1 Miyaka ya Sala yeatamili pamulima ndi yavii miya yimonga na ishilini na saba. 2 Sala afwilalili ku Kiliasi Alabu ndi ku Hebuloni kumulima wa Kanaani. Ibulahimu akumvembenekela Sala na kumuyupila kwa Chapanga.

3 Ibulahimu akayinuka peyagoniswi higa ya mdala waki, akahamba kulongela na Vahiti, akavajovela, 4 "Nene nitama ngati myehe pagati yinu. Mnigulisila ndima ya matinda, muni nimuzika mdala wangu mweafwili.

5 Vahiti vakamyangula Ibulahimu, 6 Tiyuwanila, mkulu. Veve ndi wachilongosi witu mweumanyikana neju, mzika mdala waku mweafwili mulitinda loloha leuliganili pagati ya matinda gitu aga. Kawaka mundu mweakudivalila litinda ndava ya kuzika mdala waku mweafwili."

7 Penapo Ibulahimu akayinuka na kugundama palongolo ya vakolojinji va mulima wa Vahiti kuvasengusa. 8 Akavajovela, "Ngati mukuniyidakila nimuzika mdala wangu mweafwili, chondi muniyupilayi kwa Efuloni mwana wa Sohali, 9 ndi anigulisilayi mbugu yeyavili ku Makipela yeyivii mumbaka wa mugunda waki. Mumuyupayi anigulisilayi livyayi la matinda gangu, anipelayi kwa mashonga gegiganikiwa bahapa palongolo yinu."

10 Efuloni mwene avii bahopo pamonga na Vahiti venavo vevakonganiki palimlyangu la mulima. Ndi Efuloni Muhiti akamyangula Ibulahimu bahapo palongolo ya Vahiti voha. 11 Akamjovela, "Lepi, mkulungu wangu, chondi uniyuwanila, nikupela mugunda woha pamonga na mbugu yeyavili mwenumo, nikupela palongolo ya vandu vangu, uzikayi vandu vaku."

12 Ibulahimu akagundama kangi palongolo ya vakolonjinji, 13 akamjovela Efuloni, na vandu voha viyuwana, "Chondi uniyuwanila, yati nikulipa mashonga ga mugunda waku, nikuyupa upokelayi luhuna ulu muni nihotola kumzika mwenumo mdala wangu mweafwili." 14 Efuloni akayangula, 15 "Niyuwanila, mkulungu wangu, mugunda wenuwu hipandi ya mashonga gaki ndi miya mcheche ndu, nambu zenizi ndi chindu lepi pagati yaku na nene? Mzika mdala waku mweafwili." 16 Ibulahimu akagayidakila malovi ga Efuloni, akampela hipandi ya maganga ga feza geajovili palongolo ya Vahiti, hipandi miya mcheche ya maganga ga feza, ngati cheyavili chipimu cha vagulisa vindu lukumbi lwenulo.

17 Penapo mgunda wa Efuloni wewavii ku Makipela papipi na Mamle, pamonga na mbugu yeyavili mwenumo na hikongo yoha yeyavili mwenumo na mugunda woha, 18 akapewa Ibulahimu, palongolo ya vandu voha vevavili penapo palimlyangu wa muji.

19 Pegamaliki genago Ibulahimu akamzika mdala waki mweafwili mumbugu yeyavili mumgunda wa Makipela upandi wa Mamle, yeyivili ku Hebuloni mumlima wa Kanaani. 20 Hinu mgunda wa Vahiti na mbugu yeyavili mwenumo, apewili Ibulahimu yivya ndava ya kuvazika vandu vaki vevifwa.