1 "Ngati ukayiwonayi ng'ombi amala limbelele la mlongo waku Muisilaeli liyagili kotoka kulileka liyaga, likamula ulipeleka kwa mlongo waku. 2 Nambu ngati kunyumba kwa mkolo chinyama chenicho kutali amala ummanyili lepi mkolo chinyama chenicho, hinu ukuchitola chinyama chenicho chitama kwaku mbaka paibwela mwene, ndi na veve umuwuyisilayi. 3 Kita chenicho kuvala punda amala nyula amala chochoha cheayagisi Muisilaeli myaku waku katu kotoka kuleka kumtangatila."

4 "Ukakolelayi chinyama cha Muisilaeli myaku chigwili panjila, lipunda amala ng'ombi kotoka kuleka kutangatila mlongo mwenuyo. Chitangatila kuyimamisa."

5 "Vadala vakotoka kuwala nyula za chigosi, na vagosi mewa vakotoka kuwala nyula za chidala. Muni Bambu Chapanga winu, akumuyomela mundu mweikita chenicho."

6 "Ukakolelayi chisakanilu kudasi, chivii kunani ya chikongo amala pahi china makang'a amala mawela na nyina ayuvatili mawela amala makang'a, kotoka kutola nyina pamonga na mawela gaki. 7 Uhotola kutola mawela nambu nyina mleka ahamba, ukakita chenicho yati umotiswa neju na kutama lukumbi lutali."

8 "Peujenga nyumba, jenga luwumba mumihana ya chituvilu, muni ukutoka kuwonekana ubudili ngati mundu akagwayi kuhuma kunani na kufwa."

9 "Kotoka kupanda mgunda umonga mizabibu pamonga na mimea yingi, wakakita chenicho mabenu goha yati givya gangaganikiwa, lepi gala gaupandili ndu nambu mewa na matunda ga mizabibu yati givya gangaganikiwa palongolo ya Chapanga."

10 "Kotoka kulima mugunda waku kwa kuhengela ng'ombi na lipunda vevakungiwi lingolingoli limonga."

11 "Kotoka kuwala nyula yeyilukiwi kwa nyuzi zezitenganizwi kwa mangoma ga limbelele pamonga na chitambala chamsopi."

12 "Kunga mahundu mu kona zoha mcheche za nyula yeuwala."

13 "Mugosi akagegayi mdala na amali kugona nayu na mwanakandahi akagana kumleka, 14 na kumtakila akitili mambu ga soni na nakujova kuvya mwene peamugegili akolili lepi uchakaka wa kumulangisa kuvya angagonekana na mundu."

15 "Ngati yikahumilayi chenicho dadi na nyina va mdala mwenuyo yati vibwela palimlyangu wa muji kuleta uchakaka wa kulangisa kuvya msikana avii akona angagonekana na mgosi yungi. 16 Hinu, dadi wa msikana yati akuvajovela vagogo, ‘Namgegisi msikana witu mgosi uyu nambu hinu amuganili lepi kavili. 17 Hinu akumutakila msikana, ijova kuvya amukolili lepi na ulangisu wa kulangisa kuvya amali kugonekana na vagosi vangi. Nambu niletili uchakaka wa msikana witu kulangisa kuvya avii akona angagonekana na yungi ndi uwu. Ndi dadi waki yati ilangisa nyula yaki kwa vagogo va muji!’ 18 Penapo vagogo va muji yati vakumutola mgosi mwenuyo na kumutova ndonga. 19 Yati vakumulipisa mgosi mwenuyo hipandi miya yimonga ya madini ga feza na kuvapela dadi wa msikana mwenuyo ndava mgosi mwenuyo amvevisi msikana wa Isilaeli. Na mdala mwenuyo yati iyendelela kuvya mdala waki na yati ihotola lepi kumuleka muwumi waki woha."

20 "Nambu ngati geajovili mgosi mwenuyo ndi gachakaka na kuvii lepi na uchakaka wa kulangisa msikana agonili lepi na mgosi yungi kwakona, 21 msikana mwenuyo yati ipelekwa pamulyangu wa dadi waki na vagosi voha va muji waki yati vakumutova maganga mbaka afwayi. Muni akitili lijambu la soni pa Isilaeli kwa kukita ukemi munyumba ya dadi waki kwakona angagegewa. Chenicho ndi chemugunisa uhakahu pagati yinu."

22 "Mukavakamula ugoni mgosi na mdala wa mundu yungi, penapo voha vavili yiganikiwa vakomewayi. Chenicho ndi chemugunisa uhakahu pagati yinu."

23 "Ngati mgosi akamkolela msikana mweachumbiwi kubomani na akagonekana nayu, 24 yati mukuvahumisa voha vavili pavala ya mulyangu wa muji na muvatova maganga mbaka vafwayi. Msikana mwenuyo iganikiwa akomiwayi ndava hati ngati avii kubomani muni abelili lepi kwa kuyupa vandu vamtangatilayi, na mgosi iganikiwa akomiwayi muni amuhakisi msikana mwachumbiwi na muyaki. Chenicho ndi chemugunisa uhakahu uwu pagati yinu."

25 "Nambu ngati amkolili msikana mwachumbiwi kumugunda, akamkamula na akagonekana naku kwa makakala, ndi iganikiwa akomiwayi mgosi ndu. 26 Msikana mwenuyo mkotoka kumukitila chindu chochoha, mwenuyu akiti lepi uhakahu wa kuganikiwa kukomiwa. Muni lijambu lenili liwanangana na mundu mweamkomili muyaki chakugana, 27 muni mgosi mwenuyo amkamwili msikana mwenuyo kumigunda, na pamonga mdala mwenuyo akwesili lwami nambu ahumalili lepi mundu wa kumsangula."

28 "Ngati vamkoli mgosi akonganeka na msikana mwangahongewa, akamkamkamula na kugona nayu kwa makakala, 29 mgosi mwenuyo iganikiwa amulipayi dadi wa msikana mwenuyo hipandi hamusini ya madini ga feza na iganikiwa amugegayi mdala mwenuyo muni amukitili uhakahu, katu ihotola lepi kumuleka muwumi waki woha."

30 "Katu mgosi yeyoha iganikiwa lepi kugona na mdala wa dadi waki muni yati akumvevesa dadi waki."