1 Yakobo akayuwana kuvya vana vagosi va Labani ving'ung'uta nakujova, "Yakobo ayivili vindu vyoha vya dadi witu, ndi mana ahotwili kuvya na vindu vyamahele." 2 Yakobo akalola kuvya Labani akumlola lepi bwina ngati cheyavili pakutumbula. 3 Bambu akamjovela Yakobo, "Wuyayi mbaka kunyumba ya dadi waku, na kwa valongo vaku na nene yati nivya pamonga na veve."

4 Yakobo akatuma vandu vahambayi kuvakemela Kaheli na Lea vabwelayi kudasi kweidima. 5 Yakobo akavajovela, "Niweni kuvya pamihu pa dadi winu pakunilola lepi ngati pakutumbula, nambu Chapanga wa dadi wangu avii pamonga na nene. 6 Na nyenye mumanyili kuvya nene nimuhengili dadi winu kwa makakala gangu goha. 7 Na dadi winu anikongili na ang'anamwiswi luhuna lwangu mala kumi, nambu Chapanga amlekili lepi anikitila uhakau. 8 Ngati akajova, ‘Yehina mabala hivyahi luhuna lwaku,’ hinu misambi yoha yababili yehina mabaka, na ngati ajovili, ‘Yehina madonyomadonyo hivyai luhuna lwaku,’ hinu misambi hyoha yababili yehina mabala. 9 Ndi Chapanga cheatolili mifuya ya dadi winu, akanipela nene."

10 "Palwahikili lukumbi lwa mifuya kuvya na mgegu ndi nikalota ndoto, mapongo goha gegakwela mbuguma zezina misitali na madonyomadonyo na mabala. 11 Ndi Mtumu wa Chapanga kajova na nene mu ndoto, akanikemela, ‘Yakobo.’ Nikamyangula, ‘Eee, nivi apa.’ 12 Akanijovela, ‘Lola mapongo goha gegikwela mbuguma gana misitali, madonyomadonyo na mabala. Ndava nigaweni mambu goha geakukitili Labani. 13 Nene ndi Chapanga mwenakuhumalili kula ku Beteli, kula kwewaliyitalili liganga mahuta ndava ya kulinyambisa na kulapa kwa nene. Hinu wukayi mumulima uwu uwuya kumulima wawaveliki.’"

14 Laheli na Lea vakamyangula Yakobo, "Wu, chisigalili chindu chochoha chechiganikiwa tete tichihala kwa dadi witu? 15 Mwene akutihengela tete ngati tavayehe, muni lepi atigulisi ndu, nambu mewa itumili chila cheapewili ndava yitu. 16 Chakaka vindu vyoha vyeanyagiwi na Chapanga vyenivyo ndi vitu tete pamonga na vana vitu, hinu chochoha cheakujovili Chapanga ndi ukitayi."

17 Ndi Yakobo akavakweha vana vaki pamonga na vadala vaki panani ya ngamiya vakawuka. 18 Akayilongolesa mifuya yoha palongolo yaki na vindu vyoha vyeapatili ku Padani Alamu, akatumbula kuwuya kwa dadi waki ku mulima wa Kanaani, pamonga na vana vaki na vadala vaki. 19 Labani ahambili kugadumula mangoma mambelele gaki, ndi Laheli akayiva michapanga ya dadi waki. 20 Yakobo akamukonga Labani, wa kabila la Vashami, kwakubela kumjovela kuvya iwuka. 21 Ndi Yakobo akatila pamonga na vindu vyoha vyeavili navyu, akayomboka mfuleni Fulati akahamba kumulima wa vidunda wa Gileadi.

22 Ligono la datu Labani akajovewa kuvya Yakobo atolwiki. 23 Ndi Labani akavatola valongo vaki va chigosi, vakamulanda Yakobo kwa lukumbi lwa magono saba, vakamukolela ku mulima wa kuvidunda wa Gileadi. 24 Nambu Chapanga akamuhumalila Labani mundoto akamjovela, "Jiyangalilayi, kotoka kumjovela chindu chochoha chila chechivii chabwina amala chihakau." 25 Yakobo avii ajengili lindanda kumulima wa vidunda vya Gileadi, Labani na valongo vaki vakajenga lindanda lavi penapo.

26 Kangi Labani akamjovela Yakobo, "Ndava kyani unikitili nene naha? Uvatolili na vasikana vangu ngati vavanda veuvakamwili kungondo? 27 Ndava kyani unitilili chinunu na kunikonga? Ndava kyani wanilagili lepi, muni nganikulagili chiluheku na nyimbu na ng'oma pamonga na kanjeke? 28 Ndava kyani waniyidakili lepi nivakumbatila vajukulu vangu na kuvalaga vasikana vangu? Chakaka ukiti uyimu! 29 Nivi na uhotola wa kukulemasa, nambu Chapanga wa dadi waku akanihumalili kilu ya lelu, akanijovela, ‘Jiyangalila! Kotoka kumjovela Yakobo linenu loloha lila lelivii labwina amala lihakau.’ 30 Nimanyili kuvya wanichengili ndava ya kunogela neju kuwuya kunyumba ya dadi waku. Hinu ndava kyani waniyivili na michapanga yangu?"

