1 Yeso olieel ndiri: «Yɔɔl kwɛn ɛ̃kwal ɛ̃ byɛ ɛ̃bee obii. Elɔ okiool o byɛ onse Nziã, elɔ okiool o byɛ hɛ̃ onse mɛ̃. 2 Onse nzɔ a tal a mɛ̃, ãngwel m'ãnzɔ ãli bibi. Al'okɛɛn k'obobɔ wɛ, kɛn mɛ̃ ekeeyɛɛn byɛ wɛn mɛ̃ èyefaal byɛ ngwel-a-nzɔ? 3 Ke mbee a ŋe ngyɛn mɛ̃ byɛ mboo oyefaal, mɛ̃ èyebvool, mɛ̃ ewal byɛ eyekal ye myam, kwɛn mboo yi ndi mɛ̃ yam, byɛ hɛ̃, byɛ èkal oŋɔ̃. 4 Byɛ eyɛɛ nkuul yi ayi ku èyi mɛ̃.»

5 Toma ofuul ndɛ ndiri: «Mfam, ku eyi yɛ, bee k'eyɛɛ wɛ, oŋɔ̃ k'eyɛɛ bee nkuul yi ayi okɔ?» 6 Yeso obveel ndɛ bubu: «Wu oli nkuul mpi mɛ̃, wu oli otaa-taa mpi mɛ̃, wu oli elaã hɛ̃ mpi mɛ̃. Mbuul m'oyi ola Taal, obvie obwel me mɛ̃ ndyam. 7 Okɛɛn byɛ eyɛɛ mɛ̃, byɛ èyɛɛ Tal a mɛ̃ hɛ̃. Meba ŋã, byɛ eyɛɛ ndɛ, bvool byɛ emwɛn ndɛ.»

8 Filipe olieel ndɛ ndiri: «Mfam, suo bee Taal, oyɔ ndɔɔ yi eli bee ye kɔɔ e yɔ.» 9 Yeso obveel ndɛ ndiri: «Filipe, etel nziil ki ndi mɛ̃ ye byɛ, bɛn yɛ ke yɛɛ mɛ̃ wɛ? Wu omwɛn mɛ̃, ŋ'amwɛn Taal. Otsɛn omã bɛn yɛ ayɛɛn wɛn: "Suo bee Taal?" 10 Yɛ k'akiool wɛn mɛ̃ ndyam ndi onse Taal, Taal hɛ̃ oli onse mɛ̃ wɛ? Ãndɔɔ m'ebeyɛɛn mɛ̃ byɛ, mɛ̃ k'ebeyɛɛn mɔ̃ me myam wɛ, Taal wu oli onse mɛ̃, mbuul wu abesa ɛ̃sal ɛ̃ ndyam. 11 Elɔ okiool onse mɛ̃, mɛ̃ ndi onse Taal, bvool Taal oli onse mɛ̃. Okɛɛn k'obobɔ wɛ, ekiool onkyam me ndɔɔ ɛ̃sal mi emwɛn byɛ mɛ̃ esa. 12 Taa-taa bam, mɛ̃ eyɛɛn byɛ wɛn, mbuul wu olɔ okiool o ndɛ onse mɛ̃, ndɛ hɛ̃ akieel asa ɛ̃sal mi esa mɛ̃ ndyam. Ndɛ akieel asa myam mi onduru ɔ̃ndel, ke ngwel wɛ, mɛ̃ ndyam eyi ola Taal. 13 Mɛ̃ ekieel esa mbueel m'ekieel esɔɔ byɛ me nkuũ mɛ̃, kwɛn lweel e Taal emɔɔn me nkuul a Muaan. 14 Ŋɛn byɛ esɔɔ eluɔ ola mɛ̃, me nkuũ a mɛ̃, mɛ̃ ndyam èsa b'esɔɔ byɛ.»

