1 Me tsoo li eyenge, m'epal-epal kwɔɔl, me lio lɛn empeel kɛn éli, Mali wa Magadala oyɛn ke mpiɛɛn. Ndɛ omwɛn kwɛn nkɔɔn yi ekii ɔ̃nywã a mpiɛɛn amaakeel. 2 Ndɛ otsuu ntiin oyebɔɔ Simɔ̃ Piɛɛl y'ɔ̃yio wukyɛ wu ekedzii Yeso. Ndɛ olieel bɔ bubu: «Ambaal Mfam onse mpiɛɛn, bee k'eyɛɛ mboo yi alɔ ndɛ wɛ.» 3 Piɛɛl y'ɔ̃yio wukyɛ ondɛ apal, bu ayɛn ke mpiɛɛn. 4 Bɔ ange-buaal ákeyi me ntiin. Kɛn ɔ̃yio wukyɛ ondɛ onduru Piɛɛl me ntiin, ndɛ bu atɔ ke mpiɛɛn ɛ̃kwel. 5 Ndɛ opfɔɔn, omwɛn ɛ̃mpa mi ekɔ mi éli bɔ oŋɔ̃. Kɛn a ndɛ k'asam onse mpiɛɛn wɛ. 6 Simɔ̃ Piɛɛl wu ákeluɛɛn a ndɛ otɔ, bu asam onse mpiɛɛn. Ndɛ omwɛn ɛ̃mpa mi ekɔ mi éli bɔ oŋɔ̃. 7 Ndɛ hɛ̃ omwɛn ekɔ ki ádzii m'ɔ̃tswɛ a Yeso. Ekɔ okyɛ k'éli bɔ oŋɔ̃ y'ɛ̃mpa mi ekɔ wɛ, kɛn ápfuru kyɛ me pyɛ, mboo nkyam. 8 Obobɔ, ɔ̃yio wukyɛ ondɛ, wu átɔ ke mpiɛɛn ɛ̃kwel, osam hɛ̃, ndɛ omwɛn bu akiool. 9 Ke ngwel wɛ, ayio ále kɛn akwaal otsɛn o m'ákel onse Ɔ̃nkaan a Nziã ndiri Yeso akieel asiool onse b'ákwi-ákwi wɛ✝. 10 Ke mbee oŋɔ̃, ayio ange-buaal akɔɔl ke mboo yi ékekal bɔ.

11 Ŋ'esa oŋɔ̃, Mali áli okwel-a-nzi tsotsoo a mpiɛɛn, bvool ákelel. Ŋ'ebelel ndɛ oŋɔ̃, ndɛ opfɔɔn me ndɔɔ yi aliɔɔn onse mpiɛɛn. 12 Ndɛ omwɛn ãnzwel mbuaal m'ekɔ bvi afuu-fuu. Mɔ̃ ãbvi nsɛn ke mboo yi éli nzuru a Yeso bɔ, mɛn ke mboo yi éli ɔ̃tswɛ, mɛn ke yi éli ɛ̃mpal. 13 Ãnzwel omɔ̃ ãfuul Mali ndiri: «Ngu, Ki ebelel yɛ emã?» Ndɛ obveel mɔ̃ ndiri: «Mɛ̃ ebelel, me ndɔɔ yɛn ambaal Mfam a mɛ̃, mɛ̃ ke ngyɛɛ mboo yi alɔ ndɛ wɛ.» 14 Ke mbee a ŋ'ebveel Mali obobɔ, ndɛ okaal nzuru bu amwɛn Yeso atɛɛn oŋɔ̃. Kɛn a ndɛ k'áyɛɛ ndiri ondɛ Yeso wɛ. 15 Yeso ofuul ndɛ bubu: «Ngu, ki ebelel yɛ emã? Yɛ nã abii?» Mali áketsam ndiri ondɛ ɔ̃sal a nguun, ndɛ bu abveel ndɛ ndiri: «Taal, okɛɛn yɛ mbuul wu mbaal ndɛ, yɛɛn mɛ̃ mboo yi elɔ yɛ ndɛ, kwɛn mɛ̃ ngyi ndɛ owal.» 16 Yeso bu ati ndɛ ndiri: «Mali!» Ndɛ okɔɔl, bu alieel ndɛ m'ɔ̃nywã wu Ebel ndiri: «Rabbouni!» Ŋ'ayɛɛn ndiri: «Ɔ̃tee!» 17 Yeso olieel ndɛ ndiri: «Bee mɛ̃ okwaal, ke ngwel wɛ, mɛ̃ kɛn ngyɛn ywel ola Taal wɛ. Kɛn a yi, yɛɛn andoo a mɛ̃ a dzii, ndiri mɛ̃ ngyɛn ywel ola wu oli Tal a mɛ̃, wu oli hɛ̃ Tal a byɛ, ola Nziã a mɛ̃, wu oli hɛ̃ Nziã a byɛ.» 18 Obobɔ, Mali wa Magadala oyewa nsia ol'ayio ndiri ndɛ omwɛn Mfam, bvool olieel bɔ ãndɔɔ m'elieel Mfam ndɛ.

