1 "Muyuwanila nyenye Vaisilaeli! Lelu iyi muvi papipi kukupuka mfuleni Yoludani, kuhamba kuutola uvya winu ndima ya vandu va milima yivaha na yina makakala kuliku nyenye. Miji yavi yivaha na yina luwumba lweluhika kumahundi. 2 Vandu vene ndi vatali na vana makakala, vene ndi chiveleku cha Vaanaki ngati chamwayuwini na ngati vandu chavijova kuvavala, ‘Yani mweihotola kutovana?’ 3 Hinu mmanya kuvya mwakuvalongolela ngati motu weutinyisa mikongo ndi Bambu Chapanga winu. Mwene yati akuvatova na kuvahotola palongolo yinu. Nyenye yati mukuvavinga na kuvakomakesa ngati cheavahaidili Bambu Chapanga."

4 "Bambu Chapanga winu peimala kuvavinga palongolo yinu mkotoka kujova mumtima mwinu kuvya, ‘Bambu atileti tiutalalila mulima uwu. Ndava tete tavandu vetikumganisa Chapanga,’ Nambu Chapanga avavingili vandu ava palongolo yinu ndava vene ndi vahakau. 5 Muhotola kuutalalila mulima wavi, lepi ndava ya kuvya nyenye ndi muvi na mitima yabwina amala mwavandu mwemkumganisa Chapanga, nambu Bambu Chapanga winu akuvavinga vandu ava palongolo yinu ndava muni vahakau na igana kutimilisa chilapu cheavalapili vagogo vinu, Abulahamu na Isaka na Yakobo 6 Hinu mumanya kuvya Bambu Chapanga winu, akuvapela mulima uwu wabwina uvya winu, lepi ndava kuvya muganikiwa neju kuutalalila, lepi muni nyenye ndi vandu vana ndindani."

7 "Ndava muni tangiya ligono lila pemwahumili ku Misili mwakona mukumbela Bambu Chapanga. 8 Hati kuchitumbi cha Sinai, mwamuyomisi Bambu Chapanga na mwene ayomili neju mbaka akagana kuvakomkesa. 9 Penakwelili kuchitumbi kupokela vibawu vivili vya maganga vyeviyandikwi lilaganu ndi Bambu leakitili na nyenye, natamili kwenuko magono alubaini kilu na muhi, nalili lepi amala kunywa chochoha. 10 Kangi Bambu anipelili vibawu vivili vya maganga vyeviyandikwi kwa lungonjo lwaki, vyayandindikwi mihilu yoha yila Bambu Chapanga, avajovili kuchitumbi kuhuma mumotu ligono la mngonganu. 11 Pagapitili magono ago alubaini, muhi na kilu Bambu Chapanga, anipelili vibawu vivili vya maganga vyevyayandikwi lilaganu."

12 "Hinu Bambu Chapanga, anijovili, ‘Wuka uhuluka pahi ya chitumbi kanyata muni vandu vaku vewavawusili ku Misili vakiti gangaganikiwa. Vayilekili kanyata njila yanavalagizi valanda na vajitengenizili chimong'omong'o kwa lufumbu.’ "

13 "Mewawa, Bambu Chapanga, anijovili, ‘Nivaweni vandu ava, ndi vandu vana ndindani neju. 14 Nileka nivakomakesa, na kuvawusa vakoto kumanyikana pamulima woha na nene yati nikukita kuvya mulima una makakala na uvaha kuliku vene.’ "

15 "Ndi nang'amwiki, nikahuluka kuhuma kuchitumbi, kuni nigegili vibawu vivili vya maganga vyeviyandikwi Lilaganu, na chitumbi chayaka motu. 16 Nikalolokesa nikawona kuvya mmali kumbudila Bambu Chapanga winu, mwamali kutengeneza chimong'omong'o cha zahabu cha mpapakasi kwa lufumbu, kanyata mwalekili kukita gala gemwalagizwi na Bambu Chapanga, kukita. 17 Hinu nakamwili vibawu vivili vila nikavitaga pahi, nikavidenya palongolo yinu. 18 Kangi nagonili chakukupama palongolo ya Bambu Chapanga, ngati pakutumbula kwa magono alubaini kilu na muhi, nalili lepi chakulya amala kunywa manji ndava ya kubuda kwemwakitili uhakau palongolo ya Bambu Chapanga na kumuyomesa. 19 Nayogwipi ligoga likali la Bambu Chapanga kuvya yati akuvakomakesa, nambu Bambu aniyuwanili kangi lukumbi lwenulo. 20 Mewawa, Bambu Chapanga, amyomalili neju Aloni, na kugana kumkomakesa, nambu mewa nikamyupila lukumbi lulolo. 21 Kangi natolili chindu chihakau chila yaani mpapakasi wa zahabu mwatenganizi, nikayocha pamotu na kuchitimbatimba na kuyaga na kuvya lububu nyililili, kangi nikataga mukapela kekihelela pahi ya chitumbi."

22 "Mewa mwamyomisi Bambu Chapanga winu, kwenuko ku Tabela na Masa na Kiboliti na Hataava. 23 Lukumbi Bambu pavatumili kuhuma Kadeshi Balinea, akajova, ‘Muhamba mkatola mulima wula uvya winu wenivapelili’ Nambu mwambelili kukita cheavajovili mewa mwamusadiki lepi geavajovili. 24 Nyenye mwamung'anamukili Bambu kuhumila ligono lenavamanyili."

25 "Hinu najitagili pahi palongolo ya Bambu chakukupama, magono ago alubaini, kilu na muhi muni Bambu ajovili yati akuvakomakesa. 26 Namyupili Bambu Chapanga, nikajova, ‘Pepayi Bambu, kotoka kuvakomakesa vandu vaku na vahali vaku, vandu vewavagombwili na kuvawusa kuhuma mulima wa Misili kwa uhotola na makakala gaku gavaha. 27 Vakumbuka vatumisi vaku, Abulahamu na Isaka na Yakobo, kotoka kulola ndindani na uhakau na kubuda kwa vandu ava. 28 Vandu va kula ku Misili kwewatiwusili pangi yati vijova, Bambu Chapanga, avawusili muni avakoma kulugangatu muni wahotwili lepi kuvayingisa mumlima wevahadili kuvya akuvapela na ndava avavengili. 29 Muni venava ndi vandu vaku mwene, vandu vewavawusili kuhuma ku Misili kwa makakala na uhotola waku ukulu.’ "