1 Hinu Vaishimaeli vakamupeleka Yosefu ku Misili, vakamgulisa kwa Mumisili mweakemelewayi Potifa mweavili mmonga wa vilongosi va pahi ya Falao mwene avii mkulu wa valonda. 2 Bambu Chapanga akavya pamonga na Yosefu, ndi akanekanala, atamayi munyumba ya yula mkulu waki Mumisili yula mweamugulili. 3 Mkulu waki akamuwona kuvya Chapanga avii pamonga na Yosefu na Bambu akumtangatila ahotola kukita bwina kila jambu leikita. 4 Ndi Potifa akaganiswa neju Yosefu, akamuvika avya mtumisi waki mwene mewawa akamvika kuvya myimamila wa nyumba yaki na vindu vyaki vyoha. 5 Kuhumila Potifa peamkitili Yosefu kuvya mkulu wa nyumba yaki pamonga na vyoha vyeavili navyu, ndi Bambu Chapanga akayimotisa nyumba ya Mumisili mwenuyo ndava ya Yosefu. Mota za Bambu Chapanga zikavya mukila chindu cheavili nachu Potifa, munyumba na kumugunda. 6 Ndava yeniyo Potifa akamupela Yosefu uhotola mumambu gaki goha na Potifa ahengili lepi na chindu chochoha ndi nga chakulya chaki mwene. Yosefu avili msongolo wa bwina na kunyamba.

7 Pelwahambili lukumbi nunuyu, mdala wa Potifa mkulu waki akamunogela Yosefu ndi akamjovela, "Gonana na nene!" 8 Nambu Yosefu akabela, akamjovela mdala wa Potifa, "Mbwitu, mkulu wangu anipeli uhotola ga kila chindu chechivi mugati, vindu vyoha anipeli niviyangalila. 9 Avili lepi mkulu kuliku nene munyumba iyi, mkuilu anidivalili lepi chindu chochoha chila nambu veve ndu, ndava veve wamdala waki. Nihotola wuli kukita uhakau uvaha ngati wenuwo na kumbudila Chapanga." 10 Mdala mwenuyo akayendelela kumukulukisa Yosefu ligono kwa ligono, nambu Yosefu amuyuwanili lepi na agonili naku lepi.

11 Ligono limonga Yosefu akayingila mugati ya nyumba kuhenga lihengu, na pavili lepi na mundu yoyoha mugati mwenumo. 12 Mdala wa Potifa akamukamula Yosefu nyula yeawalili na kumjovela, "Bwela tigonana!" Nambu Yosefu akamulekela nyula yila mumawoko gaki, na akatilalila kuvala. 13 Mdala yula peaweni kuvya Yosefu amulekili nyula mumawoko na kutilili kuvala, 14 Mdala yula akavakemela vavanda va munyumba ndi akavajovela, "Mbwela mlola! Muebulania mweatiletili mngwana wangu akutipela soni. Ayingili muchumba changu kugana kunilimba nambu nikaywanga neju. 15 Peakayuwini nivemba kwa lwami luvaha ndi akanilekela nyula yaki na kutilila kuvala!"

16 Hinu mdala yula akavika nyula yila mbaka peawuyili mngwana waki. 17 Ndi akamudandaulila malovi galagala kujova. "Mvanda Wachiebulania yula mweutiletili akaniyingalili muchumba changu na kugana kunilimba. 18 Nambu penikaywangili ndi akanilekili nyula yaki, akatila kuvala."

19 Potifa peayuwini malovi geajoviwi na mdala waki, kuvala lijambu lila leahengili mvanda waki. Potifa akamema ligoga. 20 Potifa akamtola Yosefu akamusopa muchifungu, pandu pevakungiwi vavanda vangi va nkosi, na Yosefu akavya muchifungu. 21 Nambu Bambu Chapanga akavya na Yosefu, akammotisa na mkulu wa chifungu akaganiswa Yosefu. 22 Mkulu wa chifungu akamukita Yosefu avyayi mkulu kwa vakungiwa vangi voha, ayimamilayi vindu vyoha vyevii mwenumo. 23 Mkulu wa chifungu ahengili lepi kavili chindu chochoha chila cheamugotolili Yosefu, muni Bambu Chapanga avili pamonga na Yosefu na amtangatili mumambu goha geagahengili.