1 Ke mbee oŋɔ̃, Yeso oyɛn ongwel a baã li Ngalile, li ata hɛ̃ me Tibeliade. 2 Embuul e baal ékeluɛɛn a ndɛ, me ndɔɔ yɛn bɔ ákemwɛn emvieel bvi ékesa ndɛ m'anga-ãluu. 3 Yeso okam nkio. Oŋɔ̃, ndɛ obvi nsɛn y'ayio. 4 Ŋ'esa oŋɔ̃, pfuun li Onduru al'eyii tsotsoo. Olɔ pfuun li Ayuda. 5 Ŋ'eseel Yeso mviil, ndɛ omwɛn embuul e baal eyeya ola ndɛ. Ndɛ bu alieel Filipe ndiri: «Bia-byɛ amampa kwɛn èsuun bɔ, kwɛn baal ba abɔɔ ki-odza?» 6 Ndɛ ákeyɛɛn obobɔ me ndɔɔ yi akie ɔ̃kwal a Filipe, ke ngwel wɛ ndɛ ndyam ál'ayɛɛ b'ékeesa ndɛ. 7 Filipe obveel ndɛ ndiri: «Onkyam ŋ'esuun amampa ba nzi yi ãbvieel ɛ̃nkam mviaal (200), bɔ olɔ k'akoo kwɛn mbuul bwɛn a mbuul abɔɔ etsu-tswel wɛ.» 8 Andele wu muaan-ngoo a Simɔ̃ Piɛɛl, ngɔmɔ̃ onse ayio a ndɛ, olieel ndɛ bubu: 9 «Nsam a bɔɔl ngɔmɔ̃ oli y'amampa ataan ba ɔɔdze y'answi buaal. Bɔ ol'akoo m'ɔ̃bɔbɔ a baal wu?» 10 Yeso olieel bubu: «Emviaal baal nsɛn.» Bviĩ éli bvam bibi ke mboo oyɔ. Bɔ bu abvi nsɛn, abɔɔl nku-a-nku amiil ataan. 11 Yeso owel amampa, obveel Nziã ãtuɛɛn, bu akab baal b'áli oŋɔ̃. Ndɛ hɛ̃ okab bɔ answi, m'emfa ki édzii baal. 12 Ŋ'eyool baal, Yeso olieel ayio a ndɛ ndiri: «Etwal etswel bvi esiil, kwɛn eluɔ si-ngemɔ ebee nkel oyi.» 13 Bɔ atwel bvɛ, bu aluul etsaka kuun ye bviaal m'etswel bvi amampa ataan ba ɔɔdze, b'ésiil baal b'ádzi. 14 Ŋ'emwɛn baal emvieel bvi ési ndɛ, bɔ ayɛɛn ndiri: «Mbuul wu bam oli ɔ̃liaal-ɛ̃kiɛɛn a Nziã wu aya onse ɔ̃kiri.» 15 Onge bɛn Yeso áyɛɛ kwɛn baal ákeya ndɛ owal m'ãnkɔɔl m'osuul o ndɛ ɔ̃kwɛn, ndɛ bvool odzuru nzuru, oyɛn nkal nkio ndyam sii.

16 M'ãnkunkwal, ayio a ndɛ akwɛɛn tiil ke baã. 17 Bɔ asam onse ebɛɛ, me ndɔɔ yi ayi Kapelanahum, ongwel a baã. Empeel al'emeebva. Yeso ale kɛn ayi ola bɔ wɛ. 18 Mfel wa kokɔ oyii abop, epoo bu ebvi opɔɔn me baã. 19 Ke mbee a ŋɛn ayio al'amaadzoo nkɛɛ akilometele ataan wuo asɛɛn, bɔ ataal Yeso abedzuu nkal ãdza, bvool abesyal tsotsoo ebɛɛ: Bɔ ayoo buɔ. 20 Kɛn a ndɛ olieel bɔ ndiri: «Eli mɛ̃, ebee buɔ oyoo!» 21 Ŋ'eyii ebii k'eswɛɛl bɔ ndɛ onse ebɛɛ, kyɛ esiɛɛn ke mboo yi ékeyi bɔ.

