1 Hinu yikahumila njala yivaha pamulima wenuwo, yingi ndalindali ya yila yeyahumalili lukumbi lwa Ibulahimu. Isaka akahamba kwa Abimeleki nkosi wa Vafilisti, ku Gelali. 2 Bambu akamuhumila Isaka akamjovela, "Kotoka kuhamba ku Misili, nambu utama pamulima wenikujovelayi. 3 Tama pamulima wa uyehe kwa lukumbi ndu, nene yati nivya pamonga na veve na yati nikumotisa. Muni yati nikupela veve na viveleku vyaku milima yeniyi yoha na yati nitimilisa chilapu chenamulagizili dadi waku Ibulahimu. 4 Yati nikupela chiveleku chechivya chamahele ngati ndondo za kunani kumahundi, na viveleku vyaku yati nikuvipela milima yeniyi yoha. Kupitila viveleku vyaku vandu voha va pamulima yati vimotisiwa. 5 Yati nikukumotisa ndava Ibulahimu aniyidakili nene, akakita chenaganili na malagizu gangu pamonga na mihilu yangu."

6 Hinu Isaka akatama ku Gelali. 7 Vandu va pandu pala pevamukotili kumuvala mdala waki, akajova, "Mwenuyu ndi mlumbu wangu," Ayogwipi kujova kuvya mdala waki ndava ya kuyogopa kukomiwa na vandu va mulima wula, muni Lebeka avii anyambili neju. 8 Isaka peatamili kwenuko kwa lukumbi lwamahele, ligono limonga Abimeleki, nkosi wa Vafilisti, akalingulila palidilisa, akamuwona Isaka amunyambatili kuni akumpapaha mdala waki Lebeka. 9 Abimeleki akamkemela Isaka na akamjovela, "Kumbi uyu mdala waku! Mboni wanijovili mwenuyu mlumbu waku?"

Isaka akayangula, "Ndava nayogwipi kuvya nganikomiwi ngati nganijovili mdala wangu."

10 Pena Abimeleki akamkota, "Ndava kyani utikitili naha? Ngati mgosi mmonga pagati yitu ngaigonekana na mdala waku, penapo veve ngautikitili tete tivya mukubuda." 11 Ndi Abimeleki akavalagisa vandu voha akajova, "Mundu yoyoha mweakumpanisa mdala wa mgosi uyu, yati ikomiwa."

12 Isaka akamija mbeyu mumuli, mumwaka wuwowo akabena mala miya, ndava muni Chapanga amumotisi. 13 Isaka akavya na vindu vyamahele na vindu vyaki vikayendelela kuyonjoseka akavya na vindu vyamahele neju. 14 Avii na msambi wa mambele pamonga na ng'ombi na vavanda vamahele neju, mbaka Vafilisti vakamuwonela wihu. 15 Ndava yeniyo Vafilisti vakavihilalila viliva vyoha vyevyagimiwi na vavanda va Ibulahimu dadi waki peavi akona mumi.

16 Penapo Abimeleki akamjovela Isaka, "Wuka kwitu muni veve unavindu vyamahele na unamakakala neju kuliku tete." 17 Ndi Isaka akawuka kwenuko akatendekeha lindanda mulikemba la Gelali, akatama kwenuko. 18 Isaka akavihukula viliva vila vya manji vyevyagimiwi lukumbi Ibulahimu dadi waki akona mumi, viliva vyevyahilaliwi na Vafilisti lukumbi ndu Ibulahimu peafwili, akavikemela mahina galagala geavikemelayi dadi waki.

19 Vavanda va Isaka vakagima mulikemba lila ndi vakapata chiliva chechina chinyepa cha manji gegipupuma. 20 Nambu vadimaji va pa Gelali vajovisini na vadimaji va Isaka kuni vijova, "Manji aga gitu." Penapo Isaka akachikemela chiliva chila Eseki, muni vajovisini navu.

21 Vakagima kangi chiliva chingi, cheni mewa vakajovesana. Akachikemela Sitna. 22 Kangi Isaka akahamba pandu pangi na akagima chiliva chingi. Chenicho vajovasini lepi, ndi Isaka akachikemela Leoboti akajova, "Hinu Bambu Chapanga atilekili fwasi, na tete yati tinekenala mumulima uwu."

23 Akahuma kwenuko akahamba mbaka ku Beelisheba. 24 Kilu yilayila Bambu Chapanga akamuhumila akamjovela, "Nene ndi Bambu Chapanga wa dadi waku Ibulahimu, kotoka kuyogopa ndava nene nivii pamonga na veve, yati nikukumotisa na kuvayongesa viveleku vyaku ndava ya muhengaji wangu Ibulahimu." 25 Ndi kwenuko Isaka akajenga pandu pa maganga akamuyupa Bambu Chapanga. Kangi kwenuko akajenga lindanda, na vavanda vaki vakagima chiliva.

26 Lukumbi lwenulo Abimeleki akahuma ku Gelali pamonga na Ahuzati mkozi waki, na Fikoli mkulu wa manjolinjoli vaki vakamuhambila Isaka. 27 Isaka akavakota, "Ndava kyani mubwela kwa nene kuni nyenye mwanivengili na kunivinga kwinu?"

28 Vakajova, "Tamanyili chakaka kuvya Bambu Chapanga avii pamonga na veve. Hinu tiholalela kuvya yiganikiwa tivikayi chilapu pamonga na veve na tivikayi lilaganu na veve, 29 kuvya yati ukutihengela lepi gahakau, ngati tete chetalekili kukuhengela gahakau. Takuhengili gabwina, tikakuleka uhambayi cha uteke. Ndi hinu veve umotisiwi na Bambu Chapanga." 30 Penapo Isaka akavatendelekela mselebuko wa chakulya ndi vene vakalya na kunywa. 31 Chilau yaki vakayimuka lukela pehe pena vakavikilana chilapu. Pevamali Isaka akavahindikila na vene ndi vakahamba cha uteke.

32 Ligono lilalila vavanda va Isaka vakamubwelela vakamjovela kuchivala chiliva chila, ndi vakamjovela, "Tigapatili manji!" 33 Chiliva chenicho Isaka akachikemela Shiba, ndava yeniyo muji wenuwo ukemelewa Beelisheba.

34 Esau peavii na ntanga wa miyaka alubaini ndi akagega vadala vavili, Yudisi mwana wa Beeli na Basemati mwana wa Eloni. 35 Nambu Vadala venavo vavakitili Isaka na Lebeka vavyai na mvinisu.