1 Pegamaliki mambu ago, linenu la Bambu likamubwelela Abulahamu mumaono, "Abulahamu! Kotoka kuyogopa! Nene ndi chingwamba chaku. Na njombi yaku yati yivya yivaha neju."

2 Nambu Abulahamu akajova, "Bambu Chapanga veve yati ukunipela kyani lukumbi nakona nitama changali mwana, na muhali wangu ndi Eliezeli mundu wa ku Damesiko? 3 Lola! Unipeli lepi mwana, mvanda mweavelekiwi munyumba yangu ndi muhali wa vindu vyangu."

4 Ndi Bambu Chapanga akamjovela, "Mwenuyu Elieza mvanda ivya lepi muhali waku nambu mwana waku ndi ivya muhali waku." 5 Penapo Bambu akamuhumisa Abulahamu kuvala na kumjovela, "Lola kunani! Uvalangai ndondo, ngati uhotwili kuzivalanga! Chenicho ndi viveleku vyaku chevivya vyamahele."

6 Abulahamu akamsadika Bambu Chapanga, na Abulahamu awonikini ayidakiliwi palongolo ya Bambu.

7 Mewa akamjovela, "Nene ndi Bambu mwenakuletili kuhuma ku Uli, mulima wa Vakalidayo, kukupela mulima uwu uvya waku."

8 Nambu Abulahamu akamjovela, "Bambu Chapanga veve, yati nimanya wuli kuvya mulima uwu kuvya wangu?"

9 Bambu Chapanga akamjovela, "Niletelayi mpapakasi wa ng'ombi yeyivi na miyaka yidatu, mene yidala yeyina miyaka yidatu, limbelele ligosi lelivi na miyaka yidatu, ngunda pamonga na liwela la ngunda." 10 Abulahamu akaleta hinyama yoha, akahidumula kila chinyama pagati, akavika musafu zivili kila chipandi kulolana na chiyaki, nambu videge avidumwili lepi. 11 Mambanga gegilya nyama gakatula panani ya nyama, ndi Abulahamu akagavinga.

12 Pelatipimi lilanga, Abulahamu akagona tipitipi, wogoyu na chitita ng'ong'ololo vikamugubika. 13 Penapo Bambu akamjovela Abulahamu, "Umaya chakaka kuvya chiveleku chaku yati chitama ngati vayehe pamulima wewangavya wavi, yati vivya vavanda na kung'aiswa lukumbi lwa miyaka miya mcheche. 14 Pamonga na ago yati nikuvabuna vandu vevakuvakita vene kuvya vavanda, pamwishu yati vihuma kwenuko na vindu vyamahele. 15 Nambu veve yati utama magono gamahele na kufwa kwa uteke na kuzikwa kwa utopesa. 16 Chiveleku chaku cha mcheche ndi yati chiwuya penapa, ndava mabudilu ga Vaamoli gakona gangakamilika."

17 Pelatipimi lilanga chiviga cha motu chechihuka lyohi na lumuli lweluyaka motu vikapita pagati ya vinyama vila. 18 Ligono lila Bambu akakita lilaganu na Abulahamu, akajova, "Chiveleku chaku nivapelili mulima uwu, kuhumila mfuleni wa Misili mbaka mfuleni wula uvaha wa Fulati, 19 pamonga na milima ya Vakeni na Vakenizi na Vakadimoni, 20 Vahiti na Vapelizi na Valefai, 21 Vaamoli na Vakanaani na Vagiligashi na Vayebusi."