1 Andoo, me b’otal ãlio y’ɛ̃bvu m’èya ãndɔɔ omɔ̃, byɛ k’eli ye kɔɔ kwɛn akel byɛ wɛ. 2 Ke ngwel wɛ, byam eyɛɛ ngesɛ wɛn tsoo e Mfam ekieel eya enseel, onge b’eya mbuul a pfuul me tsia. 3 Ŋ’ekieel eyɛɛn baal ndiri: «Opi oli, kɔɔ-kɔɔ pyɛ», enseel oŋɔ̃ fool li kokɔ èyiool nkal a bɔ, onge mpal o buru yi eyoo ɔ̃kaal nga-yam. Bɔ kieel k’abvuul bam wɛ. 4 Kɛn a byɛ, andoo, byɛ k’eli onse empeel wɛ, kwɛn tsoo olɔ eya enseel onse byɛ onge b’eya mbuul a pfuul. 5 Ke ngwel wɛ, byɛ bueel eli baan b’okal-a-kal bvool baan ba mwiĩ. Bia-byɛ k’eli baal ba tsia wuo b’empeel wɛ. 6 Obobɔ, bia-byɛ ebee twal olaal onge b’elaal bakyɛ, kɛn ekal angɔ-mwiĩ bvool ebee ãndɔɔ y’enduul osa. 7 B’alaal twal, alaal lɔ me tsia, b’ebɔɔ mbal, mɔ̃ ãbɔɔ bɔ me tsia. 8 Kɛn a bia-byɛ b’eli ba mwiĩ, ebee ãndɔɔ osa y’enduul. Elaal okiool ye dzii onge b’elaal mbwel-mbwel eluɔ ki bvieel ki efoo otwel. Elaal kaã li obvuul onge b’elaal mbwel-mbwel ekɔrɔ ki bvieel. 9 Ke ngwel wɛ, Nziã k’áti bia-byɛ mbel kwɛn awa bia-byɛ etumbu wɛ, kɛn a ndɛ áti bia-byɛ mbel m’obɔɔ b’obvuul me Mfam a bia-byɛ Yeso Mãsia. 10 Ndɛ wu Mãsia okwi me ndɔɔ a bia-byɛ, kwɛn ekal ŋ’eli bia-byɛ mwiĩ, ekal ŋ’ekwi bia-byɛ, bia-byɛ ekal y’elaã mboo mɔ̃ ye ndɛ. 11 Obobɔ, ewa bakyɛ mpɛn, bvool esa kwɛn bakyɛ akwel onse okiool, onge b’ebesa byɛ tsɔɔn.

12 Andoo, bee esɔɔ ola byɛ wɛn ekal ye lweel me b’amwɛn fool m’ɔ̃sal onse byɛ, b’abebiri byɛ me nkuũ a Mfam, bvool abedzuru byɛ ãtswi. 13 Ewal bɔ ye bvɛɛ li nɛn bvool edzii bɔ me ndɔɔ ɔ̃sal a bɔ. Ekal y’opi onse byam-a-byam. 14 Andoo, bee ewi byɛ luo wɛn, ewa b’abedzuu epwa ãnkunkwa, ewa b’emeesool nzuru mpɛn, ewuaal a b’ali y’okwal, ekal y’osɛ-mwiĩ ye baal bueel. 15 Ekal y’onkyab kwɛn mbuul abee obi obveel m’obi, kɛn ebii k’esa obvɛ ãlio mbueel onse byam-a-byam, bvool me baal bueel. 16 Ekal y’esɛ ãlio mbueel! 17 Ebuɛɛn ãlio mbueel. 18 M’ãndɔɔ mbueel, ebveel Nziã ãtuɛɛn, ke ngwel wɛ okyɛ emfa ki edzii ndɛ me ndɔɔ a byɛ onse Yeso Mãsia. 19 Ebee ɔ̃sal wu Ɔ̃fel wu Ɔ̃nsensal okii. 20 Ebee ãyɛɛn m’eyɛɛn aliaal-ɛ̃kiɛɛn a Nziã ngwel owal, 21 ebwɛɛl ãndɔɔ mbueel, ekwɛɛ mã ngesɛ. 22 Obi bam okal ke bwɛn, ebee bɔ osa. 23 Yɔɔl Nziã nga-opi ndyam asuul ɔ̃tsiin a byɛ wueel akal wa ngel. Yɔɔl kwɛn ndɛ akwɛɛ ombuul o byɛ bueel, ɔ̃fel a byɛ, omwiĩ o byɛ ye nzuru a byɛ! M’emfa okyɛ, byɛ ekieel eywɛn elyal ŋ’ekieel eya Mfam a bia-byɛ Yeso Mãsia. 24 Wu oti byɛ mbel obvaan kwɛn alɔ ɔ̃kwal onse ndɛ: Ndɛ akieel asa ndɔɔ oyɔ. 25 Andoo, ebuɛɛn hɛ̃ me bee. 26 Ebuun andoo bueel m’obuun bo ngel. 27 Mɛ̃ nduɔɔn byɛ me nkuũ a Mfam, yɔɔl kwɛn atsiɔ ɔ̃nkaan wu ke nkwel andoo bueel! 28 Yɔɔl kwɛn nyiĩ a Mfam a bia-byɛ Yeso Mãsia ekal ye byɛ!