1 Chapanga akammotisa Nuhu na vana vaki akavajovela, "Mvelekayi vana, mukaumemesa mulima. 2 Vinyama vyoha, videge vyoha na viumbi vyoha vyevikwava pandima na somba zoha za munyanja vigotoliwi mumawoko ginu, na vyene yati vikuvayogopa na kuvagaya. 3 Vinyama vyoha yati vivya chakulya chinu ngati chenivapeli makolo kuvya chakulya chinu. 4 Nambu katu mkoto kulya nyama yeyina ngasi, muni ngasi ndi wumi. 5 Ngati mundu yeyoha akamkomayi mundu yungi yati nikumbuna kwa kumkoma na ngati chinyama chikamkomayi mundu na chene yati nikuchikoma. 6 Mundu mweakumukoma muyaki, na mwene yati ikomiwa na vandu, muni mundu awumbiwi kwa kuwanangana na Chapanga.

7 Nyeye mveleka myonjoseka, mukaumemesa mulima."

8 Kangi Chapanga akamjovela Nuhu pamonga na vana vaki, 9 "Nivika lilaganu langu na nyenye, pamonga na viveleku vinu, 10 na viumbi vyoha vyevivii na wumi. Videge na hinyama ya kudimwa na hinyama ya kudasi, vyoha vyevyahumili musafina pamonga na nyenye. 11 Nivika lilaganu na nyenye, kuvya katu viumbi mumi yati vikomiwa lepi kwa manji gamahele gegagubiki mulima, amala yati yihumila lepi manji gamahele ga kuyigubika mulima kuvakoma vandu." 12 Chapanga akajova, "Wenuwu ndi ulangisu wa lilaganu lenikitili pagati yinu na nene na kwa kila chechivii na wumi na kwa viveleku vyoha vyevibwela. 13 Nivikili chipinga fula kulihundi, nawene yati uvya ulangisu wa lilaganu langu na mulima. 14 Yati yivya lukumbi lwoha penigubika mulima kwa mahundi, ndi chipinga fula yati chilolekane kumahundi, 15 yati nikumbuka lilaganu langu na nyenye na viumbi vyoha mumi. Katu manji yati gimema lepi kavili na kuugubika mulima muni kukomakesa mulima. 16 Lukumbi lwolwoha chipinga fula chepiwonekana kumahundi, yati nikuchilola na kukumbuka lilaganu langu na viumbi vyoha ndalindali vyevivi mumi pamulima." 17 Ndi Chapanga akamjovela Nuhu, "Wenuwo ndi ulangisu wa lilaganu lenivikili pagati yangu na viumbi vyoha vyevivi mumi pamulima."

18 Vana va Nuhu vevahumili musafina ndi Shemu na Hamu na Yafeti. Hamu ndi avii dadi wa Kanaani. 19 Venava ndi vevavii vana vadatu va Nuhu, ndava ya vene vandu vakamema pamulima.

20 Nuhu akatumbula kulima na akamija mizabibu. 21 Akanywa divayi, akagala, kangi akagona waka mulindanda laki. 22 Hamu dadi waki Kanaani ndi akamuwona dadi waki avii waka, akahuma kuvala na kuvajovela valongo vaki vavili. 23 Nambu Shemu na Yafeti vakatola nyula, na kujikoveka mumavega gavi, vakamhambila dadi wavi chimumbele na kumugubika dadi wavi kuni vilola kumuhana. Changali kulingulila waka wa dadi wavi. 24 Nuhu kugala pekwawukili kumutu, ndi akamanya cheamukitili mwana waki mdebe. 25 Akajova,

"Kanaani apewa likoto!

Yati ivya mvanda mdebe neju wa vavanda va valongo vaki."

26 Kavili akajova, "Amotisiwa Bambu Chapanga wa Shemu!

Kanaani avyayi mvanda waki.

27 Chapanga na amkwiha Yafeti!

Atama mumakuta ga Shemu!

Ndi Kanaani avya mvanda waki."

28 Pegamaliki manji gamahele kugubika mulima, Nuhu akatama miyaka miya yidatu na hamsini. 29 Miyaka yoha yeatamili Nuhu yavili miya tisa na hamsini, ndi afwili.