1 Penapo pakutumbula Chapanga awumbili kunani na mulima. 2 Lukumbi lwenulo mulima wavii lepi ngati hinu na yangapambika. Kwavii na chitita chivaha chaugubiki manji geganyoliki gegagubiki mulima na Mpungu wa Chapanga ukayuvata panani ya manji. 3 Penapo Chapanga akajova, "Luvya lumuli." Ndi lumuli lukavya. 4 Chapanga akalola kuvya lumuli lwabwina. Ndi akabagula lumuli na chitita. 5 Mwene akakemela lumuli, "Muhi" na chitita "Kilu." Yikavya kimihi yikavya lukela, ligono la kutumbula.

6 Chapanga akajova, "Pavyayi na fwasi pagati ya manji kunani na manji ga pahi, gabagula manji kunani na manji pahi." 7 Kangi Chapanga akakita fwasi muni yibagula manji gegavili kunani ya fwasi yeniyo na pahi ya fwasi yeniyo. Yikavya chenicho. 8 Chapanga akayikemela fwasi yeniyo "Kunani kwa Chapanga." Yikavya kimihi yikavya lukela, ligono la pili.

9 Chapanga akajova, "Manji gegavili pahi ya fwasi yeniyo gayolana pandu pamonga na pandu payumu pawonekana." Yikavya chenicho. 10 Chapanga akakemela pandu payumu, "Ndima," Na makonganu ga manji gala akakemela, "Nyanja yivaha." Chapanga akalola kuvya chabwina. 11 Kangi akajova, "Ndima yimelesayi manyahi gegipambika mbeyu na mikongo yeyipambika matunda ndalindali gegana mbeyu," Yikavya chenicho. 12 Ndima yikamelesa manyahi, gegipambika mbeyu ndalindali na mikongo yeyipambika matunda gegana mbeyu ndalindali. Chapanga akalola kuvya ndi chabwina. 13 Yikavya kimihi yikavya lukela, ligono la datu.

14 Chapanga akajova, "Kuvya na milumuli kunani lubagula muhi na kilu, wenuwu ndi uvyayi ulangisu wa kulangisa lukumbi na lusenje na magono na miyaka, 15 ndi viyaka kunani na vilangasa mulima." Yikavya chenicho. 16 Chapanga, akakita milumuli yivaha yivili, lumuli luvaha ndi lilanga litalalilayi muhi na lumuli ludebe ndi mwehi lutalalilayi kilu, akawumba na ndondo. 17 Chapanga akahivika milumuli yeniyo kufwasi ya kunani kulihundi muni yilangasa mulima, 18 yitalalila muhi na kilu, na lubagula muhi na chitita. Chapanga akalola kuvya ndi chabwina. 19 Yikavya kimihi, yikavya lukela, ligono la mcheche.

20 Chapanga akajova, "Mumanji muvyayi na viumbi mumi vyamahele na videge vimbululuka kunani." 21 Ndi Chapanga akawumba viumbi vivaha vya munyanja yivaha na viumbi vingi vyoha ndalindali vyevitama mumi mumanji, na videge ndalindali vyevimbululuka, Chapanga akalola kuvya ndi chabwina. 22 Chapanga akavimotisa, akajova, "Muveleka, muyonjosekayi mugamemesayi manji ga nyanja yivaha, na videge viyonjosekayi pamulima." 23 Yikavya kimihi yikavya lukela, ligono la mhanu.

24 Chapanga akajova, "Ndima viumbi mumi ndalindali, hinyama ya kudimwa na hinyama ya kudahi na viumbi ndalindali vyevikwava." Yikavya chenicho. 25 Ndi Chapanga, akawumba vinyama vyoha ndalindali vya kudahi, ya kudimwa ndalindali na viumbi vyoha ndalindali vyevikwava pandima. Chapanga akalola kuvya ndi chabwina.

26 Kangi akajova, "Timuwumba mundu kwa luhumu lwitu, ngati chetivili tete, vakatalalila somba za munyanja yivaha na videge vya kunani na hinyama yoha ya kudimwa na mulima woha na viumbi vyoha vyevivikwava."

27 Ndi Chapanga akamuwumba mundu, kwa luhumu lwaki, avawumbili ngati cheavi mwene, amuwumbili mgosi na mdala.

28 Chapanga akavamotisa na kuvajovela, "Mvelekayi vana muyonjosekayi, mukaumemesa mulima uvya winu, muzitalalila somba ya munyanja yivaha, hidege vya kunani, na kila chiumbi chechivii na wumi chechigenda pandima."

29 Kangi Chapanga akajova, "Yuwanila, nivapeli kila chechimelili pamulima chechivi na mbeyu, na kila mkongo wewipambika matunda gegavi na mbeyu, ndi yati vivya vyakulya vinu. 30 Na hinyama yoha ya pamulima na videge vyoha na viumbi vyoha vyevikwava, kila chiumbi chechivi na wumi, vyakulya vyaki yati givya mahamba." Yikavya chenicho. 31 Chapanga akalola kila chindu cheachikitili ndi chabwina neju. Yikavya kimihi yikavya lukela, ligono la sita.