1 Adamu akagona na Eva mdala waki, Eva akapata ndumbu, akamveleka mwana mgosi mweamkemili Kaini, Eva akajova nipatili mwana kwa utangatila wa Bambu. 2 Kangi akamveleka mwana yungi wa chigosi akamkemela Abeli. Abeli avii mdima mambelele na Kaini avii mlimaji. 3 Ligono limonga, Kaini akaleta luteta kwa Chapanga lwa mabenu ga mumgunda. 4 Abeli na mwene akaleta hiveleku ya kutumbula ya hinyama yaki yehikulupalili akawusa luteta. Chapanga akaganiswa na Abeli na luluteta zaki, 5 nambu Chapanga aganiswi lepi na Kaini hati teta zaki. Kaini akayoma neju, kumihu kwaki kukakwinyana cha ligoga. 6 Bambu akamjovela Kaini, "Ndava kyani uvii na ligoga naha? Ndava kyani kumihu kwaku kukwinyini cha ligoga? 7 Wu, ukakitayi bwina yati uyidakiliwa lepi? Ngati wangakita bwina kumbudila Chapanga kukulindila pamlyangu, kugana kukukamula, nambu uganikiwa ukuhotola."

8 Kaini akamjovela Abeli mlongo waki, "Tihamba kumgunda." Ndi, pevavii kumgunda, Kaini akamzangila mlongo waki, akamkoma.

9 Bambu akamkota Kaini, "Avii koki mlongo waku Abeli?" Kaini akayangula, "Nene nimanyi lepi! Wu, nene namulonda wa mlongo wangu?"

10 Bambu akajova, "Ukitili kyani? Lwami lwa ngasi ya mlongo waku lukinivembela kuhuma pandima. 11 Hinu, upewili likoto! Na kuvingiwa kuhuma mundima yeyinywili ngasi ya mlongo wako ndi yeyidindwili mulomo kuyipokela ngasi yeniyo ya molongo waku mweumkomili. 12 Ukayilimayi ndima, yati yikupela lepi mabenu gaki. Yati uvya wamundu wa kulyunga lyunga, wangali pandu pa kutama pamulima."

13 Kaini akamjovela Bambu, "Mbunu wenuwu weunipelili livaha neju, nene nikulihotola lepi. 14 Lola, lelu univingili niwukayi pandima uwu na nivya patali na veve, na nene yati nivya na mundu wa kulyunga lyunga, mweangali pandu pa kutama pamulima, na mundu yoyoha mweakunilola yati akunikoma."

15 Bambu akamyangula, "Lepi. Ngati mundu yoyoha akakukomayi veve, yati ing'aiswa mala saba neju." Ndi Bambu akamuvika Kaini ulangisu ndava kila mundu mweakumlola Kaini akoto kumukoma. 16 Ndi Kaini akawuka palongolo ya Bambu, akatama pamulima weukemelewa Nodi, weuvii upandi welihumila lilanga wa Edeni.

17 Kaini akagona na mdala waki ndi akapata ndumbu vakaveleka mwana lihina laki Enoki. Kaini akajenga mulima na akaukemela Enoki lihina la mwana waki. 18 Enoki akaveleka mwana mgosi akamkemela Iladi, na Iladi akamuveleka Mehuyaeli, Mehuyaeli akamuveleka Mesushaeli, Mesushaeli akamuveleka Lameki. 19 Lameki agegili vadala vavii, mmonga lihina laki Ada na yungi ndi Sila. 20 Ada akamveleka Yabali, mwenuyo ndi dadi wa vadimaji vevitama mumandanda. 21 Mhaja waki ikemelewa Yubali, mwenuyo ndi avili dadi wa voha vevitova kanjeke na chitolilo. 22 Mewa Sila akamveleka Tubal Kaini, mweana lufumbu lwa vindu vya shaba na chuma. Naama avii mlumbu wa Tubal Kaini.

23 Lameki akavajovela vadala vaki,

"Nyenye mwavadala vangu Ada na Sila muniyuwanila genikuvajovela. Namkomili mundu ndava anilemisi, ena namkomili msongolo mwenuyu muni anivinisi.

24 Ngati Kaini yati ing'aiswa mala saba.

Chakaka Lameki yati ing'aiswa mala sabini na saba."

25 Adamu akagona kangi na mdala waki, akaveleka mwana, akamkemela Sesi, "Chapanga anipelili mwana pahala pa Abeli mweakomiwi na Kaini." 26 Sesi mewa akaveleka mwana mgosi akamkemela Enoki. Penapo ndi vandu pevatumbwili kumuyupa Bambu.