1 Pelwamaliki lukumbi nunuyu, mnywehaji wa nkosi na myocha mabumunda wa nkosi vamubudili mkulu wavi nkosi wa ku Misili. 2 Falao avayomili mnyeshaji mkulu na myochaji mkulu, 3 akavavika muulonda wa munyumba ya mkulu wa manjolinjoli, muchifungu chichocho cheakungiwi Yosefu. 4 Vavii muchifungu kwa lukumbi nunuyu na mkulu wa manjolinjoli akamhagula Yosefu avahengela.

5 Hinu kilu yimonga, muchifungu mula yikavya munywesaji mkulu na yula myocha mabumunda mkulu wa nkosi wa ku Misili valotili ndoto, kila ndoto yavi na mana yaki. 6 Lukela Yosefu peavahambili kuvalola, akavakolela voha vavili vavi ngolongondi. 7 Hinu, Yosefu akavakota vakulu vala vevavii pahi ya Falao vevavi muchifungu pamonga nayu munyumba ya mkulu waki, "Ndava kyani pamihu pinu lelu piwonekana pavii ngolongondi?"

8 Vakamyangula, "Kila mumonga alotili ndoto yaki nambu kawaka mundu mweihotola kudandaula ndoto zenizo."

Yosefu akavajovela, "Wu, kudandaula ndoto lihengu lepi la Chapanga? Hinu, mnijovela ndoto zinu."

9 Myangalila vinyweso mkulu wa nkosi akamdandaulila Yosefu ndoto yaki, akajova, "Mundoto yangu nalotili kuvii na mzabibu palongolo yangu, 10 wene wavi na mambanda gadatu. Bahapo ndu pewatumbwili kutupu, ndi maluva gaki gakahomola na vikonyo vyaki vikavya na zabibu zezihundili. 11 Mumawoko gangu navili na chikombi cha Falao, hinu, nikatola zabibu, nikaminyila muchikombi chenicho, nikampela Falao."

12 Yosefu akamjovela mkulu yula, "Wenuwu ndi udandaula wa ndoto yaku, gala mambanda gadatu gewagaweni ndi magono gadatu. 13 Pegimalika magono gadatu Falao yati akukuwusa kuhuma muchifungu na kukuwuyisa kavili pandu paku. Yati wihotola kavili kumpela Falao chikombi mumawoko gaki ngati chewakitili kadeni pewavii munywehaji. 14 Nambu mambu pegakuhambila bwina, unikumbuka na unihengela lipyana, na ujova mambu gangu palongolo ya Falao, muni aniwusa muchifungu. 15 Ndava muni natoliwi kwa makakala kuhuma pamulima wa Vaebulania, na penapa pa Misili nikitili lepi chochoha chihakahu chechikunikita nikungiwayi."

16 Myocha mabumunda yula mkulu peawene kuvya udandaula wula ndi wabwina, akamjovela Yosefu, "Hati nene nalotili ndoto! Niloti nigegili madengu gadatu ga mabumunda pamutu wangu. 17 Mulidengu la kunani, kwavili na vyakula ndalindali vyevitendekiwi ndava ya Falao. Nambu, videge vikahola mulidengu lelavii pamutu wangu!"

18 Yosefu akamjovela, "Wenuwu ndi udandaula wa ndoto yaku. gala madengu gadatu gewagalotili ndi magono gadatu. 19 Pamagono aga gadatu Falao yati akuwusa muchifungu na kudumula mutu waku na kukuyinjisa pamkongo, videge yati vilya higa yaku."

20 Paligono la datu lavi ligono la mselebuko wa kuvelekwa kwaki Falao. Muligono lenilo avatendelekela mselebuko vatumisi vaki voha. Akavawusa muchifungu myangalila vinyweso waki mkulu na myocha mabumunda mkulu, akavaleta palongolo ya vakulu vevavii pahi yaki. 21 Falao akamuwuyisa mulihengu laki myangalila minyweso, avya akumpela Falao chikombi. 22 Nambu yula myocha mabumunda mkulu akamning'inisa pamkongo, ngati Yosefu cheavadandaulili ndoto zavi. 23 Nambu mnywesaji mkulu amkubwiki lepi Yosefu, akamkosewa njwee.