1 Ndi Yakobo akatumbula kuhamba, vamitumu va kunani kwa Chapanga vakakonganeka naku. 2 Yakobo peavaweni, akajova, "Venava ndi manjolinjoli va Chapanga!" Ndava yeniyo akapakemela pandu pala Mahanaimu.

3 Yakobo akatuma vajumbi vamulongolela vahambayi kwa Esau mulongo waki, ku Seili kumulima wa Edomu. 4 Akavalagisa naha, "Mukamujovela mkulu wangu Esau aga, mvanda waku Yakobo ijova, ‘Nitamili kwa Labani chiuyehe mbaka hinu. 5 Nivii na ng'ombi na mapunda na mambelele na mene, vavanda va chigosi na va chidala. Hinu ndi nitumili ujumbi uwu kwa mkulu wangu ndava muni ukaniwonayi unihengela lipyana.’ "

6 Vajumbi pevawuyili kwa Yakobo, vakamjovela, "Tahikili kwa mlongo waku Esau, hinu mwene avi munjila ibwela kukonganeka na veve, avii na vandu miya mcheche." 7 Penapo Yakobo akayogopa neju na akavya na wogoyu. Akagava misambi hivili ya vandu veavii pamonga navu, mewa akavagava makundi gavili ga mambelele na mene misambi gavili gavili ng'ombi na ngamiya. 8 Yakobo akaholalela, "Ngati Esau akauzangila msambi umonga, msambi weusigalilayi ndi yati wivya yegwa."

9 Kangi Yakobo akamyupa Chapanga, "Veve Chapanga wa gogo wangu Ibulahimu, Chapanga wa dadi wangu Isaka, veve Bambu mwewanijovili niwuyayi kumulima wangu kwa valongo vangu, wanilagazili yati ukunihengela gabwina. 10 Nene niganikiwa lepi hati padebe ubwina wewanihengili na usadikika nene mvanda waku. Navili na ndonga ndu mumawoko gangu penayombokayi mfuleni uwu Yoludani, nambu hinu nivii nagu misambi iyi yivili. 11 Nikuyupa unisangulayi kuhuma mumawoko ga mlongo wangu Esau, muni niyogopa yati akutizangila na kutikoma tete tavoha, vamau pamonga na vana. 12 Veve wanilagisi kuvya yati ukunikitila gabwina na kuvikita viveleku vyangu vivya vyamahele ngati msavati wa kubwani wangavalangika."

13 Kilu yila ndi Yakobo akagona penapo. Kangi akavagula hinyama veavi nawu ampela njombi Esau mlongo waki. 14 Mene zidala miya zivili na mapongo ishilini, mambelele gadala miya hivili na gagosi ishilini, 15 ngamiya zidala selasini pamonga na vana vavi, ng'ombi zidala alubaini na zigosi kumi, mapunda gadala ishilini na gagosi kumi. 16 Akavagotolela vavanda vaki kila mmonga msambi waki, akavajovela, "Munilongolelayi na pemwigenda mulekayi fwasi pagati ya msambi na msambi wungi." 17 Akamulagisa mvanda mwealongolili yula, "Peukonganekayi na mulongo wangu Esau na akakukotayi, ‘Veve wamuvanda wa yani? Uhamba kwoki? Na hinyama yeniyi ndi za yani?’ 18 Ndi umujovelayi, ‘Vya muvanda waku Yakobo. Zenizi ndi njombi zenilagiziwi nimupelayi mkulu wangu Esau. Na mwene Yakobo akutilanda mumbele.’" 19 Mewawa amlagizi genago kwa mvanda wa pili na wa datu na vangi voha vevayimalila misambi akavajovela, "Pemwikonganeka na Esau mumjovela genago. 20 Mkotoka kukosiwa kumjovela, ‘Mvanda waku Yakobo ibwela mumbele yitu.’" Yakobo akitili chenicho aholalili, "Pangi yati nikumpolesa mtima kwa njombi zenimulongolisili, pangi penikonganekayi naku yati akunipokela bwina." 21 Ndi Yakobo akalongolesa njombi zaki, nambu mwene kilu yila akagona bahapo.

22 Kilu yiyoyo Yakobo akayimuka, akavatola vadala vaki vavili, na vana vaki kumi na mmonga, akavatola na vavanda vaki vavili, akayomboka pamfuleni Yaboki. 23 Akavayombosa kumwambu ya mfuleni, akayombosa mewa na vindu vyoha vyeavii navyu. 24 Yakobo akasigalila mwene, ndi akabwela mundu mmonga akakomana naku malimba mbaka hamba kucha.

25 Mundu mwenuyo peaweni kuvya ihotola lepi kumuhotola Yakobo, ndi amtovili pachibuna chaki, ndi chikatenuka peavii itovana naku malimba. 26 Penapo mundu yula akamjovela Yakobo, "Nileka nihambayi, muni kuvya lukela."

Nambu Yakobo akamjovela, "Nikuleka lepi katu, mbaka unimotisayi."

27 Mundu yula akamkota, "Lihina laku wayani?"

Akamyangula, "Lihina langu Yakobo."

28 Akamjovela, "Yati ukemelewa lepi kavili Yakobo, yati ukemelewa Isilaeli, muni uhotolini na Chapanga na vandu na veve uhotwili."

29 Yakobo akajova, "Chondi nijovela lihina laku."

Nambu mwene akamyangula, "Lihina langu ve la kyani?" Kangi akamumotisa Yakobo.

30 Pandu pala Yakobo akapakemela Penueli akajova, "Nimuweni Chapanga kwamihu gangu na nene nifwili lepi." 31 Yakobo peawukayi pa Penueli lilanga lavii limali kuhuma, akagenda cha kuchipila ndava ya chibuna kutenuka. 32 Ndi mana mbaka lelu Vaisilaeli vilya lepi mseketa wa chibuna, muni mundu yula amtovili Yakobo mseketa wa chibuna chaki.