1 Onse nkel a afalisaye, éli ye mfam a Ayuda ngɔmɔ̃ wɛn nkuũ Nikodem. 2 Ndɛ oyebɔɔ Yeso me tsia, bu alieel ndɛ bubu: «Rabbi, bee eyɛɛ kwɛn yɛ li ɔ̃tee wu ofi ola Nziã. Ke ngwel wɛ, mbuul k'akoo m'osa b'emvieel bvi ebesa yɛ ndyam wɛ, okɛɛn Nziã k'ali ye ndɛ wɛ.» 3 Yeso obveel ndɛ ndiri: «Taa-taa bam, mɛ̃ eyɛɛn yɛ wɛn, okɛɛn k'aburu mbuul bo nsa yuaal wɛ, ndɛ k'akoo k'amwɛn Okwɛn o Nziã wɛ.» 4 Nikodem ofuul Yeso bubu: «Emfa emã ki aburu mbuul bo nsa yuaal ŋ'emeeyal ndɛ? Ndɛ okoo m'osam bvool onse mwiĩ a ngoo, kwɛn aburu ndɛ?» 5 Yeso obveel ndɛ ndiri: «Taa-taa bam mɛ̃ eyɛɛn yɛ wɛn, mbuul k'akoo m'osam Okwɛn o Nziã wɛ, okɛɛn k'aburu ndɛ m'oburu b'ãdza y'Ɔ̃fel wɛ. 6 Wu eburu mbuul oli mbuul. Wu eburu Ɔ̃fel oli ɔ̃fel. 7 Bee okam me ndɔɔ yi ngyɛɛn mɛ̃ wɛn ebvaan aburu byɛ m'oburu bo ywel. 8 Mfel apob m'etswi ki edzii ndɛ. Yɛ ayoo ndɛ, kɛn a yɛ ke yɛɛ mboo yi efi ndɛ wɛ, ekal yi eyi ndɛ. Eli emfa kiki me mbuul wu aburu m'Ɔ̃fel.» 9 Nikodem bvool olieel ndɛ ndiri: «ndɔɔ yi m'emfa okyɛ bwɛn-a-bwɛn asa yɔ?» 10 Yeso obveel ndɛ ndiri: «Yɛ mpii ɔ̃tee k'Isalayel li, yɛ ke yɛɛ ãndɔɔ omɔ̃ wɛ? 11 Taa-taa bam, mɛ̃ eyɛɛn yɛ wɛn bee eyɛɛn me m'eyɛɛ bee, bee etsweel m'emwɛn bee. Kɛn a byɛ k'ekiool m'etsweel bee wɛ. 12 Mɛ̃ ngyɛɛn ye byɛ m'ãndɔɔ mã nsie, byɛ k'ekiool wɛ, ke byɛ ekiool bwɛn-a-bwɛn, okɛɛn mɛ̃ ngyɛɛn ye byɛ m'ãndɔɔ mã ywel? 13 Mbuul wu oyɛn ywel pyɛ, okɛɛn ke wu ofi ywel wɛ, eli Muaan a mbuul. 14 Emfa kyɛn Moyize ándɛɛl ntaal wa bvieel onse ɔ̃baan wa kɛɛ-kɛɛ, emfa kiki hɛ̃ ebvaan andɛɛl Muaan a mbuul✝, 15 kwɛn mbuul ndyam wueel wu okiool ndɛ, abɔɔ elaã li ɔ̃bu nkal ɔ̃bu. 16 Ke ngwel wɛ, Nziã odzii baal b'ɔ̃kiri ngamfɛn. Obɔ otsɛn bɛn, ndɛ owi ensuu e ndɛ e Muaan ngɔmɔ̃, kwɛn mbuul ndyam wueel wu akiool ndɛ, abee odziɔɔn, kɛn a ndɛ abɔɔ elaã li ɔ̃bu nkal ɔ̃bu. 17 Taa-taa bam, Nziã k'ayuɔɔl Muaan a ndɛ m'ɔ̃kiri m'owa o baal etumbu wɛ. Ndɛ oyuɔɔl ndɛ, kwɛn ɔ̃kiri abvuul me ndɛ. 18 Mbuul wu olɔ okiool onse ndɛ k'abɔɔ etumbu wɛ. Kɛn a wɛn k'akiool wɛ, ŋ'amaabɔɔ etumbu, ke ngwel wɛ ndɛ k'alɔ okiool onse ensuu e Muaan a Nziã ngɔmɔ̃. 19 Etumbu okyɛ eli bubu: Mwiĩ oyi onse ɔ̃kiri, baal adzii empeel ke mboo a mwiĩ, me ndɔɔ yɛn ɛ̃sal ɛ̃ bɔ ɛ̃li ɛ̃bi-ɛ̃bi. 20 Ke ngwel wɛ, mbuul ndyam wueel wu asa obi abyal mwiĩ. Ndɛ k'aya ke mwiĩ wɛ, kwɛn ɛ̃sal ɛ̃ ndɛ ɛ̃bee omɔɔn. 21 Kɛn a wu oli onse otaa-taa aya ke mwiĩ, me ndɔɔ yɛn baal amwɛn kwɛn ndɛ asa ɛ̃sal ɛ̃ ndɛ m'emfa ki edzii Nziã.»

