1 Nambu, pagati ya vinyama vyeawumbili Chapanga liyoka lavi lichenjelanu neju kuliku vinyama vingi vyoha vya kudahi. Ndi liyoka likamujovela mdala mwenuyo, "Wu, Bambu Chapanga ajovili, ‘Katu mukoto kulya matunda ga mkongo wowoha wa mulidimba?’ "

2 Mdala akaliyangula liyoka, "Tihotola kulya matunda ga mikongo yoha ya mulidimba, 3 nambu matunda ga mmkongo weuvili pagati ya lidimba Chapanga ajovili, ‘Mkoto kulya hati kugapamisa, yati mwifwa.’"

4 Liyoka likamyangula mdala, "Chakaka yati mwifa lepi. 5 Chapanga ajovili chenicho ndava amanyili kuvya ligono mukalyayi matunda ga mkongo wenuwo yati mudinduliwa mihu, na nyenye yati mwivya ngati Chapanga, yati mukugamanya gabwina na gahakau."

6 Mdala peauweni mkongo wula unamatunda gabwina kwa chakulya, na kwa kulolekana unyambili, na wabwina kwa kuleta umanya, ndi akayava litunda laki, akalya na akampela na mngwana waki mweavii naku, mewawa na mwene akalya. 7 Bahapo pevamalili kulya litunda, vakajimanya kuvya vavii waka, hinu vakajitotela mahamba ga mkongo weukemiwa mtini, vakawala.

8 Kimihi vakayuwana chigigi cha Bambu Chapanga igenda mulidimba, Adamu na mdala waki vakamuyuvalila Chapanga mumikongo ya mulidimba. 9 Nambu Bambu Chapanga akamkemela Adamu, "Uvi koki?"

10 Mwene akayangula, "Nikayuwini chigigi chaku mulidimba, ndi nikayogopa na nikayuvalila, muni nivi waka."

11 Bambu Chapanga akakota, "Yani mweakujovili kuvya veve uvi waka. Wu ulili matunda genikujovili ukoto kulya?"

12 Mundu yula kajova, "Mdala mweunipelili avyayi pamonga na nene ndi mweanipelili litunda la mkongo wenuwo, na nene nikalya."

13 Bambu Chapanga akamkota mdala, "Ndava kyani ukitili naha?"

Mwene akayangula, "Liyoka linikongili na nene nikalya."

14 Kangi Bambu Chapanga akalijovela liyoka, "Ndava muni ukitili chenichi, unalikoto kuliku hinyama hingi yoha ya kudimwa na ya kudahi, yati ukwava kwa lutumbu, na chakulya chaku chivya lububu magono goha ga wumi waku. 15 Yati nivika ulikoko pagati yaku na mdala, na pagati ya chiveleku chaku na cha mdala, mwene yati akubonde mutu waku na veve yati ukumukong'onda chinjekenjeke."

16 Kangi akamjovela mdala, "Yati nikuyonjokesela lipyanda laku la kuveleka, kwa mvinisu yati uveleka vana. Mewawa yati wigana kuvya na mngwana waku lukumbi lwoha na mwene yati akutalalila."

17 Kangi akamjovela Adamu, "Ndava muni umuyuwani mdala waku, ukalya matunda ga mkongo wenikubesili ukoto kulya, kwa kubuda kwaku ndima yipewi likoto ndava yaku. Yati wipata chakulya chaku kwa mwasi, magono goha ga wumi waku. 18 Ndima yati yipambika minga na masongolelu, na veve yati ulya makolo kuhuma kumgunda. 19 Kwa mwasi waku yati ukuyikita ndima yikupela chakulya, mbaka peukuyiwuyilayi ndima yeuhumalili, muni veve ndi ludaka na muludaka yati wiwuya."

20 Adamu akampela mdala waki lihina "Eva," Ndava muni ndi mau wa vandu voha. 21 Bambu Chapanga akavakitila nyula ya chikumba Adamu na mdala waki, akavawalika.

22 Kangi Bambu Chapanga akajova, "Hinu mundu uyu avii ngati tete, agamanyili gabwina na gahakau. Yiganikiwa kumdivalila akoto kuyava litunda la mkongo wa wumi, muni akalyayi yati ivya mumi magono goha gangali mwishu." 23 Ndi Bambu Chapanga akamuvinga patali na lidimba la Edeni, muni alimayi ndima yeyahengiki kumuwumba. 24 Peamalili kumvinga Adamu mulidimba, akavika chiumbi chechivi na magwaba chechikemelewa kelubi upandi welihumila lilanga wa lidimba la Edeni chechikamwili upanga wa motu weutindila pandi zoha, kuyiyangalila njila yeyihamba kumkongo wa wumi.