1 Isaka avii mgogolo na mihu gaki gakoywiki. Kangi akamkemela Esau mwana waki muvaha, akamjovela, "Mwana wangu." Akayangula.

"Ena dadi, nivi apa."

2 Isaka akajova, "Hinu nene namugogolo na nimanyili lepi ligono la kufwa kwangu. 3 Hinu, tola upindi na mbeta yakuvikila migoha yaku, uambayi kudasi ukanizingila chinyama. 4 Unitendelekelayi chakulya chechinoga ngati chenikuchigane nene chila, uniletelayi nilyayi, muni nihotola kukumotisa kwakona nangafwa."

5 Penapo Lebeka akayuwana malovi gala Isaka geamujovelayi Esau mwana waki. Esau peawukili kuhamba kudasi kuzingila na kuleta chinyama, 6 Lebeka akamjovela Yakobo mwana waki, "Nimuyuwini dadi waku akumjovela muhaja waku Esau, 7 ‘Niletelayi nyama ya kudasi na unitendelekelayi chakulya chabwina, muni alyayi, na ahotola kumumotisa kwakona angafwa.’ 8 Wamwana, wangu," Hinu uyuwanilayi bwina malovi gangu na ukitayi chenikujovela. 9 Hambayi kuchivaya katola mipapakasi ya mene hivili yehivii yabwina, muni nimutendelekelayi dadi waku chakulya chabwina ngati cheigana. 10 Ndi umupelekela dadi waku alyayi na ahotola kukumotisa kwakona angafwa.

11 Nambu Yakobo akamjovela Lebeka nyina waki, "Kumbuka mlongo wangu Esau anamayunju muhiga, na nene nivii nagu lepi mayunju. 12 Pangi dadi yati igana kunipamisa, na nene yati nivye ninamakehu kwaki, hinu yati nijigotolele likoto pahala pa mota."

13 Nyina waki akamjovela, "Likoto lenilo linikolela nene, kitayi ngati chenikujovela, hamba katola mipapakasi ya mene uniletelayi." 14 Yakobo akahamba akatola mipapakasi hivili, akampelekela nyina waki, nyina waki akateleka chakulya chechinoga ngati chila cheakuchigana dadi waki. 15 Penapo Lebeka akatola nyula yabwina ya Esau mwana waki muvaha yeavikayi mugati yaki, na akamuwalika Yakobo mwana waki mudebe. 16 Akamuwalika mewa chikumba cha mipapakasi ya mene mumawoko, na pandu panyilili muhingu yaki. 17 Ndi akampela Yakobo chakulya chila chechinoga mumawoko pamonga na libumunda lealitendelekili.

18 Yakobo akayingila kwa dadi waki, akamkemela, "Dadi!" Dadi akayidika.

"Ena! Veve ndi wayani wamwana wangu?"

19 Yakobo akamyangula dadi waki, "Nene na Esau namwana waku mvaha. Nikitili ngati chewanijovili, chondi uyimukayi utama ulyayi chenikahambili kuchizingila, muni unimotisayi."

20 Isaka akamkota mwana waki. "Wamwana wangu upatili kwoki kanyata naha?"

Yakobo akamyangula dadi waki, "Bambu, Chapanga waku anitangatili kupata kanyata."

21 Penapo Isaka akamjovela Yakobo, "Hinu hegelelayi wamwana wangu, muni nikupamisa nimanya kuvya veve ndi wamwana wangu Esau amala lepi." 22 Ndi Yakobo akamuhegelela Isaka dadi waki, akampamisa na akajova, "Lwami lwa mwana wangu Yakobo, nambu mawoko ndi mawoko ga Esau." 23 Amumanyili lepi, muni mawoko gaki gavii ganamayunju ngati ga Esau muhaja waki, ndi akamumotisa, 24 akamkota kangi, "Wu, chakaka veve ndi wamwana wangu Esau?"

Akayangula, "Ena ndi nene."