19 M'ãnkunwal mã tsoo lili li eyenge olɔ, ayio ábvɔɔn onse nzɔ ngamɔ̃ bvool áwɔɔl edzoo e yɔ me ndɔɔ yɛn bɔ ákebal Ayuda. Yeso oyi, otɛɛn kal-a-kal a bɔ, bu alieel bɔ bubu: «Yɔɔl opi okal ye byɛ!» 20 Ke mbee a ŋ'eyɛɛn ndɛ bɔ obobɔ, ndɛ osuo bɔ mviɔɔl y'ebɛɛ e ndɛ. Ayio aluul m'esɛ ŋ'emwɛn bɔ Mfam. 21 Ndɛ bvool olieel bɔ bubu: «Yɔɔl opi okal ye byɛ! Emfa ki étam Taal ndyam mɛ̃, mɛ̃ ndyam hɛ̃ ntam byɛ!» 22 Ke mbee ãyɛɛn omɔ̃, Yeso ofel ɔ̃fiaal nkal a bɔ, bvool oliee bɔ bubu: «Eyɔɔ Ɔ̃fel wu Ɔ̃nsensal! 23 B'ekieel edzeel byɛ ãbi ã bɔ, abɔɔ odzeel. B'ekieel ebee byɛ ãbi ã bɔ odzeel, k'abɔɔ odzeel wɛ!»

24 Ŋ'esa oŋɔ̃, ngɔmɔ̃ onse ayio kuun ye buaal, wɛn nkuũ Toma, wu abeta hɛ̃ me Didime, k'áli ye bɔ me lio li éyi Yeso wɛ. 25 Ayio bakyɛ bu alieel ndɛ bubu: «Bee emwɛn Mfam.» Kɛn a ndɛ obveel bɔ ndiri: «Ŋɛn mɛ̃ ke mwɛn ekel bvi ãnsal me mviɔɔl ɛ̃ ndɛ wɛ, ŋɛn mɛ̃ hɛ̃ ke mpio ɔ̃liɛɛn nkal ekel obvɛ, bvool ke ndɔɔl kuɔɔl nkal ebɛɛ e ndɛ wɛ, mɛ̃ k'èkiool bam wɛ.»

26 Ke mbee ãtsoo mpuɔ̃, ayio a ndɛ ábvɔɔn bvool onse nzɔ, Toma hɛ̃ áli ye bɔ, bvool nzɔ éli m'owɔɔl. Kɛn a Yeso oyi, otɛɛn kal-a-kal a bɔ, bu alieel bɔ bubu: «Yɔɔl opi okal ye byɛ!» 27 Ke mbee oŋɔ̃, ndɛ olieel Toma bubu: «Pio ɔ̃liɛɛn a yɛ ŋã, bvool tal mviɔɔl ɛ̃ mɛ̃, siaal kuɔɔl e yɛ bvool ndɔɔl kyɛ nkal ebɛɛ e mɛ̃. Bee y'enkyam okal, kal y'okiool!» 28 Toma obveel ndɛ ndiri: «Mfam a mɛ̃, Nziã a mɛ̃!» 29 Yeso olieel ndɛ ndiri: «Yɛ ŋe kiool me ndɔɔ yɛn yɛ mwɛn mɛ̃? Esɛ ola baal bɛn k'amwɛn mɛ̃ wɛ, kɛn a bɔ akiool!»

30 Yeso bvool ási emvieel bibi ke nkwel a ayio a ndɛ, bvɛn k'ákel onse ɔ̃nkaan wu wɛ. 31 Kɛn bvi ákel bvi, ákel bvɛ kwɛn byɛ ekiool wɛn Yeso oli Mãsia, Muaan a Nziã. Ŋɛn byɛ ekiool ndɛ, byɛ ebɔɔ elaã me nkuũ a ndɛ.