1 Ibulahimu akagega mdala yungi, mweikemelewa Ketula. 2 Mwenuyo amuvelekili vana ava, Zimlani na Yokishani na Medani na Midiani na Ishibaki na Shua. 3 Yokishani amuveliki Sheba na Dedani, viveleku vya Dedani vavii Vaashulu na Valetushi na Valeumi. 4 Vana va Midiani vavii Efa na Efeli na Hanoki na Abida na Elidaa, venavo voha vavii viveleku va Ketula.

5 Ibulahimu amugotolili Isaka kila chindu cheavii nachu. 6 Lukumbi Ibulahimu akona mumi akavapela njombi vana va chigosi va havala vaki. Kwakona angafwa akavapeleka upandi welihumila lilanga vatama kutali na Isaka.

7 Ibulahimu atamili miyaka miya yimonga sabini na mhanu. 8 Kangi Ibulahimu afwili peatamili miyaka yamahele ya uhotola, muugogolo waki, akapumulila pamonga na vagogo vaki vevamlongolili. 9 Vana va Isaka pamonga na va Ishimaeli vakamuzika mumbugu ya Makipela, papipi na Mamle mumgunda wewavii wa Efloni, mwana wa Sohali, kabila laki Muhiti. 10 Ibulahimu agulili mgunda kwa Vahiti. Mwenumo ndi mwene pamonga na mdala waki Sala vazikiwi. 11 Ibulahimu peamalili kufwa Chapanga ammotisi mwana waki Isaka. Na Isaka akatama papipi na chiliva cha Beeli Lahai Loi.

12 Ava ndi vana va Ishimaeli mwana wa Ibulahimu mweavelekiwi na Hajili mundu wa ku Misili mweavii yaya wa Sala, amvelekili Ibulahimu. 13 Mahina ga vana va Ishimaeli, gegayandikwi kulandana na chevavelekiwi, mweavili mtumbula ndi Nebayoti, vakalanda Kedali na Adibeeli na Mibisamu, 14 Mishima na Duma na Masa, 15 Hadadi na Tema na Yetuli na Nafishi na Kedema. 16 Venavo ndi vana va chigosi va Ishimaeli, na genago ndi mahina gavi. Vavi vachilongosi va makabila kumi na gavili mewawa mahina ago ndi gavii mahina ga pandu pevatamili na vijiji vyavi. 17 Ishimaeli afwili atamili kwa miyaka miya yimonga selasini na saba ndi afwili akagona pamonga na vagogo vaki. 18 Viveleku vya Ishimaeli vatamili pamulima pagati ya Hawila na Shuli, papipi na mbaka wa Misili, kuhamba ku Ashulu. Venavo vayelewini lepi na valongo vavi viveleku vya Ibulahimu.

19 Vyenivi ndi viveleku vya Isaka, mwana wa Ibulahimu. 20 Lukumbi Isaka peamgegili Lebeka mwana wa Betueli alameani kuhuma ku Padan Alamu mlumbu waki Labani, Isaka avii na miyaka alubaini. 21 Isaka peamgegili Lebeka kumbi Lebeka avii ngaveleka, nambu Isaka akamuyupa Bambu na Bambu akaludindula lutumbu lwa Lebeka na akavya na ndumbu. 22 Akavya na ndumbu ya mapaha, vana venavo vakang'ahana mulutumbu, Lebeka akajova, "Ndava kyani aga gihumila kwa nene?" Penapo akahamba kumkota Bambu.

23 Bambu akamyangula,

"Makabila gavili gavii mulutumbu lwaku,

Makabila gavili genago yati givya nakuyelewana tangiya mulutumbu lwaku.

Limonga yati livya na makakala kuliku lingi,

Mvaha yati akumuhengela mdebe."

24 Pegahikili magono gaki ga kuveleka, ndi Lebeka akaveleka vana vavili mapaha. 25 Mweatumbwili avii mdung'u na higa yaki yoha yamemili mayunju, ndi vakamkemela Esau. 26 Mwana wa pili avelikwi kuni chiwoko chaki amukamwili muyaki chinjekenjeke, penapo vakamkemela Yakobo. Lukumbi Lebeka akuvaveleka venavo Isaka avii na miyaka sitini.

27 Vana vakakula, Esau akavya mulumba mkekesi wa hinyama, mweigana kugendagenda kudasi, nambu Yakobo akavya mpoli, mweigana kutama panyumba. 28 Isaka amganili neju Esau ndava aganili neju kulya nyama za kudasi zeazangili Esau, nambu Lebeka amuganili Yakobo.

29 Ligono limonga Yakobo ateliki dengu, Esau akawuya kunyumba kuhuma kuzingila kuni avi na njala neju. 30 Ndi akamjovela Yakobo, "Njala yikunivina, chondi nipela chakulya chidung'u icho nilye." Ndi mana vamukemili Edomu mana yaki mudung'u.

31 Yakobo akamyangula, "Yati nikukupela ngati unipelili uvaha waku nivya mveleku mtumbulanu."

32 Esau akajova, "Lola! Nene nivili papipi kufwa, uvaha wa uveleku mtumbulanu yati ukunitangatila kyani?"

33 Yakobo akamjovela, "Nilapila hoti." Penapo Esau akamulapila, na kumgulisila Yakobo uvaha waki wa kutumbula kuvelekewa.

34 Penapo ndi Yakobo akampela Esau libumunda pamonga na msusi wa dengu, Esau akalya na kunywa, na akayinuka akawuka. Chenicho ndi Esau cheauvevisi uvaha wa uveleku waki utumbulanu.