1 Ŋ'esiil ãtsoo ãsɛɛn m'abɛɛl pfuun li Onduru, Yeso oyi Betani, mboo yi éli Ladzaal wu éseel ndɛ onse b'ákwi-ákwi. 2 Okɔ, abɛɛl pfuun me ndɔɔ a Yeso. Maate ákekab bvi-odza. Ladzaal áli ngɔmɔ̃ onse baal b'áli ke misa ye ndɛ. 3 Obobɔ, Mali owel etswel e litele ki ãnasi mã naad m'ãywɛn a ɔ̃mfee. Ãnasi omɔ̃, ãli mã nzi bibi. Mali osɛɛn mɔ̃ me ntaã e Yeso, bvool oyieel yɔ me mfu e ndɛ. Nzɔ yueel bu eluul me nswel a ãnasi. 4 Yuda Isikaliot wu ngɔmɔ̃ onse ayio a Yeso, wu átiɔ ndɛ wu Yeso, oyɛɛn bubu: 5 «Otsɛn omã bɛn k'atiɔ ãnasi mã me nzi yi ãbvieel ɛ̃kam ɛ̃tyel (300), kwɛn awa yɔ aywal wɛ?» 6 Ndɛ ŋ'ákeyɛɛn obobɔ, ke me ndɔɔ yɛn ndɛ ákekɛɛ aywal nguo wɛ, me ndɔɔ yɛn ndɛ áli mbuul a pfuul, bvool me ndɔɔ yɛn ŋ'ékekwɛɛ ndɛ nkab, ndɛ áketuru nzi yi ákelɔ onse okɔ. 7 Kɛn a Yeso obveel ndɛ ndiri: «Yɔɔl ndɛ akwɛɛ ãnasi omɔ̃ me ndɔɔ a tsoo li àlɔ mɛ̃ onse mpiɛɛn. 8 Ke ngwel wɛ, aywal, byɛ èkal ye bɔ lio lueel. Kɛn a mɛ̃, byɛ k'èkal ye mɛ̃ lio lueel wɛ.»

9 Embuul ki Ayuda eyeyɛɛ kwɛn Yeso áli okɔ. Bɔ ayi, ke kɛn a me ndɔɔ a Yeso wɛ, me ndɔɔ yi amwɛn Ladzaal hɛ̃, wu éseel ndɛ onse b'ákwi-ákwi. 10 Obobɔ, angaa-a-Nziã b'anɛn akuru k'abam Ladzaal hɛ̃. 11 Ke ngwel wɛ, me ndɔɔ a ndɛ, Ayuda bibi átiɔ bɔ eboo, bvool ákelɔ okiool onse Yeso.

12 Ŋ'etsi bviil, embuul e baal b'áyi pfuun li Onduru ayoo ndiri Yeso ákeya Yelusalem. 13 Bɔ awel nsuɛɛn yi ãba, apal ke nkwel a ndɛ, abiool ndiri:

«Hodzana!

Yɔɔl kwɛn ondɔɔl o kuɔɔl okal y'Ɔ̃kwɛn a Isalayel wu aya me nkuũ a Mfam!»

14 Yeso omwɛn muaan-ane, bu abvi nsɛn nkal a ndɛ, onge b'ákel ndiri:

15 «Muaan wu ɔ̃kaal wa Siɔ̃, oyɛɛ ke bal wɛ: Mfam a yɛ àya,

obvi nsɛn nkal muaan-ane✝.»

16 Me lio olɔ, ayio a Yeso k'abɔɔ ndɔɔ oyɔ otsɛn wɛ, kɛn a ŋ'andɛɛl ndɛ onse lweel, bɔ ayeyeel ndiri ákel ãndɔɔ omɔ̃ me ndɔɔ a ndɛ, bvool ndiri bɔ ási mɔ̃ me ndɔɔ a ndɛ. 17 Embuul ki éli ye ndɛ ŋ'éti ndɛ Ladzaal mbel ke mpiɛɛn m'oseel o ndɛ onse b'ákwi-ákwi, atsweel ndɛ. 18 Obɔ otsɛn bɛn embuul eyemwɛɛn ye ndɛ, ke ngwel wɛ bɔ áyoo ndiri ndɛ ási emvieel okyɛ. 19 Afalisaye bu ayɛɛn bam-a-bam ndiri: «Byam oŋɔ̃ emwɛn wɛn byɛ ki ebesa pyɛ: Baal bueel ayii anɔɔn a ndɛ!»

