1 Onge bɛn bee ebesal ye Nziã, bee ewi byɛ luo wɛn ebee nyiĩ a Nziã ngwel owal. 2 Ke ngwel wɛ, ndɛ olieel bubu:
«Me lio li ngesɛ, mɛ̃ éyoo yɛ.
Me tsoo li obvuul, mɛ̃ éwueel a yɛ6.2 Edz 49.8.»
Meba eyii lio lam li ngesɛ. Meba eyii tsoo li obvuul olɔ.
3 Bee k’edzii k’ebal mbuul si ngɔmɔ̃ onse obi wɛ, kwɛn baal abee mpwee obɔɔ yi apfiɔɔl ɔ̃sal a bee. 4 Kɛn a m’ãndɔɔ mbueel, bee edzii k’esuo kwɛn bee eli asal a Nziã ba taa-taa. M’emfa okyɛ, y’osɛ-mwiĩ bueel, bee ekuru ɔ̃kwal onse ãmpal, onse okaan, onse fool, 5 onse ɔ̃dzii, onse etuul, onse atsuunga, onse ɛ̃sal ɛ̃ fool, onse ɛ̃nsiil, bvool onse ãbuɛɛn mã me nzal, 6 onse otsɛtsɛ, onse oyɛɛ, onse osɛ-mwiĩ, onse ongesɛ, onse odzuu m’emfa ki Ɔ̃fel wu Ɔ̃nsensal, onse dzii li taa-taa, 7 onse ãtee m’otaa-taa, onse waan e Nziã, onse ãta ã mvel bvool ye m’akiaal mvel, m’ãli osa b’ãndɔɔ mã dzu, 8 onse bvɛɛ bvool onse opfiɔɔl. Abeyɛɛn obvɛ me ndɔɔ a bee, abekwee bee hɛ̃. Onkyam ŋɛn bee ebeyɛɛn otaa-taa, abewal bee onge anga-mfya. 9 Onkyam ŋɛn bɔ ayɛɛ bee ngesɛ, bɔ abewal bee onge bɛn bɔ k’ayɛɛ wɛ. Bee eli bam mwiĩ, kɛn a bɔ abewal bee onge akwa-akwa. Bɔ awa bee etumbu, kɛn a bɔ k’abam bee wɛ. 10 Bɔ abewal bee onge anga-ãwua, kwɛn ŋɛn bee eli anga-esɛ ãlio mbueel. Bɔ abewal bee onge aywal, kwɛn ŋɛn bee b’ebesa kwɛn baal bibi akal y’opfel. Bɔ abewal bee onge akaan, kwɛn ŋɛn bee eli ye bvieel.
11 Afi-kolinte, bee eyɛɛn ye byɛ kal-a-kal, ɔ̃kwal a bee ali ndyam kal. 12 Bee k’ekuru byɛ ɛ̃kwal wɛ, kɛn a byɛ ekuru bee mi byɛ. 13 Mɛ̃ eyɛɛn ye byɛ onge b’eyɛɛn tal ye baan. Oŋɔ̃ byɛ hɛ̃, edzweel bee ɛ̃kwal ɛ̃ byɛ.
14 Ebee obvɔɔn ye baal bɛn k’akiool Nziã wɛ, byɛ k’ekoo m’okal mboo mɔ̃ wɛ. Ke ngwel wɛ, ki eli dzu ye kyɛn k’eli ki Nziã wɛ, ekoo m’okal bvoo? Oyɔɔl y’empeel ekoo m’okal mboo mɔ̃? 15 Ondoo omã mpɛɛ̃-a-ampɛɛ̃ Mãsia ye Satana? Bvoo omã mpɛ̃-a-mpɛ̃ ɔ̃kiool ye wɛn k’ɔ̃kiool wɛ? 16 Ondoo omã mpɛ̃-a-mpɛ̃ Nzɔ a Nziã y’etiɔ? Ngwanyã, bia-byɛ bam eli Nzɔ a Nziã, onge b’eyɛɛn Nziã ndiri:
«Mɛ̃ ekieel ekal bvool edzuu onse bɔ,
mɛ̃ ekieel ekal Nziã a bɔ, bɔ akieel akal yam e mɛ̃6.16 Lev 26.11-12; Edz 37.27.»
17 Obɔ otsɛn bɛn, onge b’elieel Mfam:
«Epal onse bɔ, bvool ekab nzuru ye bɔ.
Ebee onywɛn m’eluɔ e mbiin,
m’emfa okyɛ mɛ̃ ndyam ekieel eyɔɔ byɛ6.17 Edz 52.11; Ezk 20.34-41.»
18 Mfam Nga-Waan bvool olieel bubu:
«Mɛ̃ ekieel ekal Tal me ndɔɔ a byɛ,
byɛ ekieel ekal baan b’abɔɔl ye b’akaal me ndɔɔ a mɛ̃6.18 Lev 26.12.»
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)