1 "Musa akayendelela kujova, aga ndi malagizu na mihilu yemuganikiwa kulanda mumlima yila Bambu Chapanga wa vagogo vinu, avapelili uvya wavi, mulukumbi lwoha lwemutama pamulima. 2 Muhalabisa njwe pandu poha ndi vandu pevifugamila michapanga yavi muvitumbi hitali na vidunda na pahi ya mikongo yeyina mambanda ga chimuwili. 3 Mudenyela kutali pandu zavi pa kuwusila teta na mugabomola maganga gavi gevigundamila, muyocha motu nguzo za chapanga mweikeiwa chidala wa Ashela na kudumula vimong'omong'o vyavi vya kuhongola na kugawusila kutali mahina gavi pandu mwenumo."

4 "Mkotoka kumfugamila Bambu Chapanga winu, ngati chavigundamila vene. 5 Nambu yati mwihamba pahala ndi Bambu Chapanga winu, peihagula mumakabila goha muni kulivika lihina laki na matamilu gaki penapo, kwenuko ndi kwemwihamba. 6 Kwenuko yati mwipeleka teta zinu za kutinyisa njwee na zabihu na teta na lilundu limonga pagati ya kumi na teta zingi zoha na teta za chilapu na teta za kuwusa kwa kugana kwinu, na teta ya uvelekwa wa utumbula wa ng'ombi na mambelele ginu. 7 Kwenuko yati mwilya palongolo ya Bambu Chapanga winu, na yati mwivya na luheku nyenye pamonga na vandu va munyumba yinu vindu vyabwina vyamahele vyemupewili na Bambu Chapanga winu, pemwamali kuhengea lihengu."

8 "Mkotoka kukita ngati chatikita lelu apa, kila mundu ikita ngati cheigana, 9 muni mwakona mwangayingila pandu pakupumulila na muuhali weakuvapela Bambu Chapanga winu. 10 Nambu yati mukupuka mfuleni Yoludani na kuhamba kutama pamulima wula Bambu Chapanga winu, weakuvapela kuvya yinu, mwene yati akuvapela pumulilo kwa makoko vinu vevakuvatindila voha kwenuko yati mtama bwina, 11 hinu pandu penapo ndi Bambu Chapanga winu, peihagula muni lihina laki litama, penapo ndi pemwipeleka vindu vyoha vyanavalagizi: Luteta lwinu lwa kutinyisa na luteta lungi na lilundu limonga pagati ya kumi na mawusilu ginu na teta za chilapu zemuhadili kumuwusila Bambu. 12 Kwenuko yati mwiheka palongolo yaki Bambu Chapanga winu, nyenye pamonga na vana vinu vagosi na vadala, vatumisi vinu vagosi na vadala na Valawi vevitama pamiji yinu, muni vene vavi lepi na ndima yavi. 13 Mujiyangalila mkotoka kuwusa teta za kutinyisa lwinu pahala popoha pemukupawona, 14 nambu pandu peakupahagula Bambu pagati ya limonga ya makabila ginu. Penapo ndi pamuwusa teta zinu za kutinyisa, na ndi pamkitila mambu goha genilagizi."

15 "Nambu muhotola kuhinja na kulya hinyama yinu pandu popoha pemwitama chemugana, muni ndi mota zempewili na Bambu Chapanga winu. Vandu voha vevanyambasiki na vangayambasika vihotola kulya nyama zenizo, ngati chamwilya nyama ya funo amala swala. 16 Nambu mkotoka kulya ngasi ya hinyama yeniyo, muyita pahi ngati manji. 17 Mwiganikiwa lepi kulya pamiji yinu, lilundu limonga pagati ya malundu kumi pagati ya vyakulya vinu amala divayi yamupya na ya mahuta amala uvelekwa winu wa kutumbula wa misambi ya ng'ombi na misambi yinu ya mene na mambelele, amala chochoa chemuvikii chilapu chemwiwusa, amala teta zaku za kuwusa kwa kugana, amala teta zaku maalumu. 18 Yati mwilya vindu vyenivyo palongolo ya Bambu Chapanga winu, pandu peihagula Bambu Chapanga winu. Yati mwilya nyenye pamonga na vana vinu vagosi na vadala, vatumisi vinu vagosi na vadala na Valawi vevitama pamiji yinu. 19 Mewa mkangamala, kuvya yati mkuvakosiwa lepi Valawi mulukumbi lyoha lwemwivya pamulima winu."

20 "Bambu Chapanga, Chapanga winu, peakuupanula mulima winu, ngati cheavahaidili na nyenye yati mwijova, ‘Yati tinogela kulya nyama,’ Ndava mwinogela kulya nyama, penapo mwihotola kulya nyama chila chemwigana. 21 Hinu pandu peakupahagula Bambu Chapanga winu, avika liina laki avi kutali neju, penapo mwihotola kuhinja ng'ombi amala limbelele loloha lila leavapelili Chapanga, ngati cheavalagazili, na mwihotola kulya nyama chila chemwigana, ngati chemuvii mumiji yinu. 22 Yati mwilya nyama yeniyo ngati chemwilya huluku amala swala, mundu yoyoha ihotola kulya, mweanyambasiki amala mweanganyasika. 23 Nambu mkotoka kulya ngasi muni ngasi ndi wumi, hinu mkotoka kulya wumi pamonga na nyama. 24 Mkotoka kulya ngasi yeniyo, nambu muyiyita pahi ngati manji. 25 Ngati mwilya lepi ngasi, nyenye pamonga na viveleku vinu, vindu vyoha vyamuhenga yati vivya bwina, muni yati mwivya mukiti lijambu labwina palongolo ya Bambu. 26 Vindu vyevibaguliwi ndava ya Bambu yati mwiwusa na teta zinu za chilapu, yati mtola na kupeleka pandu pala Bambu peakupahagula. 27 Muleta teta ya kutinyiswa panani ya pandu pa kuwusila teta pa Bambu Chapanga winu, vyoha nyama na ngasi. Ngasi yiganikiwa yiyitiwa pamuhana ya pandu pa kuwusila teta za Bambu Chapanga winu, nambu nyama mwiholotola kulya. 28 Muvya vasadikika kuyidakila malovi aga genivalagizi, muni mambu ginu gahamba bwina pamonga na viveleku vinu magono goha gangali mwishu, muni yati mwikita lijambu la bwina na chakaka palongolo ya Bambu Chapanga winu."

29 "Bambu Chapanga winu, pehimala kuvayongomesa vandu milima palongolo yinu, nambu pemukuvavinga na kutama pamulima wavi, 30 mujiyangalila mkotoka kujiyingiswa mumtegu kwa kugalanda gala gegamali kuyongomeswa palongolo yinu. Mkotoka kukotekesa mambu ga kuyivala michapanga yavi, mkajova, ‘Vandu va milima iyi vayigundamila wuli michapanga yavi? Muni na tete tihotola kugundamila chichocho.’ 31 Katu mkotoka kumfugamila Bambu Chapanga winu, kwa njila zavi, ndava mukuyifugamila michapanga yavi, vakitili mambu gamahele ga kuyomesa, vahikili hati kuvawusa kafala vana vavi vagosi na vadala ndava ya kutambikila michapanga yavi."

32 "Mvya vasadikika kuvya mwikita kila chindu chenivalagizi, mkotoka kuyongesa chindu amala kupunguza chindu."