1 Genago ndi mahina ga viveleku vya Adamu ngati chegayandikwi. Ligono lila Chapanga peamuwumbili mundu kwa luhumu lwaki. 2 avawumbili ngati cheavi mwene, amuwumbili mgosi na mdala, kangi akavamotisa na kavapela lihina "Vandu." 3 Adamu peavii na miyaka miya yimonga na selasini, akaveleka mwana mweawanini naku mweavili ngati mwene, akamkemela Sesi. 4 Peamalili kumveleka Sesi, Adamu akatama miyaka miya nane, ndi akaveleka vana vagosi na vadala. 5 Miyaka yoha yeatamili Adamu yavi miya tisa na selasini ndi afwili.

6 Sesi peavili na miyaka miya yimonga na mhanu, akamveleka mwana mgosi akamkemela Enoki. 7 Sesi akatama miyaka miya nane na saba, akaveleka vana, vagosi na vadala. 8 Miyaka yoha yeatamili Sesi yavili miya tisa na kumi na yivili ndi afwili.

9 Enoki peavili na miyaka tisini, akamveleka Kenani. 10 Peamalili kumveleka Kenani, Enoki akatama miyaka miya nane na kumi na mhanu, ndi akavya na vana vagosi na vadala. 11 Miyaka yoha yeatamili Enoki yavili miyaka miya tisa na mhanu ndi afwili.

12 Na Kenani peavili na miyaka sabini, ndi akamveleka Mahalaleli. 13 Peamalili kumveleka Mahalaleli, Kenani akatama miyaka miya nane na alubaini, akaveleka vana vagosi na vadala. 14 Miyaka yoha yeatamili Kenani yavili miyaka miya tisa na kumi ndi afwili.

15 Mahalaleli peavili miyaka sitini na mhanu, ndi akamveleka Yaledi. 16 Peamalili kumveleka Yaledi, Mahalaleli akatama miyaka miya nane na selasini, akaveleka vana vagosi na vadala. 17 Miyaka yoha yeatamili Mahalaleli yavili miya nane tisini na mhanu, ndi afwili.

18 Yaledi peavili na miyaka miya yimonga sitini na yivili, ndi akamveleka Enoki. 19 Peamali kumveleka Enoki, Yaledi akatama miyaka miya nane, na mwene akavya na vana vagosi na vadala. 20 Miyaka yoha yeatamili Yeledi yavili miya tisa sitini na yivili ndi afwili.

21 Enoki peavili na miyaka sitini na mhanu, ndi akamveleka Metusela. 22 Enoki atamili kwa kumganisa Chapanga. Peamalili kumveleka Metusela, akatama miyaka miya yidatu na akaveleka vana vagosi na vadala. 23 Miyaka yoha yeatamili Enoki yavili miya yidatu sitini na mhanu. 24 Enoki atamili kwa kumganisa Chapanga, ndi awonikini lepi kavili, ndava Chapanga amtolili.

25 Lukumbi Metusela peavili na miyaka miya yimonga semanini na saba, ndi akamveleka Lameki. 26 Peamalili kumveleka Lameki, Metusela atamili miyaka miya saba semanini na yivili ndi akaveleka vana vagosi na vadala. 27 Miyaka yoha yeatamili Metusela yavili miyaka miya tisa na sitini na tisa ndi afwili.

28 Lukumbi Lameki peavili na miyaka miya yimonga semanini na yivili, akaveleka mwana mgosi. 29 Mwana mwenuyu ndi akamkemela Nuhu, akajova, "Mwenuyu ndi mweakutipolesa mtima kwa lihengu litu na kwa mang'aiso ga mawoko gitu mu ndima yeyipewili likoto na Bambu Chapanga." 30 Lameki peamalii kumveleka Nuhu, akatama miyaka miya mhanu tisini na mhanu ndi akaveleka vana vangi vagosi na vadala. 31 Miyaka yoha yeatamili Lameki yavili miya saba sabini na saba ndi afwili.

32 Nuhu peavili na miyaka miya mhanu, akaveleka vana vadatu, Shemu na Hamu na Yafeti.