15 «Okɛɛn byɛ edzii mɛ̃, byɛ ekieel esa m'etam mɛ̃ byɛ osa. 16 Obobɔ, mɛ̃ ekieel esɔɔ ola Taal, kwɛn ndɛ awa byɛ Ntwel ɔ̃kyam, kwɛn ndɛ akal ye byɛ ɔ̃bu. 17 Ntwel ondɛ eli Ɔ̃fel wu otaa-taa, wɛn ɔ̃kiri k'akoo m'oyɔɔ o ndɛ wɛ, me ndɔɔ yɛn ndɛ k'amwɛn ndɛ wɛ, bvool k'ayɛɛ ndɛ hɛ̃ wɛ. Kɛn a byɛ, byɛ eyɛɛ ndɛ, ke ngwel wɛ ndɛ oli tsotsoo ye byɛ, bvool ndɛ hɛ̃ akieel akal onse byɛ. 18 Mɛ̃ kieel k'esiil byɛ ensiaan wɛ, mɛ̃ ekieel eyebvool ola byɛ. 19 Me lio etsi-tsiri, ɔ̃kiri bvool k'àmwɛn mɛ̃ wɛ, kɛn a byɛ, byɛ ekieel emwɛn mɛ̃, ke ngwel wɛ mɛ̃ ndi mwiĩ, bvool byɛ hɛ̃, byɛ èkal mwiĩ. 20 Me tsoo olɔ, byɛ ekieel eyɛɛ wɛn mɛ̃ ndi onse Taal, onge b'eli byɛ onse mɛ̃, mɛ̃ hɛ̃ ndi onse byɛ. 21 Wu odzii mɛ̃, wu oli y'ãngel ã mɛ̃, bvool akiaal mɔ̃. Wu odzii mɛ̃, Taal a mɛ̃ àdzii ndɛ. Mɛ̃ hɛ̃ èdzii ndɛ bvool mɛ̃ èmɔɔn ola ndɛ.»

22 Yuda, wɛn wu Isikaliot wɛ, ofuul Yeso ndiri: «Mfam, otsɛn omã bɛn yɛ àmɔɔn ola bee, k'àmɔɔn ol'ɔ̃kiri wɛ?» 23 Yeso obveel ndɛ ndiri: «Okɛɛn mbuul odzii mɛ̃, ndɛ àkwɛɛ Endɔɔ e mɛ̃, bvool Tal a mɛ̃ àdzii ndɛ. Obobɔ, bee èya ola ndɛ, bvool bee etuu lɔ ola ndɛ. 24 Mbuul wɛn k'adzii mɛ̃ wɛ k'akwɛɛ ãndɔɔ ã mɛ̃ wɛ. Bvool Endɔɔ li eyoo byɛ, k'eli li mɛ̃ wɛ, eli li Taal wu oyuɔɔl mɛ̃. 25 Mɛ̃ ngyɛɛn byɛ ãndɔɔ mã ŋe ndi mɛ̃ kɛn ye byɛ. 26 Kɛn a Ntwel, Ɔ̃fel wu Ɔ̃nsensal, wu ekieel eyuɔɔl Taal me nkuũ a mɛ̃, akieel ayiool byɛ ãndɔɔ mbueel, bvool akieel ayeel byɛ mbueel me ngyɛɛn mɛ̃ byɛ.

27 Mɛ̃ nsiil byɛ opi. Mɛ̃ ngwi byɛ opi o mɛ̃. Mɛ̃ k'ewa byɛ onge b'ebewa ɔ̃kiri wɛ. Yɔɔl kwɛn ɔ̃kwal a byɛ abee abii, abee hɛ̃ ye buɔ okal! 28 Byɛ eyoo ke ngyɛɛn mɛ̃ byɛ wɛn: "Mɛ̃ èyi, bvool mɛ̃ èyebvool ola byɛ". Ŋɛn byɛ edzi mɛ̃, byɛ èsia mpal, me ndɔɔ yɛn mɛ̃ eyi ola Taal. Ke ngwel wɛ, Taal onduru mɛ̃. 29 Mɛ̃ ngyɛɛn byɛ ãndɔɔ omɔ̃ meba, ye k'eya mɔ̃, me ndɔɔ yɛn ŋ'ekieel eya mɔ̃, byɛ èkiool. 30 Mɛ̃ bvool k'ebeyɛɛn ye byɛ bibi wɛ, ke ngwel wɛ mfam ɔ̃kiri wu abeya. Ndɛ k'ali y'okwɛn nkal a mɛ̃ wɛ. 31 Kɛn ebvaan kwɛn ɔ̃kiri ayɛɛ ndiri mɛ̃ nzii Taal, bvool kwɛn mɛ̃ ebesa ãndɔɔ m'etam Taal mɛ̃ osa. Etɛɛn, bia-byɛ embal ŋã!»