22 Ela esiool, embuul e baal b'ásiil ongwel a baã, amwɛn kwɛn ebɛɛ éli kɛn a ngemɔ̃ oŋɔ̃, Yeso k'ásam onse kyɛ y'ayio wɛ, bɔ ayɛn bam sii. 23 Kɛn ebɛɛ bvikyɛ efi Tibeliade, tsotsoo a mboo yi édzi bɔ mampa, ke mbee a ŋ'ébveel Mfam ãtuɛɛn. 24 Ŋ'emwɛn embuul kwɛn, ekal Yeso, ekal ayio a ndɛ, wu áli oŋɔ̃ pyɛ, baal asam me bam onse ebɛɛ obvɛ, bu ayi Kapelanahum, m'obii o Yeso.

25 Bɔ amwɛn Yeso ongwel a baã, bu afuul ndɛ ndiri: «Rabbi, yɛ ŋã mpuanki yi?» 26 Ndɛ obveel bɔ ndiri: «Taa-taa bam, mɛ̃ eyɛɛn byɛ wɛn byɛ ebii mɛ̃, ke me ndɔɔ yi emwɛn byɛ emvieel wɛ, me ndɔɔ yɛn byɛ edzi amampa bvool eyool. 27 Ebee osal me ndɔɔ a bvi-odza bvi ebii, esal me ndɔɔ a bvi-odza bvi eyiil bvool ewa elaã li ɔ̃bu nkal ɔ̃bu, bvi ekieel ewa Muaan a mbuul byɛ. Ke ngwel wɛ, Nziã wu Taal osi ndɛ eliĩ ki omfam o ndɛ.» 28 Bɔ alieel ndɛ ndiri: «Bee emã esa m'osa b'ɛ̃sal ɛ̃ Nziã?» 29 Yeso obveel bɔ ndiri: «Ɔ̃sal a Nziã ŋ'elɔ byɛ okiool onse wu eyuɔɔl ndyam.» 30 Bɔ bu abveel ndɛ ndiri: «Obobɔ, emvieel emã kyɛn yɛ ndyam asa, kwɛn bee emwɛn bvool ekiool yɛ? Ki èsa yɛ emã? 31 Ankiɔɔn a bia-byɛ ádzi mane onse ɔ̃baan wa kɛɛ-kɛɛ, onge b'ákel ndiri: "Ndɛ áwi bɔ mampa wu ofi ywel."» 32 Yeso olieel bɔ ndiri: «Taa-taa bam, mɛ̃ eliaal byɛ wɛn, wu áwi byɛ mampa wa ywel ke Moyize wɛ, Tal a mɛ̃ wu awa byɛ mampa wa ywel wa taa-taa. 33 Ke ngwel wɛ, mampa a Nziã, eli wu ofi ywel m'owa b'ɔ̃kiri elaã.» 34 Bɔ ayɛɛn ndɛ ndiri: «Ɔ̃tee, wa bee mampa ondɛ ãlio mbueel.»

35 Yeso olieel bɔ ndiri: «Mɛ̃ bam ndi mampa wu elaã. Wu aya ola mɛ̃ k'ayoo nzal bam wɛ, bvool wu alɔ okiool onse mɛ̃ k'ayoo nzuaal yam wɛ. 36 Kɛn a mɛ̃ elieel byɛ yɔ: Byɛ emwɛn mɛ̃, byɛ k'ekiool mɛ̃ wɛ! 37 Baal bueel b'ewi Taal mɛ̃ àya ola mɛ̃. Mbuul wu aya ola mɛ̃, mɛ̃ k'ètswɛɛl ndɛ bam wɛ. 38 Ke ngwel wɛ, mɛ̃ mfi ywel, ke m'osa o b'edzii mɛ̃ wɛ, m'osa o b'edzii wu ayuɔɔl mɛ̃. 39 Kɛn a b'edzii wu ayuɔɔl mɛ̃ bɛn, mɛ̃ mbee mbuul si ngɔmɔ̃ onse b'ewi ndɛ mɛ̃ odzeel, kɛn a mɛ̃ èseel ndɛ me tsoo e ntɔ. 40 Ngwanyã, b'edzii tal a mɛ̃ bɛn, mbuul wueel wu omwɛn Muaan, bvool olɔ okiool onse ndɛ, akal y'elaã li ɔ̃bu nkal ɔ̃bu, bvool mɛ̃, mɛ̃ èseel ndɛ me tsoo e ntɔ.»