22 Ke mbee oŋɔ̃, Yeso oyi nsie yi Yude y'ayio a ndɛ. Oŋɔ̃, ndɛ osi ãtsoo ye bɔ bvool ákewa baal opongo. 23 Dzaã hɛ̃ ákewa baal opongo k'Enon tsotsoo ye Salim, ke ngwel wɛ mboo oyɔ éli y'ãdza bibi. Baal ákeya oŋɔ̃ m'owal b'opongo. 24 Nzal-a-ŋɛn, ale kɛn alɔ Dzaã me bwal wɛ. 25 Ŋ'esa oŋɔ̃, ɛ̃tsuun ɛ̃bvi mpɛ̃-a-mpɛ̃ ayio a Dzaã y'Ɔ̃yuda ngɔmɔ̃ me ndɔɔ ɛ̃kiri mi osuɔɔl o nzuru. 26 Bɔ ayebɔɔ Dzaã, bu alieel ndɛ bubu: «Rabbi, mbuul wu áli ye yɛ ongwel a Dzolodɛ̃, wɛn yɛ, yɛ átsweel ndɛ, oyii awa baal opongo, bvool baal bueel abeya ola ndɛ.» 27 Dzaã obveel ndiri: «Mbuul abebɔɔ kɛn a ki awi ndɛ fa ywel. 28 Byɛ eyoo m'ãtswi ã byam k'eyɛɛn mɛ̃ wɛn: "Mɛ̃, mɛ̃ ke ndi Mãsia wɛ, kɛn ayuɔɔl mɛ̃ ke nkwel a ndɛ." 29 Wu oli y'ɔ̃kal wu abaal, eli ɔ̃baal. Kɛn a nga-ndoo a ɔ̃baal wu otɛɛn oŋɔ̃, bvool ayoo ndɛ, oli y'esɛ ki enɛn ŋ'eyoo ndɛ ɔ̃baal ayɛɛn. Okyɛ emfa kyɛn esɛ ki mɛ̃ ekoo nzuru. 30 Ebvaan ndɛ ayi nkwel, kwɛn mɛ̃ mvool mbee.»

31 «Mbuul wu ofi ywel onduru bueel. Wa nsie wa nsie, ãyɛɛn ã ndɛ mã nsie. Wu ofi ywel onduru bueel. 32 Ndɛ ayɛɛn me m'emwɛn ndɛ ye m'eyoo ndɛ, kɛn a mbuul k'akiool m'etsweel ndɛ wɛ. 33 Wu okiool m'etsweel ndɛ, ŋ'asuo kal-a-kal kwɛn Nziã oli wa taa-taa. 34 Ke ngwel wɛ, mbuul wu eyuɔɔl Nziã ayɛɛn ãyɛɛn ã Nziã, nzal-a-ŋɛn Nziã awa ndɛ Ɔ̃fel a ndɛ ndel pyɛ. 35 Tal odzii Muaan, bu awi eluɔ bvieel me mviɔɔl ɛ̃ ndɛ. 36 Mbuul wu olɔ okiool onse Muaan oli y'elaã li ɔ̃bu nkal ɔ̃bu, kɛn a wɛn k'alweel Muaan wɛ k'àkal y'elaã wɛ, mpuru a Nziã eli nkal a ndɛ.»