ԵՍԱՅԻ 25

Փառաբանության երգ

1 Տե՛ր, Աստվա՛ծ իմ,

ես պիտի փառաբանեմ քեզ,

պիտի օրհնեմ քո անունը,

քանզի սքանչելի բաներ կատարեցիր՝

առաջին խորհուրդը ճշմարիտ։

Այո՛, Տե՛ր, 2 քաղաքները վերածեցիր հողաբլուրների,

բերդաքաղաքներն իրենց հիմքերից կործանեցիր.

թող ամբարիշտների քաղաքը հավիտենապես չվերաշինվի։

3 Դրա համար էլ աղքատ ժողովուրդը պիտի օրհնի քեզ,

զրկված մարդկանց քաղաքները պիտի օրհնեն քեզ,

4 որովհետև բոլոր խոնարհ քաղաքներին օգնական դարձար,

իսկ թշվառությունից տանջվածին՝ ապավինության հարկ՝

չար մարդկանցից փրկելով նրանց։

5 Դու ծարավածների համար ապավեն ես

և զրկված մարդկանց համար՝ ոգի։

Նմանվեցինք տկարացած մարդկանց՝ ծարաված Սիոնում,

ամբարիշտ մարդկանց պատճառով, որոնց ձեռքը մատնեցիր մեզ։

Տերը սրբում է արցունքները

6 Զորությունների Տերն այնպես պիտի անի,

որ բոլոր հեթանոսներն այս լեռան վրա ուրախություն վայելեն,

գինի խմեն,

օծվեն մրուրից մաքրված յուղով

7 և ընկղմվեն այս լեռան մեջ։

Պատմի՛ր սա բոլոր հեթանոսներին,

քանզի բոլոր ազգերի համար Տերն այս խորհուրդն ունի։

8 Մահը զորացավ և կուլ տվեց,

բայց Աստված բոլորի երեսից արցունքն իսպառ կտրեց,

ժողովրդի նախատինքը վերացրեց ամբողջ աշխարհից,

քանի որ սա Տիրոջ բերանը խոսեց.

ինչպես ամպի հովանին հաղթահարում է տապը,

այնպես էլ նա պիտի թուլացնի հզորների բազուկները։

9 Ու այն օրը պիտի ասեն.

«Ահա մեր Աստվածը, որի վրա հույս էինք դրել մենք,

նա պիտի փրկի մեզ, քանզի նա է Տերը, որին սպասում էինք.

ցնծանք և ուրախանանք մեր փրկությամբ»։

Աստված պատժում է Մովաբին

10 Աստված մեզ հանգիստ է պարգևելու այս լեռան վրա,

իսկ մովաբացին ոտքի կոխան պիտի լինի,

ինչպես որ կալն է ճզմվում կամնասայլի տակ։

11 Տերն իր ձեռքերը պիտի երկարի այնտեղ

և այդպես նրան պիտի թշվառացնի ու կործանի,

հողին պիտի հավասարեցնի նրա հպարտությունը՝

նրա վրա տարածելով իր ձեռքերը։

12 Քո ապաստանի պարիսպների բարձրությունը պիտի խոնարհեցնի՝

գետնին հավասարեցնելով այն։