1 Lukumbi lwenulo, Amlafeli avili nkosi wa ku Shinali na Alioko avili nkosi wa ku Elasali na Kedolaoma avili nkosi wa ku Elamu na Tidali avili nkosi wa ku Goiimu, 2 vakahamba kukomana ngondo na Bela nkosi wa ku Sodoma na Bilisha nkosi wa ku Gomola na Shinabu nkosi wa ku Adima na Shemebeli nkosi wa ku Seboimu, pamonga na nkosi wa ku Bela mewawa pakemiwi Soali. 3 Vankosi mhanu venavo ndi vakawunganisa manjolinjoli gavi kulibondi la Sidimu, ndi hinu pekemiwa Nyanja ya mwinyu. 4 Vamuhengili nkosi Kedolaoma mulukumbi lwa miyaka kumi na yivili, na mwaka wa kumi na yidatu ndi vakambela. 5 Mumwaka wa kumi na mcheche, nkosi Kedolaoma na vankosi vayaki veawungini nawu vahambili kutovana na kuvahotola Valefai ku Ashitaloti Kanaimu na Vazuzi va ku Hamu, na Vaemi va ku Shawe Kiliataimu, 6 na Vaholi ku mulima weuvi na hitumbi ya Seili, vakavavinga mbaka Elipalani mumbaka wa lugangatu. 7 Kangi vakawuya mumbele vakahamba ku Enimishipati mewa yikemiwa Kadeshi, vakatova vandu va mulima woha wa Vaamaleki, na kuvahotola Vaamoli vevatamili ku Hasasoni Tamali.

8 Ndi nkosi wa ku Sodoma na nkosi wa ku Gomola na nkosi wa ku Adima na nkosi wa ku Seboimu na nkosi wa ku Bela mewa yakemiwi Soali, vakakonganesa manjolinjoli gavi kuhamba kungondo kulikemba la Sidimu, 9 ndava ya kukomana na Kedolaoma nkosi wa ku Elamu na Tidali nkosi wa ku Goimu na Amlafeli nkosi wa ku Shinali, na Alioko nkosi wa ku Elasali, ndi vankosi mcheche vatovini na vankosi mhanu. 10 Likemba la Sidimu lamemili malindi ga lami. Hinu vankosi va ku Sodoma na ku Gomola pevatilayi ngondo, ndi vakadumbukila mwenumo, nambu vangi vakajumbalila kuhitumbi. 11 Vankosi mcheche vala, ndi vakatola vindu vya ku Sodoma, na vya ku Gomola, pamonga na vyakulya vyavi vyoha kangi vakawuya navyu. 12 Vakamutola na Lutu, mwana wa mulongo waki Abulahamu mweatamayi ku Sodoma pamonga na vindu vyaki vyoha vyeavili navyu.

13 Mundu mmonga mweavalemili, akahamba kumjovela Abulahamu mweavii Muebulania mweatamayi papipi na mikongo yivaha ya Mamle. Mamle avii mlongo waki Eshikoli na Aneli. Voha venavo vavikii lilaganu na Abulahamu. 14 Abulahamu peayuwini kuvya Lutu atoliwi kungondo, akawuka pamonga na vandu vaki vevimanya kutovana ngondo miya yidatu na kumi na nane vevavelikwi munyumba yaki, akavalanda vamakoko venavo mbaka ku Dani. 15 Lukumbi lwa kilu Abulahamu akagava manjolinjoli vaki mu misambi, kilu akavazangila vamakoko vaki na kuvavinga mbaka ku Hoba, upandi wa kasikazini wa Damesiko. 16 Hinu Abulahamu akasangula vindu vyoha vyevyatoliwi na vamakoko akamusangula na Lutu pamonga na vindu vyaki na vadala na vandu vangi.

17 Abulahamu peamalili kumuhotola nkosi Kedolaoma na vayaki, ndi nkosi wa ku Sodoma akahamba kumpokela chisangaluka kuligemba la Shawe, mewa lakemiwi likemba la nkosi. 18 Mewa Melikisedeki nkosi waku Salemu, mweavii mteta wa Chapanga mkulu, akaleta libumunda na divayi. 19 Akammotisa Abulahamu kuni ijova, "Abulahamu umotisiwa na Chapanga Mkulu, mweawumbi kunani na mulima! 20 Alumbiwayi Chapanga Mkulu, mweakukitili uvahotola vamakoko vaku!" Ndi Abulahamu akampela Melikisedeki lilundu la kumi la vindu vyoha vyeavili navyu.

21 Nkosi wa ku Sodoma akamjovela Abulahamu, "Nipela vandu vangu avo, nambu vindu vyoha utola wamwene."

22 Nambu Abulahamu akamyangula nkosi wa ku Sodoma, "Nilapa kwa Bambu, Chapanga Mkulu, mweawumbili kunani na mulima, 23 kuvya yati nitola lepi wuzi amala nyosi ya vilatu, hati chochoha chechivii chaku, ndava yati ukujilumba kuvya unikitili nivya na vindu vyamahele. 24 Nitola lepi vindu nambu vila ndu vyevalili vasongolo vangu na vila vya vandu vevavii pamonga na nene, ndi Aneli na Eshikoli na Mamle venavo vapewayi lilundu lavi."