1 Hinu vamitumi va kunani kwa Chapanga vavili vala vakahika ku Sodoma chimihi, Lutu atamili pa limlyangu likulu la muji la kuyingilila ku Sodoma. Ndi Lutu peavawene akavahambila kanyata na kuvagundamila mbaka pahi. 2 Akajova, "Vabambu vangu, chondi muyingilayi munyumba yangu nene namvanda winu. Mwihotola kusanja magendelu ginu na kugona kwa nene namvanda winu ndi chilau lukela pehe muyendelela na lugendu lwinu."

Vakamyangula, "Lepi, nambu tete yati tigona paluvanja."

3 Lutu akavayupa neju, vayingila munyumba yaki ndi vakayingila. Akavatendekelela chakulya, akavatelekela libumunda langasopiwa ngemeku, ndi vakalya.

4 Nambu kwakona vangagona, vandu voha va pamulima wa Sodoma vasongolo na vagogo, changali kusigalila hati mmonga, vakayitindila nyumba ya Lutu. 5 Vakamkemela Lutu na kumkota, "Vavii kwoki vandu vala vevabwelili kwaku kilu iyi? Vahumisa kuvala tigana kugona nawu."

6 Lutu akahuma kuvala, akadinda mlyangu chamumbele, 7 akavajovela, "Chondi mwavamkozi vangu. Mkoto kukita uhakau wenuwu! 8 Mlola, nivii navu vasikana vavili katu vakona vagonikini lepi na mgosi. Chondi nikuvayupa nivaletela vasikana vangu na nyenye muvakitila chochoha chemwigana. Nambu mkoto kuvakitila chochoha vagosi ava, ndava vayehe vangu."

9 Vakamyangula, "Wuka." Vakayendelela kujova, "Mundu uyu abwelili kutama pamulima witu ngati myehe nambu hinu akujikita muhamula witu! Yati tikumhengela gahakau kuliku venavo." Vakamkang'a neju Lutu na kugana kudenya mlyangu. 10 Nambu vayehe vala vakatalambula mawoko gavi, vakamhutila Lutu mugati ya nyumba na kudinda mlyangu. 11 Kangi vakavakoyosa mihu vandu vala, vagosi voha vevayimili pamlyangu, vasongolo na vagogo, penapo vahotwili lepi kavili kuuwona mlyangu.

12 Vandu vavili vala vakamjovela Lutu, "Uvii navu vandu vangi penapa, vakuhanu vaku, vana vaku vagosi na vadala, amala yungi yoyoha mweitama muji wenuwu? Vawusa pandu penapa, 13 ndava tikupakomakesa pandu penapa. Ndava malovi gahakahu neju ga vandu ava gamuhikili Bambu na mwene atitumili tete tipakomakesa."

14 Ndava yeniyo Lutu akahamba kwa vasongolo vevagana kuvagega vasikana vaki akavajovela, "Muwukayi kanyata pandu apa, ndava Bambu avii papipi kuukoma mulima uwu!" Nambu vene vakahololela kuvya ijova udesi.

15 Kwepachili, vamitumi va kunani vala vakamung'ang'anisa Lutu, vakamjovela, "Wuka kanyata! Mtola mdala waku na vasikana vaku vavili muwuka, ngati lepi ya mkomiwa peukomiwa mulima wenuwu." 16 Lutu akalyungalyunga, vandu vala vakamkamula chiwoko chaki, na chiwoko cha mdala waki, na hiwoko ya vasikana vaki vavili vala, vakavahumisa kuvala ya mulima wula, muni Bambu avahengili lipyana. 17 Pevamalili kuvahumisa kuvala, mtumu mmonga akavajovela, "Mujumbayi ndava ya kujisangula! Nambu mukotoka kung'anamka mumbele mewa mkotoka kuyima popoha mulikemba lenili! Jisangula kwa kutilila kuhitumbi, walakomewa."

18 Lutu akavayangula, "Yikoto kuvya chenicho, mwavakulu vangu. 19 Chakaka kuvya nene namvanda winu munihengili lipyana, na nyenye mulangisi ubwina uvaha neju kusangula wumi wangu. Nambu nihotola lepi kujumbalila kuhitumbi. Yati nikomiwa kwakona nangahika kuhitumbi. 20 Mlola, kula kuvii na muji udebe wenihotola kutilila ndava uvi papipi. Hinu Muniyidakila nitilalila kwenuko, ndi yati nisanguliwa wumi wangu."

21 Akamyangula, "Goha genago, nikuyidakili. Yati nikomakesa lepi muji wenuwo weujovili. 22 Kita kanyata kutilila kwenuko, nene yati nikita lepi loloha mbaka uhika kwenuko."

Pegamaliki genago muji wenuo wakemeliwi Soali.

23 Lutu ahikili pamuji wa Soali lukumbi lwa mbalala. 24 Ndi Bambu akahelesa motu ukali na mangwala kuhuma kunani kwaki kuyocha miji ya Sodoma na Gomola. 25 Ndi akatinyisa miji yila, likemba loha, vandu voha va mulima pamonga na mikongo na manyahi gegamelili penapo. 26 Nambu mdala wa Lutu akalola mumbele, ndi akang'anamuka kuvya lipanda la mwinyu.

27 Chilau yaki lukela pee, Ibulahimu ahambili pandu pala peayimili palongolo ya Bambu. 28 Peavili penapo akalola pahi upandi wa Sodoma na Gomola, na pandu poha palikemba, akalola lyohi lihuka, lyohi ngati lyohi lelihuma mulitembe livaha. 29 Bambu peatinyisi milima ya kunyasi kweatamayi Lutu, akamkumbuka Ibulahimu kwa kumuwusa Lutu kuhuma pamuji wenuo, muni Lutu akotoka kutinyika pamonga nawu.

30 Lutu akayogopa kutama ku Soali, ndava yeniyo akawuka muji wenuo, mwene pamonga na vasikana vaki vavili, vakahamba kutama kumbugu. 31 Lukumbi vitama kwenuko msikana waki mvaha akamjovela mdebe, "Dadi witu ndi mgogolo, na kawaka mgosi mweakutigega muni tipata vana ngati cheuvi mvele pamulima woha. 32 Hinu, timgalisa dadi kwa divayi, muni tihotola kugona nayu na tivya na vana kwaki." 33 Kilu yila vakamgalisa dadi wavi kwa divayi, na msikana waki mvaha akayingila akagona nayu. Nambu dadi waki amanyili lepi lukumbi msikana waki peagonili nayu amala peawukili.

34 Chilau yaki msikana mvaha yula akamjovela mbena waki, "Golo kilu nagonili na dadi, mewa, lelu timgalisa divayi ndi akagalayi uyingilayi veve ukagona nayu, ndava yeniyo tavoha yati tipata vana ndava ya dadi witu muni chiveleku chaki kikoto kuyaga." 35 Hinu, kilu yila mewawa vamgalisi mewa dadi wavi kwa divayi, kangi msikana mdebe yula, akayingila akagona nayu. Nambu dadi waki amanyili lepi msikana waki peagonili nayu mewa peawukili. 36 Ndava yeniyo ndi vasikana voha vavii va Lutu vakapata ndumbu kwa kugona na dadi wavi. 37 Msikana mvaha akaveleka mwana, akamkemela lihina laki Moabu, mwene ndi utumbula wa Vamoabu voha hati lelu. 38 Mewa msikana mdebe akaveleka mwana, na mwene akamkemela Benami, mwene ndi utumbula wa Vaamoni voha hati lelu.