1 Yi éli fa obɛɛn, yi éyoo bee, yi émwɛn bee me mviil, yi étal bee ngesɛ, bvool yi ékyɛɛl mviɔɔl ɛ̃ bee, eli Endɔɔ li elaã. 2 Elaã ésuo nzuru, bee émwɛn lɔ bvool eyɛɛn me ndɔɔ a lɔ. Obɔ otsɛn bɛn bee etsal byɛ nsia yi elaã li ɔ̃bu nkal ɔ̃bu li éli ola Taal bvool li ésuo nzuru ola bee. 3 Yi éyoo bee bvool yi émwɛn bee, bee eyɛɛn byɛ yɔ, kwɛn byɛ hɛ̃ ekal ye bvoo ye bee. Ŋ’esa oŋɔ̃, bvoo a bia-byɛ eli ye Taal, ye Muaan a ndɛ, Yeso Mãsiya. 4 Ãndɔɔ omɔ̃, bee, bee ekel mɔ̃ kwɛn esɛ e byɛ ekal ɔ̃koo.

5 Nsia yi éyoo bee ola Yeso Mãsia, bvool yi eyɛɛn bee byɛ, yɛn Nziã oli mwiĩ, empeel k’eli onse ndɛ wɛ. 6 Okɛɛn bia-byɛ ebeyɛɛn wɛn bia-byɛ eli ye bvoo ye ndɛ, kwɛn ŋɛn bia-byɛ ebedzuu onse empeel, bia-byɛ baal a mfya eli, bia-byɛ k’esa ãndɔɔ m’emfa ki etam otaa-taa wɛ. 7 Kɛn okɛɛn bia-byɛ edzuu onse mwiĩ onge b’eli ndyam onse mwiĩ, bia-byɛ eli bvoo ye bakyɛ, bvool ãkel ã Muaan a ndɛ Yeso ãsuɔɔl bia-byɛ m’obi bueel. 8 Okɛɛn bia-byɛ eyɛɛn wɛn bia-byɛ k’eli y’obi wɛ, bia-byɛ ŋ’epfuru ãnzuru ã bia-byam, bvool otaa-taa k’oli onse bia-byɛ wɛ. 9 Kɛn okɛɛn bia-byɛ ekiool ãbi ã bia-byɛ, Nziã oli wɛn k’akwɛɛn k’asa m’élieel ndɛ wɛ, bvool oli dzu. Obobɔ, ndɛ àdzeel ãbi ã bia-byɛ bvool àsuɔɔl bia-byɛ onse ãndɔɔ mam mbueel mɛn k’ãli dzu wɛ. 10 Okɛɛn bia-byɛ eyɛɛn wɛn bia-byɛ k’eli y’obi wɛ, bia-byɛ ŋ’epaal Nziã mbuul a mfya, bvool Endɔɔ e ndɛ k’eli onse bia-byɛ wɛ.