1 Pagenago Yosefu akajoviwa kuvya dadi waki ndi mtamu, ndava yeniyo akavatola vana vaki vavili Manase na Efulaimu, akahamba nawu kwa dadi waki. 2 Yakobo peajoviwi kuvya mwana waki Yosefu abwelili kumlola, akajikangamisa kuyinuka, akatama pachitanda. 3 Yakobo akamjovela Yosefu, "Chapanga mweavi na Makakala anihumalili penakavili kula ku Luzu kumulima wa Kanaani, akanimotisa. 4 Anijovili, ‘Lola, yati nikupela vana vamahele, na vajukulu vaku yati vibwela kuvya milima yamahele. Na nene yati nikuvapela vajukulu vaku, vayitalalila magono goha gangali mwisu.’ "

5 Yakobo akayendelela kujova, "Vana vaku vavili veuvapatili apa pa Misili kwakona nangafwa, ndi vana vangu. Efulaimu na Manase yati vivya vangu ngati chevavili Lubeni na Simeoni. 6 Nambu vana veukuvapata mwanakandahi yati vivya vaku, na uhali wavi yati vakuupata kuhuma kwa vavili ava Efulaimu na Manase. 7 Penawuyili kuhuma Padani, kuni nivi ngolongondi Laheli afwili pamulima wa Kanaani petavili mulugendu takona tigenda, papipi kuhika Eflati. Ndava yeniyo namzikili kwenuko, pamuhana ya njila yeyihamba Efulati, ndi ukemiwa Betelehemu."

8 Isilaeli peavawene vana va Yosefu, akamkota, "Ava ndi vayani?"

9 Yosefu akamyangula dadi waki, "Ava ndi vana vangu veanipeli Chapanga penakavili kuni." Isilaeli akajova, "Chondi, uvaleta papipi nipata kuvamotisa."

10 Mihu ga Isilaeli galola lepi bwina ndava ya ugogolo. Hinu, Yosefu akavahegelesa vana vaki papipi na dadi waki, na mwene akavakumbatila kwa uganu. 11 Kangi Isilaeli akamjovela Yosefu, "Nahuvalili lepi kupalola pamihu paku kavili, nambu, kumbi, Chapanga anitangatili hati kuvalola vana vaku!" 12 Penapo Yosefu akavawusa vana vaki kuhuma mumafugamilu ga dadi waki, kangi akagundama kwa utopesa.

13 Yosefu akavatola vana vavili, Efulaimu muchiwoko chaki cha kulyela, kuyelekela muchiwoko cha kumangeya cha Isilaeli, na Manase muchiwoko chaki cha kumangeya, kuyelekela muchiwoko cha kulyela cha Isilaeli, akavahegelesa papipi na gogo wavi. 14 Nambu Isilaeli akagapisanisa mawoko gaki. Chiwoko chaki cha kulyela akachivika pamutu wa Efulaimu, mweavili mdebe, na chiwoko chaki cha kumangeya akachivika pamutu wa Manase, mweavii mvaha. 15 Ndi Isilaeli akammotisa Yosefu, akajova,

"Chapanga wa vadadi vangu Ibulahimu na Isaka Mwevamuyidakili muwumi wavi,

Chapanga mweanilongwisi muwumi wangu mbaka lelu, ndi avamotisa.

16 Na mtumu wa kunani kwa Chapanga mweanisangwili kuhuma mu mang'aiso goha, na avamotisa vasongolo ava!

Vakemiwa kwa lihina langu na kwa mahina ga vagogo vangu,

Ibulahimu na Isaka, na vavyayi na vana vamahele na vajukulu vamahele."

17 Yosefu peawene kuvya dadi waki avikili chiwoko chake cha kulyela pamutu wa Efulaimu aganiswi lepi. Hinu, akachitola chiwoko cha dadi waki, kuhuma pamutu wa Efulaimu achivika pamutu wa Manase. 18 Yosefu akamjovela dadi waki, "Lepi, dadi! Mwenuyu apa ndi mvelekewa wa kutumbula. Chondi, uvika chiwoko chaku cha kulyela pamutu waki."

19 Nambu dadi waki akabela, akajova, "Nimanyili, wa mwana wangu, nimanyili. Vana va Manase mewa yati vivya mulima uvaha na vevimanyikana neju. Pamonga na ago, mlongo waki mdebe yati ivya mkulu kuliku mwene, na vachiveleku vaki yati vivya milima yamahele."

20 Hinu, Isilaeli akavamotisa ligono lenilo, ijova, "Vaisilaeli yati vihengela mahina ginu kuvamotisa, yati vijova, ‘Chapanga akukitila gabwina ngati Efulaimu na Manase!’" Kwa kukita chenicho Isilaeli amvikili Efulaimu palongolo ya Manase.

21 Kangi Isilaeli akamjovela Yosefu, "Ngati chewiwona, nene nivi papipi kufwa. Pamonga na ago, Chapanga yati ivya pamonga na nyenye, na kuvawuyisa pamulima wa vadadi vinu. 22 Mewawa, nikupelili veve mlima wa Shekemu na nivapelili lepi valongo vaku, mulima wula weuna ludaka lwabwina wenavanyagili Vaamoli kwa kutovana navu kwa upanga wangu na nduta yangu."