1 Lukumbi lwenulo vandu voha va mulima valongelayi luga yimonga na valongelayi malovi galagala. 2 Hinu, yikavya vandu pevagendagendayi upandi welihumila lilanga, vahikili pamulima wa selede kwenuko ku Shinali, ndi vakatama. 3 Vakajovesana, "Mubwela, tifyatulayi matofali na kugayocha bwina." Vakahengela matofali pahali pa maganga, na lami pahali pa chokaa. 4 Ndi vakajova, "Na tijengayi muji na mnala utali wewihika kunani kumahundi muni timanyikana mulima woha muni tikotoka kupechengana pamulima."

5 Nambu Bambu akahelela muni alolayi muji na mnala wewajengewayi na vandu. 6 Bambu akajova, "Lola, vandu ava ndi mulima umonga wewilongela luga yimonga vatumbwili kukita naha, hinu kawaka lijambu loloha leviyidakilana kuhenga, langahotoleka kwavi. 7 Mubwela, tihelela na titumbuganayi kujova kwavi muni vakoto kuyuwanilana vene kwa vene." 8 Ndi Bambu akavapechengana kuhuma pandu pala na kuhamba pamulima woha, vene vakaleka kujenga muji wula. 9 Muji wenuwo vakaukemela Babeli, ndava muni kwenuko ndi Bambu kweatimbugini luga ya pamulima woha, na kuhuma kwenuko Bambu akavapechengana vandu pamilima yoha.

10 Vyenivi ndi viveleku vya Shemu. Miyaka yivili manji gamahele gegagubiki mulima pegamaliki, Shemu peavi na miyaka miya yimonga, ndi akamveleka Alifakisadi. 11 Peamali kumveleka Alifakisadi, Shemu atamili miyaka miya mhanu, ndi akaveleka vana vangi vagosi na vadala.

12 Lukumbi Alifakisadi peavi na miyaka selesini na mhanu, akamveleka Sela. 13 Alifakisadi peamali kumveleka Sela, Alifakisadi akatama miyaka miya mcheche na yidatu ndi akavya na vana vagosi na vadala.

14 Sela peavii na miyaka selasini, akamveleka Ebeli. 15 Sela peamalili kumveleka Ebeli akatama miyaka miya mcheche na yidatu, ndi akaveleka vana vangi vagosi na vadala.

16 Ebeli peavii na miyaka selasini na mcheche, akamveleka Pelegi. 17 Ebeli peamali kumveleka Pelegi, Ebeli akatama miyaka miya mcheche na selasini, ndi akaveleka vana vangi vagosi na vadala.

18 Pelegi peavili na miyaka selasini, akamveleka Leu. 19 Pelegi peamalili kumveleka Leu, Pelegi akatama miyaka miya yivili na tisa na akaveleka vana vangi vagosi na vadala.

20 Leu peavii na miyaka selasini na yivili, akamveleka Selugi. 21 Leu peamalii kumveleka Selugi, Leu akatama miyaka miya yivili na saba, akaveleka vana vangi vagosi na vadala.

22 Selugi peavii na miyaka selasini, ndi akamveleka Naholi. 23 Selugi peamali kumveleka Naholi, Selugi akatama miyaka miya yivili, akaveleka vana vagosi na vadala.

24 Naholi peavii na miyaka ishilini na tisa, akamveleka Tela. 25 Naholi peamali kumveleka Tela, Naholi akatama miyaka miya yimonga na kumi na tisa, akaveleka vana vagosi na vadala.

26 Tela peavi na miyaka sabini, akavaveleka Iblamu na Naholi na Halani.

27 Vyenivi ndi viveleku vya Tela. Tela amveliki Iblamu na Naholi na Halani. Halani amveliki Lutu. 28 Tela peavi akona mumi peavii itama ku Uli mulima wa Vakalidayo, Halani afwili kweavelikwi. 29 Iblamu na Naholi vakagega. Mdala wa Iblamu lihina laki Salai. Mdala wa Naholi lihina laki Milika. Milika na Isika vavii vana va Halani. 30 Salai avii lepi na mwana ndava avii ngaveleka.

31 Tela akavatola vana vaki Iblamu na Salai mkamwana wa waki na mjukulu vaki Lutu mweavi mwana wa Halani. Akawuka navu voha kuhuma ku Uli, mulima wa Vakalidayo, muni vahamba kumulima wa Kanaani. Nambu pevahikili ku Halani, vakatama. 32 Tela afwili ku Halani lukumbi peavii na miyaka miya yivili na mhanu.