1 Kangi Yosefu akamlagiza yula myimilila wa nyumba yaki. "Memesa magunila ga vandu ava chakulya chevihotola kugega, kangi uvika mashonga ga kila mundu mumlomo wa ligunila laki. 2 Kangi vika chikombi changu cha madini ga feza mumlomo wa ligunila la yula mdebe wa voha pamonga na mashonga gaki ga chakulya gaki." Ndi akakita ngati Yosefu cheajovili. 3 Kwapachili, vandu avo vakayidakiliwa kuwuka pamonga na punda zavi. 4 Kwakona vangahika kutali kuhuma kubomani, Yosefu akamjovela mtangatila waki, "Hinu naha uvalanda vala vandu, peukuvakolela, uvakota, ‘Ndava kyani mulipisi uhakahu kwa ubwina? 5 Ndava kyani muyivili chikombi cha mkulu wangu? Chenicho lepi cheinywela na kangi kuhengela kwa kulondola? Lijambu lenili lemhengili lihakau neju.’ "

6 Yula myimilila peavakolili akavajovela malovi aga. 7 Nambu vene vakamkota, "Bambu, uvi na mana yoki kutujovela malovi ngati ago? Tete vatumisi vaku katu tihotola lepi kukita lijambu ngati lenilo! 8 Kumbukayi, mkulu, mashonga getagakolili mumilomo ya magunila gitu tayiwuyisi kuhuma mulima wa Kanaani. Hinu yihotoleka wuli kavili tiyiva mashonga amala zahabu munyumba ya mkulu waku? 9 Hinu, ngati apatikini mmonga witu avi na chikombi chenicho, na akomiwa, na tete vangi voha yati tivya vavanda va mkulu vaku."

10 Myimilila yula akajova, "Ena, na yivya ngati chaujovili. Yeyoha mweipatikana na chikombi icho, yati ivya mvanda wangu, nambu vangi voha yati mwilekelewa." 11 Hinu, kila mmonga akahelesa kanyata ligunia laki pahi na kuliwopola. 12 Yula myimilila akagapekula magunila goha, itumbula kwa mvaha wavi na kumalisila na la mdebe neju. Chikombi chapatikini muligunia la Benyamini. 13 Penapo vakapapula nyula zavi kwa ngolongondi. Kila mmonga wavi akamgegesa punda waki mzigu waki, vakawuya kumujini.

14 Yuda na vahaja pevahikili nyumbani kwa Yosefu mwene avi bahapo, voha vakamgundamila pahi kwa utopesa. 15 Yosefu akavajovela, "Ndi lijambu gani lenili lemkitili? Mumanyi lepi kuvya mundu ngati nene ihotola kumanya kwa kulondola?"

16 Yuda akamyangula, "Tikujovela kyani mkulu? Tijova kyani kulangisa tibudili lepi? Chapanga agagubukwili mabudilu gitu, tete tavoha hinu ndi vavanda vaku tete pamonga na yula amweapatikini na chikombi."

17 Nambu Yosefu akajova, "Mwe! Nene nihotola lepi kukita chenicho! Yula ndu mweipatikana na chikombi changu ndi yati ivya mvanda vangu. Nyenye vangi voha muwuyayi kwa uteke kwa dadi winu."

18 Ndi Yuda akamhambila Yosefu na kumjovela, "Mkulu, nikuyupa, unimyidakila nene mtangatila waku, chondi mkulu wangu niyidakila nilongela padebe veve, nikuyupa neju ukoto kuniyomela nene mvanda waku, muni ukulu weuvi nawu uwanangana na Falao mwene. 19 Mkulu wavakotili vatumisi waku wu, dadi witu akona mumi na muvi na mlongo yungi? 20 Tete takuyangwili kuvya ‘Tivi na dadi, ndi mgogolo, na tivi na mbena witu yungi, mwenuyu dadi witu amvelikwi peavi mgogolo, mhaja waki afwili, na mwenuyo mdebe ndi nga mwene mweasigalili kwa nyina waki, na dadi witu akumgana neju msongolo uyo.’ 21 Mkulu watilagizi tete vatumisi vaku kumleta uyo mdebe witu muni umlola. 22 Takujovili kuvya uyo msongolo ihotola lepi kulekana na dadi waki, ndava akamleka dadi waki yati ifwa. 23 Nambu veve mkulu ukatijovela kuvya ngati tibwelili lepi na mlongo witu mdebe, yati mukunilola lepi pamihu pangu kavili."

24 "Petawuyili kunyumba kwa dadi, mtumisi waku, tamjovili gala geutilagizi. 25 Dadi witu atijovili, ‘Mhamba ku Misili mkagula chakulya chingi.’ 26 Nambu tamjovili, ‘Tihotola lepi kuhelela ku Misili mbaka tihamba mlongo witu mdebe. Ngati ihamba lepi na tete tihotola lepi kupokelewa na mundu yula.’ 27 Hinu dadi witu, mtumisi waku, atijovili, ‘Mumanyili kuvya mdala wangu Laheli anivelekili vana vavili: 28 Mmonga ayagili, na nene nikajova, "Chakaka apapuliwi hipandi hipandi na chinyama cha kudahi." Na nene nimuwene lepi kutumbula lukumbi lwenulo. 29 Ngati mukumtola mwenuyu mewa kuhuma kwangu, akapatwa na gahakau hinu, yati mukunikoma kwa mvinisu muugogolo wangu.’

30 Mkulu ndava yeniyo, nikamuwuyila dadi wangu mtumisi waku changali msongolo uyu, kuni wumi wa dadi wihuvalila wumi wa msongolo uyu, 31 akalola kuvya msongolo avi lepi pamonga na tete, yati ifwa! Chenicho tete vatumisi vaku, yati tikumkoma dadi witu kwa mvinisu wa muugogolo waki. 32 Mewawa, namtumisi waku namjovili dadi wangu kuvya yati nikumyangalila msongolo uyu, namjovili, ‘Ngati nimuyisi lepi Benyamini kwaku, mbunu uvya kwangu magono goha.’ 33 Hinu, veve mkulu, nikuyupa, nene mtumiosi waku, nisigalila, nivya mvanda waku pahala pa msongolo uyu. Mulekayi mwene awuyayi kunyumba pamonga na valongo vaki. 34 Hinu nihotola wuli kumuwuyila dadi wangu changali uyu msongolo? Nihotola lepi kukangamala kugalola mambu gahakau gegakumkolela dadi wangu."