1 Ndi Isilaeli akatola vindu vyaki vyoha akatumbula lugendu kuhamba ku Misili. Peahikili Beeli Sheba, akamuwusila luteta Chapanga wa Isaka, dadi waki. 2 Chapanga akalongela na Isilaeli mumaono kilu, akamkemela, "Yakobo! Yakobo!" Yakkabo akayidika, "Ee nikuyuwana."

3 Chapanga akamjovela, "Nene ndi Chapanga, Chapanga wa dadi waku. Ukoto kuyogopa kuhamba ku Misili, pewivya kwenuko, ndava muni yati nikukukita uvya mulima uvaha. 4 Nene namwene yati nihamba pamonga na veve kwenuko ku Misili na kukuwuyisa uku. Pewifwa, Yosefu yati ivya pamonga veve."

5 Hinu, Yakobo akawuka Beeli Sheba. Vana vaki vakamtola mwene na vana vavi vadebe pamonga na vadala vavi mumutuka zila yeapeliki Falao kumtola. 6 Vatolili mewa mifuya na vindu vyevapatili pamulima wa Kanaani, vakahamba ku Misili. Yakobo ahambili na vachiveleku vaki voha, 7 vana vaki na vajukulu va chigosi na vachidala, voha avaletili pamulima wa Misili.

8 Vachiveleku va Isilaeli vevahambili ku Misili pamonga nayu vavi Leubeni, mvelekwa waki mtumbula, 9 na vana va Leubeni vavi Henoki na Palu na Hesiloni na Kami. 10 Vana va Simeoni vavi Yemueli na Yamini na Ohadi na Yakini na Sohali na Shauli mweavelikwi na mdala Mkanaani. 11 Vana va Lawi vavi Gelishoni na Kohati pamonga na Melali. 12 Vana va Yuda vavi Eli na Onani na Shela na Pelesi na Zela. Nambu Eli na Onani vafwili kumulima wa Kanaani. Vana va Pelesi vavi Hesiloni na Hamuli. 13 Vana Isakali vavi Tola na Puva na Yashubu na Shimloni. 14 Vana va Zebuluni vavi Seledi na Eloni na Yaleeli. 15 Venavo ndi vana Lea amvelakili Yakobo kula Padan-alamu pamonga na Dina msikana waki. Jumula ya vacvhiveleku va Lea vavi selasini na vadatu.

16 Vana va Gadi vavi Sifioni na Hagi na Shuni na Esiboni na Eli na Alodi na Aleli. 17 Vana va Asheli vavi Imna na Ishiva na Ishivi na Belia na mlumbu wavi Sela. Na vana va Belia vavi Hebeli na Malkieli. 18 Ava kumi na sita ndi vavi ndi vajukulu va Yakobo na Zilipa, mvanda wa chidala Labani ampelili Lea, msikana waki.

19 Laheli amvelekili Yakobo vana vavili Yosefu na Benyamini. 20 Misili kula, Asenati msikana wa Potifela, mweavi mteta wa muji wa Oni, amvelekili Yosefu vana vavili Manase na Eflaimu. 21 Vana va Benyamini vavi Bela na Bekeli na Ashbeli na Gela na Naamani na Ehi na Loshi na Mupimu na Hupimu na Alidi. 22 Vandu ava kumi na mcheche ndi vana na vajukulu va Laheli veamvelekili Yakobo. 23 Mwana Dani avi Hushimu. 24 Vana va Nafutali vavi Yaseeli na Guni na Yeseli na Shilemu. 25 Venava saba ndi vana na vajukulu va Bilha mvanda wa chidala, veamvelekili Yakobo, yula Labani ampeli msikana waki Laheli.

26 Jumula ya vachiveleku va Yakobo veahambili nawu ku Misili, changali kuvavalanga vadala va vana vaki, vavi vandu sitini na sita. 27 Kula kumulima wa Misili Yosefu apatili vana vavili. Ndava yeniyo vandu voha va lukolo lwa Yakobo vevayingili mu Misili vavi sabini.

28 Yakobo akamlongolesa Yuda ahamba kwa Yosefu kumuyupa vakonganeka ku Gosheni, na vene pevahikili pamulima wa Gosheni, 29 Yosefu akakwela mutuka wewihutwaa na falasi, akahamba kumpokela Isilaeli, dadi waki, kula ku Gosheni. Peamhikili dadi waki, amkumbatili na kuvemba kwa lukumbi lutali. 30 Isilaeli akamjovela Yosefu, "Hati nikafwayi hinu chindu lepi ndava muni nipawene pamihu paku na kumanya kuvya veve wakona mumi!"

31 Kangi Yosefu akavajovela valongo vaki na vandu va munyumba ya dadi waki, "Nihamba kumjovela Falao kuvya valongo vangu na vandu va munyumba ya dadi wangu voha vevavi kumulima wa Kanaani vabwelili kwangu. 32 Yati nikumjovela kuvya nyenye ndi vadimaji muni mwidima mifuya, na kuvya mubweli pamonga na mambelele na mene na ng'ombi na vindu vinu vyoha. 33 Hinu, Falao akavakemela na kuvakota, ‘Lihengu linu ndi loki?’ 34 Mjova, ‘Mkulu, tete vatumisi vaku, ndi vafuya kuhuma uwana witu, ngati chevavili vagogo vitu,’ Mjova genago muni muyidikiliwayi kutama pamulima wa Gosheni." Yosefu ajovili chenicho ndava Vamisili vakuvavenga vadimaji.