1 «Mɛ̃ ngyɛɛn byɛ obobɔ, kwɛn okiool o byɛ obee obva. 2 Bɔ akieel atswɛɛl byɛ onse ãnzɔ m'ãbuɛɛn. Bvool lio eyeya lɛn b'akieel abam byɛ atsam ndiri bɔ oŋɔ̃ ɔ̃sal a Nziã abesa. 3 Bɔ akieel asa obobɔ, me ndɔɔ yɛn bɔ k'ayɛɛ onkyam Taal wɛ, k'ayɛɛ hɛ̃ onkyam mɛ̃ wɛ. 4 Mɛ̃ ngyɛɛn byɛ obobɔ, kwɛn ŋ'ekieel ekoo lio olɔ, byɛ, byɛ eyeel kwɛn mɛ̃ élieel byɛ mɔ̃ tsɔɔn.»

«Mɛ̃ k'elieel byɛ yɔ fa obɛɛn wɛ, me ndɔɔ yɛn mɛ̃ eli ye byɛ. 5 Meba, mɛ̃ ŋ'eyi ola wu ayuɔɔl mɛ̃, kɛn a mbuul si ɔ̃mɔ̃ pyɛ onse byɛ wu afuul mɛ̃ ndiri: "Yɛ kwɛn ayi ?" 6 Kɛn onge bɛn mɛ̃ ngyɛɛn byɛ ãndɔɔ omɔ̃, ɛ̃kwal ɛ̃ byɛ ɛ̃luul m'ãwua. 7 Kɛn a mɛ̃, mɛ̃ eyɛɛn byɛ otaa-taa wɛn eli ye bvel me ndɔɔ a byɛ kwɛn mɛ̃ ndyam ngyi. Ke ngwel wɛ, okɛɛn mɛ̃ ke ngyɛn wɛ, Ntwel k'àya ola byɛ wɛ. Kɛn okɛɛn mɛ̃ ngyɛn, mɛ̃ èyuɔɔl byɛ ndɛ. 8 Ŋ'ekieel eya ndɛ, ndɛ àsuo baal b'ɔ̃kiri kal-a-kal ndɔɔ yi etal obi, ndɔɔ yi etal okal dzu, ye ndɔɔ yi etal otsiil b'ãndɔɔ. 9 Me b'otal obi, me ndɔɔ yɛn bɔ k'alɔ okiool onse mɛ̃ wɛ. 10 Me b'otal okal dzu, me ndɔɔ yɛn mɛ̃ eyi ola Taal, bvool me ndɔɔ yɛn byɛ bam k'ebemwɛn mɛ̃ wɛ. 11 Me b'otal otsiil b'ãndɔɔ, me ndɔɔ yɛn mfam a ɔ̃kiri wu, Nziã amaatsiil ndɔɔ a ndɛ.»

12 «Mɛ̃ kɛn ndi y'ãndɔɔ bibi m'eyɛɛn mɛ̃ byɛ, kɛn a byɛ kɛn k'ekoo k'ebiri mɔ̃ onge pfuũ meba wɛ. 13 Ŋ'ekieel eya Ɔ̃fel wu otaa-taa ndyam, ndɛ àbiri byɛ onse otaa-taa bueel, ke ngwel wɛ, ndɛ k'ayɛɛn me nkuũ a ndyam wɛ, kɛn a ndɛ ayɛɛn me mbueel m'ekieel eyoo ndɛ, bvool akieel ayɛɛn m'ãfa ola mɛ̃. 14 Ndɛ akieel alweel mɛ̃, me ndɔɔ yɛn ndɛ akieel awal ãndɔɔ m'ãli mã mɛ̃, bvool àyɛɛn byɛ mɔ̃. 15 Mbueel m'eli a Taal, ãli mã mɛ̃. Obɔ otsɛn bɛn mɛ̃ ngyɛɛn byɛ wɛn, ndɛ akieel awal m'ãli mã mɛ̃, bvool àyɛɛn byɛ mɔ̃.»

