1 Kangi Chapanga akamkumbuka Nuhu na vinyama vyoha kudasi na vya kudimwa yveyvavii pamonga nayu musafina. Hinu Chapanga akabulumisa mpungu pamulima, manji gakatumbula kupungula. 2 Vinyepa vila vyevyavili pahi neju ya ndima pamonga na milyangu ya yeyayita manji kuhuma kunani kwa Chapanga yikadindwa na fula yaketwiki, 3 manji gakayendelela kupungula mboli mboli pamulima. Pegapitili magono miya yimonga na hamsini, manji gakavya gapungwiki neju. 4 Mumwehi wa saba ligono la kumi na saba, safina yikatula panani ya chitumbi Alalati. 5 Manji gakayendelela kupunguka mbolimboli, na ligono la kutumbula la mwehi wa kumi vikawonekana vituvilu vya vitumbi.

6 Pegapitili magono alubaini Nuhu akadindula lidilisha leatenganizi musafina yila, 7 akalihumisa likungulu kuvala, nambu lawuyi lepi lambuluwiki kuni na kula mbaka manji gakayuma pamulima. 8 Kangi Nuhu akayihumisa ngunda muni alolayi ngati manji gayumili panani ya mulima. 9 Nambu ndava manji gavi gakona gagubiki mulima woha, ngunda yapaweni lepi pandu pa kutula, ndi yikamuwuyila Nuhu musafina. Nuhu akahumisa chiwoko na kuyiyingisa mugati ya safina. 10 Nuhu akalindila magono gangi saba, akayituma kavili ngunda kuvala. 11 Peyahikili chimihi ngunda yikamuwuyila Nuhu kuni mumulomo yigegii lihamba livisi la mzeituni, ndava yeniyo Nuhu akamanya kuvya manji gapungwili pamulima. 12 Akalindila kangi magono saba na akayituma kavili ngunda kuvala, penapo ngunda yamuwuyalili lepi kwaki.

13 Nuhu peavii na miyaka miya sita na yimonga, mwehi wa utumbukanu na ligono la utumbukanu, manji gavii gamali kuyuma panani ya ndima. Nuhu akagubukula chituvilu cha safina ndi akalola kuvya ndima yimali kuvya yiyumu. 14 Ligono la ishilini na saba mwehi wa pili, ndima yavii yiyumu jwee.

15 Ndi Chapanga akamjovela Nuhu, 16 "Humayi musafina veve pamonga na mdala waku na vana vaku pamonga na vadala vavi. 17 Mewa humisa kuvala viumbi vyoha ndalindali vyevivii mumi pamonga na veve, videge na hinyama na kila chiumbi chechikwava, muni vihotola kuveleka neju pamulima, viyonjosekayi na kudandasika kila pandu." 18 Hinu Nuhu akahuma mwene na mdala waki na vana vaki, pamonga na vadala vavi. 19 Vakahuma musafina kulandana na misambi yavi, hinyama yoha na viumbi vyoha vyevikwava na videge vyoha.

20 Nuhu akamujengela Bambu pandu ndava ya kuwusila luluteta. Akatola chinyama chimonga na chidege chimonga kuhuma mukila msambi vyeviyidakiliwa palongolo ya Chapanga, akaviwusa kuvya luluteta lwa kutiniswa kwa Chapanga. 21 Bambu akanuha mnungalilu wabwina wa teta yeniyo na kuganiswa nayu, Bambu akajova mumtima waki, "Katu yati nikuyipela lepi ndima kavili likoto ndava ya vandu, pamonga vandu maholo gavi gahakau kuhumila uwana wavi, amala yati nikomakesa lepi kavili viumbi vyoha ngati chenakitili. 22 Chenichi ndi mulima cheuyendelela kuvya lusenje lwa kumija na kubena na lwa mbepu na lupyupyu na chihuku na chilangasi na muhi na kilu, yati vimalika lepi."