41 Ayuda ákeŋwaã me ndɔɔ a Yeso ke ngwel wɛ ndɛ áyɛɛn ndiri: «Mɛ̃ wu ndi mampa wu ofi ywel.» 42 Bɔ ákeyɛɛn ndiri: «Wu ke Yeso wu muaan a Dzedzef wu eyɛɛ bia-byɛ tal ye ngoo wɛ? Bɛn meba ndɛ atɔ m'oyɛɛn ndiri: "Mɛ̃ mfi ywel!"» 43 Yeso obveel bɔ ndiri: «Ebee obeŋwaã byam-a-byam! 44 Mbuul k'akoo m'oya ola mɛ̃ wɛ, okɛɛn Taal wu ayuɔɔl mɛ̃ k'adzuru ndɛ wɛ, bvool mɛ̃, mɛ̃ èseel ndɛ me tsoo e ntɔ. 45 Ákel onse ɛ̃nkaan mi aliaal-ɛ̃kiɛɛn a Nziã ndiri: "Nziã akieel ayiool bɔ bueel."✝ Mbuul ɔ̃bi pyɛ wu oyoo Taal bvool oyɔɔ m'eyiool ndɛ, aya ola mɛ̃. 46 Oŋɔ̃ ke ŋ'ayɛɛn ndiri mbuul omwɛn Taal wɛ. Wu omwɛn Taal, kɛn a wu ofi ola Nziã. 47 Taa-taa bam, mɛ̃ eyɛɛn byɛ wɛn, mbuul wu okiool oli y'elaã li ɔ̃bu nkal ɔ̃bu. 48 Mɛ̃ wu ndi mampa wu awa elaã. 49 Ankiɔɔn a byɛ ádzi mane onse ɔ̃baan wa kɛɛ-kɛɛ, kɛn a bɔ ámaakwa. 50 Kɛn a mampa wu, wu ofi ywel, wu adza ndɛ, k'àkwa wɛ. 51 Mɛ̃ wu ndi mampa wu omwiĩ wu ofi ywel. Mbuul wu adza mampa ondɛ, ndɛ akieel akal y'elaã li ɔ̃bu nkal ɔ̃bu. Mampa wu èwa mɛ̃, me ndɔɔ yɛn ɔ̃kiri akal y'elaã, eli nzuru a mɛ̃.»

