29 Yesu akayangula, "Chakaka nikuvajovela, mundu yeyoha mweailekili nyumba amala valongo amala valumbu amala mau amala dadi amala vana na migunda ndava yangu na ndava ya Linenu la Bwina, 30 yati ipokela mala miya ng’onyo mulukumbi lwa hinu. Yati ipokela nyumba na valongo na vahaja na valumbu na mau, pamonga na mang’ahiso. Na palukumbi lwelubwela yati ipokela wumi wa magono goha wangali mwishu.