1 Hinu Ibulahimu akayendelela kulongolo kuhuma kwenuko mbaka kumulima welihumila lilanga wa Kaanani na kutama pagati ya Kadeshi na Shuli. Kwa lukumbi ndu atamili ku Gelali, 2 kwenuko Ibulahimu akajova kumvala mdala waki Sala, "Mwenuyu ndi mlumbu wangu." Kangi Abimeleki nkosi wa Gelali akalagiza vandu vamletela Sala, ndi akamtola. 3 Nambu Chapanga akambwelela Abimeleki mundoto lukumbi lwa kilu akamjovela, "Veve yati wifwa ndava ya mdala uyu mwemutolili, muni mwenuyu ndi mdala wa mundu."

4 Lukumbi lwenulo Abimeleki avii akona angagona na Sala, akayangula, "Bambu yati ukuvakoma vandu vangahoka? 5 Ibulahimu mwene ndi mweanijovili kuvya mwenuyu ndi mlumbu waki. Mewa hati Sala mwene ajovili kuvya Ibulahimu ndi mhaja waki! Nene nikitili chenikitili kwa mtima wabwina na nihokili lepi."

6 Hinu Chapanga akamjovela mundoto yeniyo, "Ena. Nimanyili kuvya ukitili chenichi kwa mtima wabwina, na nene nikudivalila ukotoka kukita gahakau, ndi muni nikuyidakili lepi ugona nayu. 7 Hinu umuwuyisa mdala uyu kwa mngwana waki. Ibulahimu ndi mlota, mwene yati akuyupila na veve yati wivya wilama. Nambu ngati umuwuyisi lepi, chakaka umanya kuvya veve yati wifwa pamonga na vandu vaku voha."

8 Chilau yaki akayimuka lukela pee, akavakemela vatumisi vaki voha, akavajovela malovi genago goha, na vene vakayogopa neju. 9 Ndi Abimeleki akamkemela Ibulahimu na akamkota, "Utikitili kyani? Nikubudili kyani mbaka uniletili misolo iyi nene na unkosi wangu? Unikitili mambu gangaganikiwa." 10 Abimeleki akamkota Ibulahimu, "Ndava kyani unikitili naha?"

11 Ibulahimu akayangula, "Naholalili kuvya, vandu va apa chakaka mkumuyogopa lepi Chapanga, na ngavanikomili ndava ya mdala wangu. 12 Pamonga na ago, chakaka mwenuyu mlumbu wangu. Mwene na nene tivelekiwi kwa dadi mmonga, nambu tivelekiwi lepi kwa mau mmonga, ndi mana nikamtola avyayi mdala wangu. 13 Lukumbi Chapanga peanipeliki kumulima wa uyehe kuhuma panyumba ya dadi wangu, namjovili mdala wangu, ‘Pandu popoha petihamba nilangisa uganu waku na kujova nene ndi namhaja wako!’ "

14 Kangi Abimeleki akatola mambelele na ng'ombi na vavanda va chigosi na vachidala akampela Ibulahimu, akamuwuyisa Sala kwa mngwana waki. 15 Kangi Abimeleki akamjovela Ibulahimu, "Lola mulima weuvi palongolo ndi wangu! Hinu, hagula pandu pewigana utama." 16 Mewa akamjovela Sala, "Nimpeli mhaja waku maganga ga feza hipandi alufu yimonga, ndava ya kuvalangisa voha vevavi pamonga na veve kuvya wangahoka, kila mundu yati imanya kuvya wangahoka."

17 Ndava ya gegahumalili kwa Sala mdala wa Ibulahimu, Chapanga adindili maleme ga voha vevavii munyumba ya Abimeleki vakoto kuveleka. 18 Kangi Ibulahimu akamuyupa Chapanga, ndi Chapanga akamlamisa Abimeleki na mdala waki na mvanda waki wa chidala hati vakahotola kuveleka vana kavili.