1 "Ngati mgosi agegili mdala na peatamili naku akawona kwaki chindu changaganikiwa, na mgosi mwenuyo akamuyandikila balua ya kumuleka akamupela na kumuvinga awuka munyumba yaki, kangi mdala mwenuyo akawuka, 2 na mwanakandahi akawuka kunyumba yaki na ngati igegewa na mgosi yungi, 3 ngati mgosi mwenuyo wa pili akamtola, akamyandikila balua ya kumleka, akampela na kumvinga kunyumba yaki, amala ngati mgosi mwenuyo akafwayi, 4 penapo, mgosi wa kutumbula yula ihotola lepi kumugega kavili na kuvya mdala waki, muni amali kuhakaswa. Ngati akamugegayi chenicho yati akumyomesa Bambu Chapanga."

5 "Mgosi mweagegili lukumbi lwa papipi iganikiwa lepi kuhamba kungondo, amala iganikiwa lepi kupewa lihengu lingi loloha, yati ilekwa mulukumbi lwa mwaka umonga muni atama kunyumba na kusangaluka na mdala waki."

6 "Mundu yoyoha akotoka kutola liganga la pahi amala la panani la kuyagila ndava ya chindu cheakumudayi, muni akakitayi chenicho ndi yati utola vindu vyavi vya kutendelekeha chakulya cha kuvakita vavya mumi."

7 "Mundu yoyoha akamuyivilayi Muisilaeli muyaki na kumkita avya muvanda waki amala kumugulisa kuuvanda, muhiji mwenuyo iganikiwa akomiwayi. Ndi chemwigunisa uhakahu wenuwu pagati yinu."

8 "Ngati mundu mmonga pagati yinu umukoli avi na utamu wa mabudi yikuvagana mujiyangalila neju mulanda malagizu genavalagizi vamteta ndi Valawi. Mganikiwa kulanda kwa uchakaka gala genavalagizi. 9 Mukumbuka chila Bambu Chapanga winu cheamukitili Miliamu pemwahumayi ku Misili."

10 "Ukamukopesayi mundu wa papipi yaku chindu chochoha kotoka kuyingila munyumba yaki kutola chindu chochoha kuvya poni. 11 Uyima kuvala na umlekayi akuletela mwene poni. 12 Ngati mundu mwenuyo ndi mngangu, kutoka kutama na shuka yaki mbaka kilu yoha. 13 Yiganikiwa umuwuyisila magono goha pelitipama lilanga muni ahotola kujigubika na kukuyupila mota. Kukita chenicho yati liwonekana kuvya lijambu leliyidakiliwa palongolo ya Bambu Chapanga waku."

14 "Kotoka kuleka kumlipa mngangu mweakuhengela lihengu, akavya Muisilaeli amala mumonga wa vayehe vevitama mumiji yinu. 15 Umlipa kwa lihengu laki leahengili ligono lenilo magono goha kwakona kutipama lilanga, muni mwene mungangu na ihuvalila malipu genago mu wumi waki, ukabela kukita chenicho, ihotola kumuvembela Bambu Chapanga, ndava yaku na veve yati ulolekana kuvya mbudanu."

16 "Vadadi vakotoka kukomiwa ndava ya kubuda kwa vana vavi, na vana vakotoka kukomiwa ndava ya kubuda kwa vadadi vavi. Kila mundu yati ikomiwa ndava ya kubuda kwaki mwene."

17 "Kotoka kukita mambu gangaganikiwa mukuhamula mhalu wa myehe amala wa mkiva, amala mkotoka kutola nyula ya lipwela kuvika poni. 18 Mukumbukayi nyenye mewa mwavii mwavavanda kumulima wa Misili, na Bambu Chapanga winu, avagobwili kwenuko, ndi mana na nene nikuvalagisa mukita chenichi."

19 "Pemubena mabenu mumigunda hinu na mukakosiwa mabenu gangi mwenumo, mkotoka kuwuya kugatola, nambu yiganikiwa muvalekela vayehe na vakiva na valipwela, muni Bambu Chapanga winu avamotisa mukila chemwihenga. 20 Pemwiyava matunda ga mizeituni yinu mkotoka kuwuya kubena kavili zezisigalili, muvalekela vayehe na vakiva na valipwela. 21 Pemuyava zabibu mumigunda yinu mkotoka kuwuya kuyava kavili zezisigalili, uganikiwa muvalekela vayehe na vakiva na valipwela. 22 Mukumbuka kuvya na nyenye mwavili mwavavanda ku mulima wa Misili, ndi mana nikuvapeli muhilu uwu."