1 Yakobo akavakemela vana vaki, akajova, "Mubwela pamonga nivajovela mambu gegakuvakolela magono gegibwela."

2 "Mbwela pamonga myuwana, nyenye vana va Yakobo,

muniyuwanilayi nene Isilaeli, dadi winu."

3 "Veve Leubeni ndi mvelekewa wangu wa kutumbula,

likakala langu na ulangisu wa usongolo wangu.

Veve ukuvapita valongo vaku kwa ukulu na makakala."

4 Veve ngati manji gamahele.

Nambu wivya wa kutumbula kavili,

muni wagonili na mweavili ngati mdala wangu,

uchitopisi lepi chitanda cha dadi waku!

5 "Simioni na Lawi ndi valongo.

Vindu vyavi vya kukomanela ngondo vihengela kukita chitututu."

6 Nambu nene yati niwungana nawu lepi muhuhakau wavi, yati niwungana nawu lepi mumingonganu yavi, muni kwa ligoga lavi vamkomili mundu na kwa mang'ang'ala gavi vadumwili ng'ombi miseketa.

7 Nikulipela likoto ligoga lavi muni likali neju, na ligoga lavi langali lipyana. Yati nikuvagava pamulima wa Yakobo, yati nikuvadandasa pamulima wa Isilaeli.

8 "Veve Yuda, valongo vaku yati vakukulumba.

Makoko vaku yati ukuvahotola kungondo,

na valongo vaku yati vakugundamila kwa utopesa."

9 Veve Yuda, mwana vangu ndi ngati mwanalihimba.

mweapatili kuzingila na kuwuya.

Ngati lihimba lijitalambula na kugona pahi,

lihimba lidala lelivi na makakala, yani mweilinga kumyumusa?

10 Ulongosi waku yati umalika lepi mu Yuda, na vachiveleku vaku yati vilongosa magono goha mbaka peibwela yula mtalalila,

ndonga ya ulongosi pamagendelu gaki,

mbaka peibwela yula ndi waki,

na vandu yati vakumyidakila.

11 Yati ikunga punda waki mumzabibu

na mwanapunda waki mumzabibu wa bwina.

Yati ichapa nyula zaki mudivayi ndava avi nayu yamahele,

na ichapa magwanda gaki mudivayi yidung'u.

12 Mihu gaki ndi gadung'u kwa kunywa divayi na

minu gaki ndi gamsopi kwa kunywa mavele.

13 "Zebuluni yati itama pandu pambwani,

mbwani yaki yati yivya pandu pauyegesa watu.

Mulima waki yati wibakana na Sidoni."

14 "Isakali ndi ngati punda mweavi na makakala,

mweakujigonesa pagati ya mizigu yaki.

15 Peakupawona kuvya pandu penapo pabwina kupumulila,

na kuvya ndi mulima wa kuganisa,

yati iyinamisa mugongo waki kugega mzigu,

yati ivya mvanda lihengu lelinonopa."

16 "Dani yati ivya muhamula mbwina kwa vandu vaki,

ngati mmonga wa makabila ga Isilaeli.

17 Yati ivya ngati liyoka munjila,

liyoka lelivi na sumu pamuhana ya njila,

leliluma vikanyatilu vya falasi,

na mkwela falasi igwa njanja."

18 "Veve Bambu Chapanga, nilindila unisangula!."

19 "Gadi yati izangiwa na vanyagaji,

nambu mwene yati akuvalanda mumbele na kuvatova."

20 "Ndima ya Asheli yati yihumisa mabenu gamahele,

na mwene yati akumpela nkosi chakulya cheakuchigana."

21 "Nafutali ndi ngati paa mwealekeliwi,

mweiveleka vana vabwina."

22 "Yosefu ndi ngati mkongo wewipambika,

mkongo wewipambika pamuhana ya chinyepa,

mambanda gaki gigubika muluwumba."

23 Makoko vaki yati vakumzangila neju,

vakumtagila migoha na kumung'aha neju.

24 Nambu upinde waki wakona usindimala,

na mawoko gaki gapewi makakala,

kwa uhotola wa Mweavi na Makakala wa Yakobo,

ndava ya Mdimaji, Mlonda wa Isilaeli.

25 Ndava muni Chapanga dadi waku yati akutangatila,

Chapanga mweavi na makakala yati akumotisa,

upatayi mota za fula kuhuma kunani kwa Chapanga,

mota za manji kuhuma pahi,

mota za vadala vaveleka vana vamahele na kuvya mifuya yamahele.

26 Dadi waku yati akumotisa kuliku mota zezihuma muvidunda vya kadeni,

vindu vyabwina kuhuma muvidunda vya magono goha, Mota zenizo ndi zivya pamutu wa Yosefu,

pachiwungi chaki mwene mweahaguliwi na valongo vaki.

27 "Benyamini ndi libwa likali la kudahi,

lukela lilya cheazingili,

na kimii hugava vindu vyevikamuliwi kungondo."

28 Genago ndi makabila kumi na gavili ga Isilaeli, na ago ndi malovi geavajovili dadi wavi peavamotisi, kila mmonga wavi ngati cheaganikiwi.

29 Kangi Isilaeli akavalagiza vana vaki, "Nene papipi nifwa. Munizikayi pamonga na vadadi vangu mumbugu yeyivili kumgunda wa Efuloni wa likabila la Vahiti, 30 kula Makipela, upandi welihumila lilanga la pamuji wa Mamle, pamulima wa Kanaani. Ibulahimu agulili mbugu na mgunda wenuo kwa Efuloni, wa likabila la Vahiti, livya laki la kuzikila. 31 Kwenuko ndi kwevazikiwi Ibulahimu na mdala waki Sala, kwenuko ndi kwevazikiwi Isaka na mdala waki Lebeka, na kwenuko ndi kwenimzikili Lea. 32 Mgunda wenuo na mbugu yaki laguliwi kwa Vahiti." 33 Yakobo peamalili kuvalagiza vana vaki, atalambwili magendelu gaki akagona pachitanda na kufwa.