16 «Esiil lio etsi-tsiri lɛn byɛ k'ebemwɛn mɛ̃ wɛ, bvool ke mbee a muaan-lio, byɛ èmwɛn mɛ̃ bvool.» 17 Ayio a ndɛ ke kwɛ abvi oyɛɛn bam-a-bam ndiri: «Otsɛn o ndɔɔ oyɔ omã? Ndɛ olieel bia-byɛ ndiri: "Esiil lio etsi-tsiri lɛn byɛ k'ebemwɛn mɛ̃ wɛ, bvool ke mbee a muaan-lio, byɛ èmwɛn mɛ̃ bvool", bvool ndiri: "Mɛ̃ èyi ola Taal." 18 "Lio etsi-tsiri" li elieel ndɛ, ŋ'ayɛɛn ndiri nki? Bia-byɛ k'ekwaal otsɛn o b'eyɛɛn ndɛ wɛ.» 19 Onge bɛn Yeso áyɛɛ kwɛn bɔ ákebii k'afuul ndɛ ɔ̃mfuul, ndɛ olieel bɔ bubu: «Byɛ ebefuul byam-a-byam me ndɔɔ yi ndieel mɛ̃ wɛn: "Esiil lio etsi-tsiri lɛn byɛ k'ebemwɛn mɛ̃ wɛ, bvool ke mbee a muaan-lio, byɛ èmwɛn mɛ̃ bvool". 20 Taa-taa bam, mɛ̃ eyɛɛn byɛ wɛn, byɛ, byɛ èlel bvool èluɔɔl, kɛn ɔ̃kiri àsia mpaa. Byɛ, byɛ èkal y'ãwua, kɛn ãwua ã byɛ ã̀kɔɔl esɛ. 21 Ŋ'eyeburu ɔ̃kaal, ndɛ oli y'ãwua, me ndɔɔ yɛn lio li emwɛn ndɛ fool ŋ'ekoo. Kɛn a ŋ'eburu ndɛ muaan, ndɛ bvool k'abeyɛɛ fool e ndɛ wɛ, me ndɔɔ esɛ, ke ngwel wɛ aburu mbuul onse ɔ̃kiri. 22 Obobɔ, byɛ bam eli y'ãwua meba. Kɛn a mɛ̃ èmwɛn byɛ bvool. M'emfa okyɛ, ɔ̃kwal a byɛ àluul m'osia mpaa, mbuul si ɔ̃mɔ̃ hɛ̃ k'àkoo m'ombaal esɛ byɛ wɛ.

23 Me tsoo olɔ, byɛ k'èbefuul mɛ̃ ndɔɔ si ngamɔ̃ wɛ. Taa-taa bam, mɛ̃ eyɛɛn wɛn, ki èsɔɔ byɛ ola Taal, ndɛ àwa byɛ kyɛ me nkuũ a mɛ̃. 24 Tiil meba, byɛ kɛn esɔɔ eluɔ si ngemɔ̃ me nkuũ a mɛ̃ wɛ. Esɔɔ, byɛ èbɔɔ, kwɛn esɛ e byɛ ekal ɔ̃koo.»

25 «Mɛ̃ ngyɛɛn byɛ ãndɔɔ mbueel m'ãmboo. Lio èyal lɛn mɛ̃ bvool k'ebeyɛɛn ye byɛ m'ãmboo wɛ. Kɛn a mɛ̃ èyɛɛn byɛ ãndɔɔ m'ãtal Taal kal-a-kal. 26 Me tsoo olɔ, byɛ ekieel esɔɔ eluɔ ola Taal me nkuũ a mɛ̃. Mɛ̃ ke ngyɛɛn byɛ wɛn mɛ̃ wu ekieel esɔɔ eluɔ ola Taal me ndɔɔ a byɛ wɛ. 27 Ke ngwel wɛ, Taal ndyam oli ndoo a byɛ, me ndɔɔ yɛn byɛ bam èli andoo a mɛ̃, bvool byɛ ekiool bam ndiri mɛ̃, mɛ̃ mfi ola Nziã. 28 Mɛ̃ mfi ola Taal ngyi onse ɔ̃kiri. Meba ŋã, mɛ̃ ngya ambal ɔ̃kiri, bvool ngyii eyi ola Taal.» 29 Ayio a ndɛ ayɛɛn ndiri: «Meba ŋã, yɛ booyɛɛn kal-a-kal, k'ebeyɛɛn m'ãmboo wɛ! 30 Meba, bee ŋ'eyɛɛ wɛn yɛ yɛɛ mbueel, bvool wɛn yɛ k'eli ye kɔɔ lɛn mbuul afuul yɛ ɛ̃mfuul wɛ. Obɔ otsɛn bɛn bee ekiool wɛn yɛ fi ola Nziã.» 31 Yeso obveel bɔ ndiri: «Byɛ ŋ'ekiool meba? 32 Lio èyeya, lɔ emeeya, lɛn byɛ ètsɔɔn, mbuul bwɛn a mbuul ke mboo a ndɛ, bvool byɛ èsiil mɛ̃ myam. Kɛn a mɛ̃ ke ndi myam wɛ, ke ngwel wɛ Taal oli ye mɛ̃. 33 Mɛ̃ ngyɛɛn byɛ ãndɔɔ omɔ̃, kwɛn byɛ ekal y'opi onse mɛ̃. Onse ɔ̃kiri, byɛ emwɛn fool. Kɛn a byɛ, ekal y'ɔ̃dzɔɔ̃! Mɛ̃ ndyam mvel ɔ̃kiri.»