1 Vyenivi ndi viveleku vya Esau mewawa ikemiwa Edomu. 2 Esau agegili vadala kuhuma kwa Vakanaani, Ada msikana wa Eloni wa likabila la Vahiti, Oholibama msikana wa Ana, mjukulu wa Sibeoni wa likabila la Vahivi, 3 na Basemati, msikana wa Ishimaeli mlongo waki Nebayoti. 4 Ada akamvelekela Esau mwana mgosi mweakemiwi Elifazi na Basemati amuveliki Leueli. 5 Oholibama amvelekili Esau vana vagosi Yeushi na Yalamu na Kola. Venava ndi vana va Esau vavelekiwi peavi ku Kanaani.

6 Esau akavatola vadala vaki, vana vaki va chigosi na vachidala na voha vevavili munyumba yaki pamonga na mifuya yaki na hinyama yaki yoha na vindu vayaki vyoha vyeavipatili ku Kanaani, akahamalila mulima wewuvii patali na mlongo waki Yakobo. 7 Awukili kwenuko ndava mulima wevatamayi mwene na Yakobo yavi yidebe kwa vene kutama pamonga, vavi na mifuya yamahele na vahotwili lepi kutama pamonga. 8 Kangi Esau akahamba kutama ku Seili mulima weuna vidunda, lihina lingi la Esau ndi lavii Edomu.

9 Vyenivi ndi viveleku vya Esau, dadi wavi Vaedomu vevatamili kumulima wa vidunda vya Seili. 10 Aga ndi mahina ga vana va Esau, Elifazi, mweavelekiwi na Ada mdala wa Esau. Leueli mwana waki Besemati mdala wa Esau. 11 Vana va chigosi va Elifazi ndi vavii Temani na Omali na Sefo na Gatamu na Kenazi. 12 Elifazi mwana wa Esau mewa avii na ngati mdala waki lihina laki Timna. Mwenuyu amvelekili mwana lihina laki Amaleki. Genaga ndi mahina ga Ada mdala wa Esau. 13 Na ava ndi vana va Leueli, Nahati na Zela na Shama na Miza.

Venavo vavii vana va Basemati mdala wa Esau.

14 Oholibama mdala wa Esau, mweavi mwana wa Ana, mjukulu wa Sibeoni, amvelekili Esau vana vadatu vachigosi, Yeushi na Yalamu na Kola.

15 Ava ndi vevavili manduna pagati ya uveleku wa Esau, ndi Elifazi, mweavili mmwana mtumbula wa Esau, vavii manduna va Lukolo lwa Temani na lukolo lwa Omali na lukolo lwa Sefo na lukolo lwa Kenazi, 16 Kola na Gatamu na Amaleki. Venava ndi vevavili manduna va lukolo lwelwahumili kwa Elifazi ku mulima wa Edomu, venava vavii vajukulu va Ada.

17 Leueli, mwana waki Esau, avaveliki Nahati na Zela na Shama na Miza kila mmonga avii nduna wa likabila laki. Voha venavo ndi vana vachigosi va Leueli kumulima wa Edomu, na vene vavii vajukulu va Basemati, mdala wa Esau.

18 Vana vachigosi va Oholibama mdala waki Esau, vavii Yeushi na Yalamu na Kola, kila mmonga avili nduna wa lukolo lwaki. Venavo ndi vana va Oholibama mwana wa Ana, mdala waki Esau. 19 Venavo ndi vana va Esau yani Edomu, na venavo ndi vavii manduna va lukolo lwavi.

20 Ava ndi vana va Seili, lukolo lwa Mholi, mkolonjinji wa mulima wula, venavo ndi Latani na Shobali na Sibeoni, na Ana, 21 Dishoni na Eseli na Dishani. Venava ndi vana va Seili vevahumili ku Edomu vevavili manduna va Vaholi pa mulima wa Edomu.

22 Vana va Latani vavii Holi na Hemani na mlumbu waki Lotani akameliwi Timna.

23 Vana va Shobali vavii, Alivani na Manahati na Ebali na Shefo na Onamu.

24 Vana va Sibeoni vavii, Aiya na Ana. Ana ndi yula mweachiweni chinyepa cha manji ga moto kulugangatu, peadimayi mapunda ga Sibeoni dadi waki. 25 Vana va Ana vavii, Dishoni na Oholibama, Oholibama avii msikana wa Ana. 26 Vana va Dishoni vavii, Hemudani na Eshibani na Itilani na Kelani.

27 Vana va Eseli vavii, Bilihani na Zaawani na Akani.

28 Vana va Dishani vavii, Usi na Alani.

29 Ava ndi vavii manduna va lukolo lwa Vaholi na Lotani na Shobali na Sibeoni na Ana, 30 Dishoni na Eseli na Dishani. Venava ndi vavii manduna va lukolo Vaholi, kulandana na lukolo lwavi kumulima wa Seili.

31 Ava ndi vankosi vevatalalili pamulima wa Edomu kwakona angatalalila nkosi yoyoha pa Isilaeli. 32 Bela mwana wa Beoli avii nkosi wa mulima wa Edomu, na lihina likulu la muji waki ndi Dinihaba. 33 Peafwili Bela, Yobabu mwana wa Zela kuhuma kumulima wa Bosila akavya nkosi. 34 Peafwili Yobabu, Hushamu kuhuma mulima wa Vatemani akavya nkosi. 35 Peafwili Hushamu, Hadadi mwana wa Bedadi, mwavahotwili Vamidiani kumulima wa Vamoabu akavya nkosi. Muji waki wavii Aviti. 36 Peafwili Hadadi, Samula kuhuma mulima Masileka akavya nkosi. 37 Peafwili Samula, Shauli kuhuma muji wa Lehoboti weuvii papipi na mfuleni Eufulate, akavya nkosi. 38 Peafwili Shauli, Baali Hanani mwana wa Akiboli, akavya nkosi. 39 Peafwili Baali Hanani mwana wa Akiboli, Hadadi akavya nkosi. ndi muji waki ukakemelewa Pau. Mdala waki akemiwi Mehetabeli, msikana wa Matiledi, mjukulu wa Mezahabu.

40 Genago ndi mahina ga manduna gegahumalili muchiveleku cha Esau, kulandana na lukolo lwavi na miji yevahumili na milima yavi, vene ndi Timna na Aliva na Yeteti, 41 Oholibama na Ela na Pinoni, 42 Kenazi na Temani na Mibusali, 43 Magidieli na Ilamu. Venavo ndi manduna va mulima wa Edomu. Vamanyikini kulandana na pandu pevatamili. Esau ndi dadi wa lukolo lwa vandu va ku Edomu.