1 Ligono limonga Dina, mwana wa Yakobo na Lea, akahamba kuvagendelela vadala va mumulima wa Kanaani. 2 Shekemu mwana wa Hamoli Muhivi, mweavili mkulu wa mulima wenuwo, peamuwene Dina, akamtola na kumlimba. 3 Nambu Shekemu amuganili neju Dina mwana wa Yakobo, ndi akalongela naku cha kumubembelesa muni amugana. 4 Penapo Shekemu akalongela na Hamoli dadi waki, akamjovela, "Chondi, unigegelayi msikana avya mdala wangu."

5 Yakobo payuwini kuvya Shekemu avevisi Dina msikana waki, akaguna nuhu mbaka pevawuyili vana vaki vavii vakona kwevidima. 6 Pena Hamoli dadi waki Shekemu, akahamba kulongela na Yakobo. 7 Lukumbi lulwolwo vana va chigosi va Yakobo vawuyili kuhuma mukudima ndi pevayuwini chechihumalili, vakayoma na kumema ligoga, ndava Shekemu avakitili vandu va Isilaeli uhakau wa kugonekana na msikana wa Yakobo, muni lijambu lenilo labesiwi. 8 Nambu Hamoli akavajovela, "Mwana wangu Shekemu umuganili neju msikana winu, chondi mumupelayi amgege. 9 Hinu tipatanayi, tete tigega vasikana vinu na nyenye mugega vasikana vitu. 10 Nyenye muhotola kutama na tete, na muhotola kutama popoha pamulima uwu, muhotola kugulisa vindu na mupata vindu vyamahele."

11 Hinu Shekemukamjovela dadi wa Dina pamonga vahaja vaki, "Niyupa muniyidikila, na nene yati nikuvapela chochoha chemwigana. 12 Mnijovelayi malowola gogoha chemwigana na njombi yoyoha hati ngati yikavya yivaha, yati nikuvapela, ngati ndu munipelili msikana winu muni nimgega."

13 Hinu vana va Yakobo vakamyangula Shekemu na dadi waki Hamoli kwa udesi ndava Shekemu avii amali kumuhakasa mlumbu wavi Dina. 14 Vakavajovela, "Tihotola lepi kumugegesa mlumbu witu kwa mundu angadumuliwa jandu, kukita chindu chenicho yati tipata soni na kuveveswa. 15 Tihotola kuvayidakila kwa malagizu aga, muyidakili kuvya ngati tete, muvadumulayi jandu vagosi vinu voha vevavii kwinu. 16 Kangi yati mgega vasikana vitu na tete yati tigega vasikana vinu. Ndi yati titama na nyenye na tivya tavamonga. 17 Nambu ngati mwakabela kudumuliwa jandu, yati tikumutola mlumbu witu na kuwuka."

18 Hamoli na Shekemu vaganiswi na malagizu ago. 19 Ndi msongolo mwenuyo akakita kanyata kukita ngati chevajovili muni amuganili neju msikana wa Yakobo, Shekemu ndi akatopeswa neju kuliku voha vevavii munyumba ya dadi waki.

20 Hamoli na mwana waki Shekemu, vakahamba palimlyangu wa muji pandu pamngonganu wavi, vakalongela na vandu muji wavi. 21 Akajova, "Vandu ava vamkozi vitu, ndi tivakalibisayi vatama pamulima witu na vagulisayi vindu, muni tivi na mulima uvaha, ukutikola tete na vene. Tete tigega vasikana vavi na vene vagegayi vasikana vitu. 22 Nambu vene yati viyidakila kutama na tete na kuvya chindu chimonga kwa malagizu aga, kuvya tidumuliwayi jandu tavagosi tavoha ngati chevavili vene. 23 Wu, mwilola lepi mifuya yavi va vindu vyavi vyoha lepi yati vivya vitu? Manya tivayidakila ndu vatama pamonga na tete." 24 Ndi vagosi voha vevavili penapo palimlyangu wa kuyingilila ndi vakavayidakila Hamoli na mwana waki Shekemu, ndi vagosi voha vakadumuliwa jandu.

25 Pegamaliki magono gadatu, kuni vavi na mvinusu wa kudumuliwa jandu, vana vavili va Yakobo Simeoni na Lawi, vahaja vaki Dina, vakatola mapanga geganoliwi pandi zoha gavi vakauzangila muji chimfiyu na vakavakoma vagosi voha. 26 Vakamkoma Hamoli na mwana waki Shekemu kwa mapanga gavi, vakamutola Dina munyumba ya Shekemu vakawuka naku. 27 Pevamali kuvakoma ndi vana vangi va Yakobo vakabwela na kutola vindu vyoha kwa makakala mumlima wenuwo ndava vamuhakisi Dina mlumbu wavi. 28 Vakatola mambelele gavi, ng'ombi zavi na mapunda gavi pamonga na vyoha vyevyavili mumuji wenuwo na vyevyavii kumigunda. 29 Vakatola vindu vyavi vyoha, vana vavi voha na vadala vavi, na vyoha vyevyavili munyumba zavi.

30 Kangi Yakobo akavajovela Simeoni na Lawi, "Nyenye muniletili nene mang'aiso kwa kunikita nivengwa na vandu va mulima uwu wa Vakanaani na Vapelizi, nene ninavandu lepi vamahele, hinu ngati vayolini kubwela kunihanganila ndi yati vakunikoma nene pamonga na nyumba yangu."

31 Nambu vakamyangula, "Wu, yavii chabwina vamukitila mlumbu witu ngati mkemi?"