwivya mwavahakahu na mukuyileka njila yila yenavawulili muyilanda. Na magono gegibwela yati mubwelewa na gahakahu muni mukita gangaganikiwa palongolo ya Bambu Chapanga na mukumuyomesa kwa matendu ginu."

30 Kangi Musa akagasoma malovi ga lunyimbu ulu palongolo ya mkonganiku la Vaisilaeli voha viyuwana.