20 Onse baal b'áyi Yelusalem m'olweel o Nziã me lio e pfuun li Onduru, éli y'Agelek ke kwɛ. 21 Bɔ asyel tsotsoo a Filipe, wu áli ɔ̃fi-ola bo Betesayida ke nsie yi Ngalile, alieel ndɛ ndiri: «Taal, bee edzii k'emwɛn Yeso.» 22 Filipe oyɛn oyeliaal Andel. Andel ye Filipe bu ayeliaal Yeso. 23 Yeso bu alieel bɔ ndiri: «Lio emeekoo lɛn ebvaan alweel Muaan a mbuul. 24 Taa-taa bam, mɛ̃ eyɛɛn byɛ wɛn, esia e bele k'ebvi me nsie, bvool ekwii wɛ, lɔ ekal lam-sii. Kɛn lɔ ekwa, lɔ eburu bibi. 25 Mbuul wu okuru nzuru m'elaã e ndɛ, aywɛn a lɔ, kɛn a ŋɛn mbuul obyel elaã e ndɛ onse ɔ̃kiri wu, ndɛ akieel akwɛɛ lɔ me ndɔɔ elaã li ɔ̃bu nkal ɔ̃bu. 26 Okɛɛn mbuul odzii k'asal me ndɔɔ a mɛ̃, yɔɔl kwɛn ndɛ aluɛɛn a mɛ̃. Mboo yi ndi mɛ̃, yi ekieel ekal ɔ̃sal a mɛ̃ hɛ̃. Okɛɛn mbuul odzii k'asal me ndɔɔ a mɛ̃, wu àlweel ndɛ Taal.»

27 «Meba ŋã, ɔ̃kwal a mɛ̃ obii. B'eyɛɛn mɛ̃ omã? Taal, paal mɛ̃ onse lio li. Kɛn obɔ otsɛn be ngyi mɛ̃ me lio li. 28 Taal, lweel nkuũ a yɛ!» Nkii bu efi ywel elieel bubu: «Mɛ̃ ndweel yɔ, mɛ̃ ekieel elweel yɔ bvool.» 29 Embuul e baal ki éli oŋɔ̃, bvool éyoo nkii oyɔ, ékeyɛɛn ndiri éli nzyel. Bakyɛ ákeyɛɛn ndiri: «Ãnzwel ãyɛɛn ye ndɛ!» 30 Yeso oyɛɛn ndiri: «Nkii oyɔ, ke me ndɔɔ a mɛ̃ eyɛɛn wɛ, yɔ me ndɔɔ a byɛ eyɛɛn. 31 Meba ŋã, àwa ɔ̃kiri wu etumbu, bvool meba ŋã, àtyal mfam wu ɔ̃bi wu ɔ̃kiri wu onkwel-a-nzi. 32 Mɛ̃, ŋ'akieel andɛɛl mɛ̃ ywel fa nsie, mɛ̃ ekieel edzuru baal bueel ola mɛ̃.» 33 M'oyɛɛn obɔ, Yeso ŋ'ákesuo emfa ki epfu li ekieel ekwa ndɛ. 34 Embuul e baal ebveel ndiri: «Bee bam eyoo kwɛn Ngel esuo wɛn Mãsia akieel akal ɔ̃bu. K'emfa emã kyɛn yɛ koo m'oyɛɛn wɛn: "Ebvaan andɛɛl Muaan a mbuul." Muaan a mbuul ondɛ ndyam nã?» 35 Yeso obveel bɔ ndiri: «Mwiĩ kɛn abebal onse byɛ me muaan-lio. Edzuu ŋ'eli byɛ kɛn me mwiĩ, kwɛn empeel ebee obva ola byɛ enseel. Ke ngwel wɛ, wu adzuu onse empeel k'ayɛɛ ku eyi ndɛ wɛ. 36 Ŋ'eli byɛ kɛn me mwiĩ, ekal y'okiool me mwiĩ, kwɛn byɛ ekɔɔl baan a mwiĩ.» Yeso ayeyɛɛn obobɔ, ndɛ oyɛn bu adziɔɔn lala ye bɔ.