52 Tsuun-a-tsuun bu abvi onse Ayuda bam-a-bam ndiri: «Ndɔɔ mã yi ewa ngaburu wu bia-byɛ nzuru a ndɛ odza?» 53 Yeso olieel bɔ ndiri: «Taa-taa bam, mɛ̃ eyɛɛn byɛ wɛn, okɛɛn byɛ k'edzi nzuru a Muaan a mbuul wɛ, okɛɛn byɛ hɛ̃ k'enywi ãkel ã ndɛ wɛ, ŋɛn byɛ k'ekal y'elaã wɛ. 54 Wu adza nzuru a mɛ̃, bvool anywã ãkel ã mɛ̃ oli y'elaã li ɔ̃bu nkal ɔ̃bu, bvool mɛ̃, mɛ̃ èseel ndɛ me tsoo e ntɔ. 55 Ke ngwel wɛ, nzuru a mɛ̃ eli bvi-odza bvi ngwanyã, ãkel ã mɛ̃ ãli eluɔ ki ngwanyã ki anywã. 56 Mbuul wu adza nzuru a mɛ̃, bvool anywã ãkel ã mɛ̃, akal onse mɛ̃, mɛ̃ hɛ̃ ekal onse ndɛ. 57 Emfa ngemɔ̃ kyɛn Taal wu oli mwiĩ oyuɔɔl mɛ̃, bvool kyɛn mɛ̃ ndi y'elaã me nkuul a ndɛ, emfa kiki hɛ̃ mbuul wu adza mɛ̃ akieel akal y'elaã me nkuul a mɛ̃. 58 Ki emfa ki eli mampa wu ofi ywel. Ndɛ k'ali onge mampa wu édzi ankɔɔ wɛ, wɛn bɔ, bɔ ákwi. Wu adza mampa wu akieel akal y'elaã li ɔ̃bu nkal ɔ̃bu.»

59 Omɔ̃ ãndɔɔ m'ékeyɛɛn Yeso ŋ'ékeyiool ndɛ onse nzɔ a ãbuɛɛn a Ayuda ke Kapelanahum.

60 Ŋ'eyoo ayio a ndɛ bibi ãyɛɛn ã ndɛ, bɔ ayɛɛn ndiri: «Oyɛɛn obɔ oli ye mpuru! Wɛn ol'okiool bɔ nã?» 61 Ŋ'eyɛɛ Yeso kwɛn ayio a ndɛ ákeŋwaã me ndɔɔ oyɔ, ndɛ olieel bɔ ndiri: «Oyɛɛn obɔ obii byɛ ɛ̃kwal? 62 Ke ŋ'emwɛn byɛ Muaan a mbuul anɔɔn ke mboo yi éli ndɛ tsɔɔn? 63 Wu awa elaã, eli Ɔ̃fel. Nzuru k'eli y'otsɛn wɛ. Ãyɛɛn mɛn mɛ̃ ndyam ngyɛɛn mɛ̃ byɛ ãfi ol'Ɔ̃fel, bvool mɔ̃ ãwa elaã. 64 Kɛn a baal bakyɛ onse byɛ k'akiool wɛ.» Ke ngwel wɛ, fa obɛɛn, Yeso áyɛɛ bɛn k'akaakiool wɛ, ye wu atiɔ ndɛ. 65 Ndɛ ákeyɛɛn ndiri: «Obɔ otsɛn b'eyɛɛn mɛ̃ byɛ wɛn, mbuul k'akoo m'oya ola mɛ̃ wɛ, okɛɛn Taal k'awi ndɛ nkuul wɛ.» 66 Me lio olɔ, ayio a ndɛ bibi ayiri ndɛ, k'abedzuu ye ndɛ wɛ. 67 Yeso bu alieel antam kuun ye buaal bubu: «Ke byɛ, byɛ hɛ̃ edzii k'eyi?» 68 Simɔ̃ Piɛɛl obveel ndɛ ndiri: «Mfam, bee ola nã èyi? Yɛ li y'ãyɛɛn m'ãwa elaã li ɔ̃bu nkal ɔ̃bu. 69 Bee, bee bam ekiool bvool eyɛɛ wɛn yɛ li mbuul wu Ɔ̃nsensal wu ofi ola Nziã.» 70 Yeso obveel bɔ ndiri: «Wu osueel byɛ, byɛ ange-kuun ye buaal, ke mɛ̃ wɛ? Kɛn a ngɔmɔ̃ onse byɛ oli Ɔ̃pfu.» 71 Ndɛ ákeyɛɛn me ndɔɔ a Yuda wu muaan a Simɔ̃ Isikaliot. Ke ngwel wɛ, ndɛ wu átiɔ ndɛ. Ndɛ wu Yuda áli ngɔmɔ̃ onse antam ange-nkuun ye buaal.