1 Yakobo akayendelela kutama ku mulima wa Kanaani, mweatamili dadi waki ngati myehe, 2 Wenuwu ndi ukokoso viveleku vya Yakobo.

Yosefu peavii na ntanga wa miyaka kumi na saba, peadimayi mifuya pamonga na vahaja vaki, vana va Biha na Zipa, vevavii ngati vadala va dadi waki. Yosefu avi ajovalelayik kwa dadi wavi gahakau gevikita vahaja vaki.

3 Isilaeli amuganili Yosefu kuliku vana vangi voha, ndava amveliki muugogolo waki, ndi akamutotela kanzu yabwina yitali. 4 Valongo vaki pevaweni dadi wavi akumugana neju Yosefu kuliku vene, vakamuvenga na vagani lepi kulongela naku bwina.

5 Kilu yimonga Yosefu akalota ndoto, nambu peavadandaulili valongo vaki ndi vakamuvenga neju. 6 Akavajovela, "Muyuwanilayi ndoto yenilotili. 7 Nalotili tavoha tavii kumugunda tikunga makinja ga muhono, balapala likinja langu likayima. Ndi makinja ginu goha gakatindila na kuligundamila likinja langu."

8 Vahaja vaki vakamjovela, "Wu, veve yati uvya wankosi witu? Wu, veve yati uvya wamukulu witu?" Penapo vakayongesa kumuvenga ndava ya ndoto yaki na malovi gaki.

9 Yosefu akalota ndoto yingi, ndi akavajoela vahaja vaki, akajova, "Muyuwanila nilotili ndoto yingi, lukumbi ulu lilanga na mwehi na ndondo kumi na monga vyanigundamila."

10 Peavajovili dadi waki na vahaja vaki ndoto yeniyo, ndi dadi waki akamlakalila akajova, "Ndoto gani iyi yeulotili? Wu, nyina waku na nene na valongo vaku ndi yati tibwela kukufugamila veve mbaka pai kwa utopesa?" 11 Vahaja vaki vakamuwonela wihu, nambu dadi waki akagavika kumutima.

12 Ligono limonga vahaja vaki Yosefu vakahamba papipi na Shekemu kudima mifuya ga dadi wavi. 13 Ndi Isilaeli akamjovela Yosefu, "Umanyili vahaja vaku vidima mifuya papipi na Shekemu. Hinu nigana nikutuma kwavi."

Yosefu akayangula, "Ena unitumayi."

14 Ndi akamjovela, "Uhambayi ukalolayi ngati vahaja vaku vavii bwina na mifuya ngati hivii bwina ndi ubwe unikokoselayi." Yosefu akawuka mulikemba la Hebuloni.

Akahika ku Shekemu. 15 Mundu mmonga akamukolela ityalatyala mudasi ndi akamkota, "Ulonda kyani?"

16 Yosefu akayangula, "Nikuvalonda vahaja vangu, Chondi uhotola kunilangisa kwevidimila?"

17 Mundu yula akayangula, "Vawukili apa, muni nikavayuwini vijova, ‘Tihamba ku Dotani.’" Penapo akavalandalila vahaja vaki akahamba kuvakolela ku Dotani.

18 Vahaja vaki vamuweni kuhumila kutali, kwakona angavahegelela ndi vakayidakilana kumukoma. 19 Vakajovesana, "Lola! Yula mlota ndoto ibwela. 20 Mubwelayi timukomayi, na timutagayi mulilindi limonga pagati ya malindi aga. Kangi tete yati tijova aliwi na chinyama cha mdasi. Ndi yati tilola ndoto zaki yati zivya wuli."

21 Lubeni peayuwini genago, akalinga kumusangula kuhuma mumawoko gavi akajova, "Tikotoka kumukoma. 22 Tikotoka kuyita ngasi, mumutagayi mulilindi limonga lelivili penapa, nambu tikotoka kumlemasa." Lubeni alongili genago muni amusangulayi mumawoko gavi na amuwuyisayi kwa dadi waki. 23 Yosefu peavahikalili kwa vahaja vaki, vakamuhula kwa makakala kanzu yila yitali yabwina. 24 Kangi vakamukamula vakamutagila mulilindi, lilindi lila lavii waka na lavi lepi na manji.

25 Pevatamili kulya chakulya, vakauwona msambi wa vachuuzi va lukolo lwa Ishimaeli vevavili mulugendu kuhuma ku Gileadi vihamba ku Misili. Ngamiya zavi zagegili ndwika za ubani, uvumba na manemane. 26 Yuda akavajovela valongo vaki, "Yati tipata chiyonjokesu choki ndava ya kumukoma mulongo witu na kuhiha lifwa laki? 27 Mbanga timugulisayi kwa ava Vaishimaeli, tikotokayi kumlemasa muni pamonga na naha mwenuyu mulongo witu, mwenuyu na tete tavana va dadi mumonga." Valongo vaki vakamyidakila. 28 Vachuuzi va chi Midiani pevahikili penapo, valongo vaki vakamuhumisa Yosefu kuhuma mulilindi mula, vakamugulisa kwava Vaishimaeli kwa hipandi ishilini vya madini ga feza, kisha vakahamba naku Kumisili.

29 Leubeni peawuyili palilindi lila, amuwene lepi Yosefu, ndi akapapula nyula zaki kwa mvinisu. 30 Akawuya kwa valongo vaki, akavajovela, "Msonmgolo avii lepi mulilindi mula! Hinu nikita kyani?"

31 Ndi vakahinja mene, vakayitola kanzu ya Yosefu vakayijwiga mungasi yeniyo. 32 Kangi vakamupelekela dadi wavi kanzu yila, vakamjovela, "Tiyinongili kanzu iyi. Hinu yilolayi ngati ya mwana waku amala lepi?"

33 Dadi wavi akayimanya kanzu yila akajova, "Yeniyi ndi kanzu ya mwana wangu Yosefu, chakaka mwana wangu aliwi na chinyama cha kudasi! Yosefu apapuliwi hipandi hipandi." 34 Penapo Yakobo akapapula nyula yaki kwa mvinisu, akawala ligunila, akamuvembela mwana waki kwa magono gamahele. 35 Vana vaki va chigosi na va chidala vakabwela kumpolesa mtima nambu mwene akabela kupoleswa, akajova, "Munilekayi niyendelelayi kumuvembela mwana wangu mbaka na nene penifwa." Ndi dadi waki cheamuvembili.

36 Lukumbi lwenulo ku Misili kula, Vamidiani vakamugulisa Yosefu kwa mundu mweikemelewa Potifa, mmonga wa vakulu vevavii pahi ya Falao ndi mweavili mkulu wa msambi wa valonda.