37 Onkyam ŋɛn ndɛ ási emvieel bibi ke mviil ã bɔ, bɔ k'ákelɔ okiool o bɔ onse ndɛ wɛ. 38 M'emfa okyɛ, asi m'éyɛɛn ɔ̃liaal-ɛ̃kiɛɛn a Nziã Edzayi, ndiri:

«Mfam, wu okiool m'eyɛɛn bee nã?

Waan e Mfam Nziã ola nã áyɛɛl lɔ?»

39 Baal ba k'akoo m'okiool wɛ, ke ngwel wɛ Edzayi bvool áyɛɛn bubu:

40 «Ndɛ obam mviil ã bɔ, bvool owi bɔ ɔ̃kwal mpɛn,

Kwɛn bɔ abee omwɛn me mviil ã bɔ,

abee otsɛn okwaal m'ãyal ã bɔ,

bvool kwɛn bɔ abee ola mɛ̃ okɔɔl, me ndɔɔ yɛn mɛ̃ mboo bɔ✝.» 41 Edzayi oyɛɛn obobɔ, me ndɔɔ yɛn ndɛ omwɛn lweel o Yeso, ndɛ ákeyɛɛn me ndɔɔ a ndɛ.

42 Kɛn onse amfam, bibi alɔ okiool onse Yeso. Kɛn a me ndɔɔ afalisaye, bɔ k'ákiool ndɛ ke nkwel a baal wɛ: Bɔ ákebal owɛɛl atswɛɛl bɔ onse ãnzɔ m'ãbuɛɛn. 43 Ke ngwel wɛ, bɔ ádzii lweel li ewa baal, ke mboo a li ewa Nziã.

44 Yeso obiool kokɔ ndiri: «Mbuul wu olɔ okiool o ndɛ onse mɛ̃, ndɛ k'alɔ bɔ onse mɛ̃ wɛ, ndɛ olɔ bɔ onse wu oyuɔɔl mɛ̃. 45 Wu omwɛn mɛ̃, ŋ'amwɛn wu oyuɔɔl mɛ̃. 46 Mɛ̃ wu mwiĩ, mɛ̃ ngyi onse ɔ̃kiri, kwɛn wu olɔ okiool onse mɛ̃ abee onse empeel okal. 47 Ŋɛn mbuul oyoo ãyɛɛn ã mɛ̃, k'akwee mɔ̃ wɛ, mɛ̃ k'ewa ndɛ etumbu wɛ, ke ngwel wɛ mɛ̃ k'ɔ̃kiri me mbyel ngyi obam wɛ, mɛ̃ ɔ̃kiri ngyi obvuul. 48 Mbuul wu otiɔ mɛ̃ eboo, bvool k'ayɔɔ ãyɛɛn ã mɛ̃ wɛ, wu awa ndɛ etumbu Taal: Eyɛɛn li ngyɛɛn mɛ̃, èwa ndɛ etumbu me tsoo e ntɔ. 49 Ke ngwel wɛ, mɛ̃ ke ngyɛɛn me ndɔɔ a myam wɛ. Taal wu oyuɔɔl mɛ̃, ndyam wu otam mɛ̃ k'eyɛɛn, ye ndɔɔ yi èyɛɛn mɛ̃. 50 Mɛ̃ hɛ̃ ngyɛɛ wɛn otam o ndɛ oli elaã li ɔ̃bu nkal ɔ̃bu. Obobɔ, b'eyɛɛn mɛ̃ m'otam obɔ, mɛ̃ eyɛɛn bɔ m'emfa ki etam Taal mɛ̃ oyɛɛn.»