25 Kangi akajova, "Niletelayi nyama yeuzingili wamwana wangu nilya, muni nikumotisa." Pena Yakobo akamupelekela akalya, mewa akamupelekela na divayi akanywa. 26 Penapo dadi akamjovela, "Hinu hegelela papipi, unikumbatila wamwana wangu." 27 Yakobo akahegelela akamukumbatila, Isaka akayuwana unungalilu lwa nyula zaki, akamumotisa chakujova, "Lola mwana wangu chewinungalila bwina ngati unungalilu wa mugunda weawumotisi na Bambu Chapanga. 28 Nikumyupa Chapanga akuyitilayi mbetu wa kunani kwaki na ludaka lwabwina pamonga na mota ya pamulima, mabenu gamahele na divayi. 29 Vandu va milima yingi vakuhengelayi kangi vandu vamahele vakugundamila cha utopesa. Uvya wa chilongosi wa valongo vaku, na vana vagosi va nyina waku vakugundamilayi cha utopesa. Kila mweakupela likoto apewa likoto, kila mweakumotisa amotisiwayi!"

30 Isaka paamali kumotisa Yakobo, na mwene Yakobo peahumayi palongolo ya dadi waki, ndi akayingila Esau muhaja Yakobo ihuma mukuzingila. 31 Na mwene Esau akateleka chakulya chechinoga akamletela dadi waki, akamjovela, "Uyimukayi dadi ulyayi chenizingili nene namwana waku, muni uhotola kunimotisa."

32 Isaka akamkota, "Veve wayani?"

Akayangula, "Nene na Esau, mvelekanu waku mtumbulanu."

33 Isaka akandendema neju, akajova, "Yani mwenayula mweazingili na kuniletela nene? Na nene nimali kulya kwakona veve wangabwela, na nimumotisi, na mwene chakaka amali kumotiswa!"

34 Esau peayuwini malovi genago ga dadi waki, akavemba kwa lwami luvaha na cha mvinisu, na kumjovela dadi waki, "Chondi dadi unimotisayi na nene mewa!"

35 Nambu Isaka akajova, "Mulongo waku abwelili akanikonga, ndi atolili mota yaku."

36 Esau akajova, "Ndi mana ikemelewa Yakobo? Anikongi mala zivili. Hoti aninyagili uhali wangu ngati mtumbulanu kuvelekwa, na hinu atolili mota yangu!" Akamkota dadi waki, "Wu, wanisigalisili lepi mota yoyoha ndava yangu?"

37 Isaka akamyangula Esau, "Lola nimukitili Yakobo avya mtalalila waku, na valongo vaku voha vavyayi vatumisi vaki. Nimpelili mabenu na divayi. Nikitayi kyani ndava yaku mwana wangu, nihotola lepi kukukitila chochoha?"

38 Esau akamjovela dadi waki, "Nambu dadi, uvii nayu mota yimonga ndu? Dadi wangu, unimotisayi na nene!" Penapo Esau akavemba kwa lwami luvaha.

39 Ndi, Isaka akamyangula, akamjovela,

"Kutama yati kuvya patali na ndima yeyina ludaka lwa bwina,

Na yati uvya patali na mbetu wa kunani.

40 Cha utame kwa upanga waku.

Na veve yati ukumuhengela mulongo waku,

Nambu ukambela,

Yati uhuma mmawoko gaki."

41 Esau akamuvenga Yakobo ndava ya mota yeamumotisi dadi waki. Esau akaholalela, "Pegimalikayi magono ga malilu ga dadi wangu, ndi yati nimukome mbena wangu Yakobo."

42 Nambu Lebeka peayuwini maholo ga mwana waki muvaha, akamkemela Yakobo mwana waki mdebe, akamjovela, "Mulongo waku Esau igana kukukoma. 43 Hinu, wamwana wangu, kitayi chenikujovela. Tilalilayi kwa muhaja wangu Labani kula ku Halani. 44 Ukatamayi kwenuko mulukumbi, mbaka ligoga la muhaja waku pelipola. 45 Ligoga laki pelipolayi, na peikosewayi geumukitili, yati nileta mundu akuwuyisayi. Ndava kyani nyenye mwavoha mufwayi mwavavili kwa ligono limonga?"

46 Lebeka akamujovele Isaka, "Mumtima wangu musangaluka lepi ndava ya ava vadala va Esau Vahiti. Ngati na Yakobo akagegayi mdala muvasikana va Vahiti, wumi wangu yati uvya na chiyonjokesu choki?"