1 Bambu Chapanga akamjovela Nuhu, "Yingilayi musafina veve pamonga na chiveleku chaku choha, muni pagati ya vandu voha vevitama mumi hinu, nikuweni veve ndu ndi mweukuniganisa. 2 Utola vinyama vyevivili vyabwina palongolo yangu, chigosi na chidala, saba saba. Mewawa tola hinyama yangavya yabwina palongolo yangu, chigosi na chidala chimonga chimonga. 3 Mewa utola videge saba saba ndalindali vyevivii vyabwina, chigosi na chidala, ndava ya kuvivika mumi pamulima. 4 Pegimalika magono saba yati nitonyesa fula pamulima magono alubaini muhi na kilu, na kila cheniwumbili chechivii mumi yati nikuchikomakesa." 5 Nuhu akakita goha ngati chealagaziwi na Bambu.

6 Lukumbi manji pegamemili pamulima. Nuhu avii na miyaka miya sita. 7 Vakayingila musafina Nuhu na mdala waki na vana vaki pamonga na vadala vavi ndava vajisangula na manji gamahele. 8 Na hinyama yabwina palongolo ya Chapanga na yangavya yabwina na videge na vyoha vyevikwava pandima, 9 vivili vivili chigosi na chidala, vikayingila musafina pamonga na Nuhu, ngati chealagaziwi na Chapanga. 10 Pegamaliki magono saba, manji gakamema pamulima.

11 Nuhu peavii na miyaka miya sita, muligono la kumi na saba la mwehi wa mbili, ligono lenilo vinyepa vyoha mbaka vyehivii pahi neju hikahumisa manji, na kunani kwa Chapanga kukadinduka ngati madilisa na fula yivaha yikatonya. 12 Fula yikatonya pamulima lukumbi lwa magono alubaini muhi na kilu. 13 Ligono lilolo fula peyatumbwili kutonya, Nuhu na mdala waki, vana vaki Shemu na Hamu na Yafeti pamonga na vadala vavi vakayingila musafina. 14 Vene vayingili pamonga na vinyama ndalindali vya kudasi na vinyama vyevidimwa na vyoha vyevyikwava na videge ndalindali. 15 Viumbi vivili vivili vyoha vyevivi mumi vikabwela kwa Nuhu vikayingili mugati ya safina pamonga na Nuhu. 16 Vikayingila ngati Chapanga cheamlagizi Nuhu. Kangi Bambu akamdindalila mugati.

17 Manji gamahele gakayonjoseka kumema pamulima lukumbi lwa magono alubaini. Manji gakayonjoseka mbaka kuyinyakula safina. 18 Manji gakayonjoseka neju pamulima na safina yikayevela panani ya manji. 19 Manji genago gakavya gamahele neju pamulima hati gakagubika vitumbi vitali vyoha vya pamulima. 20 Manji gakayonjoseka kumema gakagubika hitumbi, utali wa mita saba. 21 Viumbi vyoha vyevyavili mumi pamulima vikafwa. Videge na hinyama ya kudimwa na hinyama ya mdasi na misambi ya viumbi vyoha vya pandumba na vandu voha vakafwa. 22 Kila chiumbi chechavili pandumba chechikeka chafwili. 23 Chapanga avikomili vyoha vyevivili mumi pamulima, vandu na hinyama na viumbi vyevikwava na videge. Vyoha vyakomakiswi pamulima. Asigalili Nuhu ndu pamonga na vala vevavili nayu mugati ya safina. 24 Manji genago gasigalili gaugubiki mulima lukumbi lwa magono miya na hamsini.