31 Yakobo akayangula Labani, "Nayogwipi kukulaga ndava naholalili kuvya ngauninyagili vasikana vaku. 32 Londayi wamwene na ukamukolelayi mundu yoyoha mweanamichapanga yaku akomewayi. Lolokehayi wamwene pagati ya vandu venivili navu na ngati ukachikolelayi chindu chaku tola." Yakobo amanyili lepi kuvya Laheli ayivili michapanga ya Labani.

33 Ndi Labani akayingila mulindanda la Yakobo na la Lea na la vavanda vavili vala kulonda michapanga, nambu aviweni lepi, ndi akahuma mulindanda la Lea akayingila mulindanda la Laheli. 34 Laheli ndi mweatolili michapanga yeniyo ndi akavihiha pahi ya misagamilu ya kutandikila ngamiya na mwene na akayitamila. Labani akalonda lindanda loha nambu aviweni lepi. 35 Pena Laheli akamjovela dadi waki, "Pepayi dadi kutoka kuniyomela nivii mumagono gangu ga mwehi ndi nihotola lepi kuyima nave uvii baha." Labani akalonda michapanga yaki nambu ayiwene lepi.

36 Ndi Yakobo akamuyomela Labani, akamjovela, "Kubuda kwangu ndi kwoki? Akamkojovela Labani, nihoki kyani mbaka ukunilandalila naha? 37 Hinu umalili kulingulila mumizigu yangu yoha ndi uchiwene kyani chamunyumba yaku? Chivikayi apa palongolo ya valongo vaku na valongo vangu, ndi vene vahamulayi pagati yitu. 38 Natamili na veve miyaka ishilini. Magono ago goha mambelele pamonga na mene yaleki lepi kubaba, ndi nalili lepi nyama ya mambelele gaku gagosi kuhuma mumifuya yaku. 39 Nakuletili lepi hati ligono limonga chinyama chaku chechikomiwi na hinyama ya kudasi, na chechakomiwi nene nakuwuyasili, na veve waganyi nikuwuyasila chochoha chechayiviwi kilu amala muhi. 40 Chenichi ndi chanatamili, muhi lilanga laniyakili na kilu mbepu yanibunili nagonili lepi hati padebe. 41 Chenichi ndi chenatamili kwaku miyaka yoha ishilini. Miyaka kumi na mcheche nakuhengili ndava ya vasikana vaku vavili, na miyaka sita nahuhengili ndava ya kupata mifuya yaku, nambu veve wang'anamwisi luhuna lwangu mala kumi. 42 Ngati Chapanga wa dadi wangu, na Chapanga wa Ibulahimu, na wogoyu wa Isaka ngavikotoka kuvya upandi wangu chakaka ngaunilekili nihamba mawoko gawaka. Nambu Chapanga agaweni mang'aiso gangu na lihengu lenihengili kwa mawoko gangu ndi mana akulakalili kilu ya lelu."

43 Penapo Labani akamyangula Yakobo, "Vadala ava ndi vana vangu, na vana vavii ndi vajukulu vangu, na vinyama ivi ndi vinyama vyangu, na vyoha vyeuvii navyu ndi vyangu. Nambu nene nihotola kukita kyani lelu kwa vana vangu pamonga na vana vevavaveliki, 44 hinu tikitayi lilaganu pagati yaku na nene, livyayi chindu cha kutikumbusa chetilagini."

45 Ndi Yakobo akatola liganga na akaliyimamisa ngati lipanda. 46 Yakobo akavajovela valongo vaki, "Mnonga maganga." Vakanonga maganga vakagavika palilundu, ndi vakalya chakulya papipi na lilundu lenilo. 47 Lilundu lenilo Labani akalikemela Yegali Sahaduta nambu Yakobo akakemela Galedi. 48 Labani akamjovela Yakobo, "Lilundu ili la maganga yati livya ukumbuso wa malaganu gitu." Ndi mana Yakobo akalikemela Galedi. 49 Mewawa Labani akajova, "Bambu Chapanga ndi atilolayi hati tikavya kutali nene na veve." Mewawa pandu pala pakemiwi Mizipa. 50 Labani akayendela kujova, "Ngati ukavang'aha vasikana vangu amala ukagega vadala vangi, hati ngati tivii kutali ngambukukayi kuvya Chapanga ndi mweilola pagati yitu." 51 Labani akamjovela Yakobo, "Lolai lilundu ili la maganga na lipanda leniliyimiki pagati yaku na nene. 52 Lilundu ili na lipanda lenili ndi yati vikutikumbusa, yati kuyomboka lepi lilundu ili na lipanda kubwela upandi waku kukulemasa mewa na veve yati uyomboka lepi lilundu ili na lipanda ili kubwela kunilemasa. 53 Chapanga wa Ibulahimu na Chapanga wa Naholi na Chapanga ihamula pagati yitu." Kangi Yakobo akalapa kwa Chapanga wa Isaka dadi waki kukamula malaganu genago. 54 Yakobo akawusa teta ya kuhinja kuchitumbi na akavagongolela valongo vaki vabwelayi kulya chakulya, pevamalili kulya vakagona baho kilu yeniyo. 55 Chilau yaki lukela pehe, Labani akavakumbatila vajukulu vaki na vasikana vaki akavamotisa, kangi Labani akawuya kunyumba yaki.