1 Mwanakandayi Chapanga akamlinga Ibulahimu. Akamkemela, "Ibulahimu!" Ibulahimu akayangula, "Nivi apa."

2 Akamjovela, "Umtola mwana waku Isaka, mwana wa chiganu chaku mweavii mwene nduu, uhamba naku kumulima wa Molia. Kwenuko ukamuwusayi luteta ya kutinyiswa kunani ya chitumbi chenikulangisa."

3 Ibulahimu akayimuka lukela pee, akatendekeha lipunda ndava ya lugendu, akavatola vavanda vavili pamonga na Isaka mwana waki. Akatinya sagala ya kutinisila luteta lwenulo, ndi akatumbula lugendu kuhamba kuchitumbi cheajoviwi na Chapanga. 4 Ligono la datu Ibulahimu akayinula mihu gaki, akapawona pandu penapo cha kutali. 5 Akavajovela vavanda vaki, "Mutamayi apa pamonga na lipunda. Lukumbi nene na mwana vangu tihamba kula, kumuyupa, ndi tikamalayi yati tikuvawuyila."

6 Ibulahimu akatola sagala za kutinisila luteta, akamutwika Isaka, mwene akatola motu na chipula. Vakahamba pamonga. 7 Isaka akamkota Ibulahimu, "Dadi!"

Mwene akayangula, "Ena mwana vangu?"

Isaka akakota, "Tivii na motu na sagala, nambu livii kwoki limbelele la kuwusa luteta ya kutiniswa?"

8 Ibulahimu akayangula, "Chapanga mwene yati akutipela." Voha vavili vakayendelela kuhamba pamonga.

9 Peahikili pandu peajoviwi na Chapanga, Ibulahimu akajenga pandu pa maganga pa kuwusila teta, akavika sagala panani yaki. Akamukunga nyosi Isaka na akamugoneka panani ya pandu pa kuwusila teta. 10 Ibulahimu akatalambula chiwoko chaki akatola chipula muni amuchinja mwana vaki. 11 Nambu mutumu wa Bambu akamkemela kuhuma kunani kwa Chapanga, "Ibulahimu! Ibulahimu!"

Mwene akayangula, "Nivi apa."

12 Mutumu wa kunani kwa Chapanga akamjovela, "Kotoka kumlemasa mwana, na ukoto kumukitila chochoha. Hinu nimanyili kuvya ukumyogopa Chapanga, muni vaninotili lepi hati mwana waku ngayuyu."

13 Penapo Ibulahimu akalola cha kutindisa mihu, akaliwona limbelele ligosi lipatimi mang'elu palitutu la mumbele ya Ibulahimu. Akahamba akalitola limbelele lila ndi akaliwusa luteta pahala pa mwana waki. 14 Pandu pala Ibulahimu akapakemela, "Bambu yati akutipela." Ngati cheyijovekana mbaka lelu, "Muchitumbi cha Bambu, yati akutipela."

15 Mtumu wa Bambu akamkemela kangi Ibulahimu kuhuma kunani kwa chapanga, 16 akamjovela, "Chapanga ijova naha, ‘Nilapili kwa mtima wangu kuvya ndava ukitili chenichi, vaninotili lepi mwana waku ngayuyo, 17 chakaka yati nikumotisa na kukuyonjokesela vana vaku ngati ndondo vya kumahundi na ngati msavati weuvii kumbwani. Viveleku vyaku yati vitola miji ya vamakoko yivya yavi. 18 Ndava uyidakili kukita genakujovili, ndi vandu voha va pamulima yati vimotisiwa kwa njila ya viveleku vyaku.’ " 19 Penapo Ibulahimu akavawuyila vavanda vaki, ndi vakawuka vakahamba voha pamonga ku Beeli Sheba. Ndi Ibulahimu akatama kwenuko.

20 Pegamaliki genago, Ibulahimu akajovewa, "Mlongo waki Naholi apatili vana vagosi kwa mdala waki mwaikemiwa Milika. 21 Mveleku wa kutumbula ndi Usi, mwealandili avi Buzi kangi Kemueli dadi wa Alamu, 22 na Keseli na Hazo na Pilidashi na Yidilafu na Besueli." 23 Besueli akamveleka Lebeka. Milika akamveleka Naholi mlongo wa Ibulahimu vana venavo nane. 24 Hawala waki Leubeni mewa avaveliki, Teba na Gahamu na Tahashi na Maaka.