1 Andoo a dzii, onge bɛn Nziã owi bia-byɛ ãlɔɔ omɔ̃, yɔɔl kwɛn bia-byɛ ekal tsɛtsɛ m'ãndɔɔ mbueel m'ãbiil nzuru y'ɔ̃fel. Esa mpɛn yi ekal ba ngel tiil ntɔ, onse obal o Nziã.

2 Edzweel bee ɛ̃kwal ɛ̃ byɛ. Bee k'esi mbuul obi wɛ, bee k'ebiil okiool o mbuul wɛ, bee k'etwel bvel e mbuul wɛ. 3 Mɛ̃ ke ngyɛɛn obobɔ me ndɔɔ yi ebam byɛ me mbyel wɛ, ke ngwel wɛ onge b'eyɛɛn mɛ̃ byɛ yɔ tsɔɔn, byɛ eli onse ɛ̃kwal ɛ̃ bee, bia-byɛ eli bvoo, ekal ŋ'eli mwiĩ, ekal ŋ'ekwi. 4 Mɛ̃ ebeta kaã li bibi me byɛ, mɛ̃ hɛ̃ ebebɛɛl ntwel me byɛ. Mɛ̃ nduul me mpɛn, nduul m'esɛ, onkyam ŋɛn mɛ̃ ndi onse ãmpal ã bee.

5 Ke ngwel wɛ, ŋ'etɔ bee ke nsie yi Maseduaan, bee k'ebɔɔ mpwee yi ewuun wɛ. Kɛn a bee emwɛn fool li emfa kieel: Ãmvel ngwel-a-ngwel, buɔ onse ɛ̃kwal. 6 Kɛn a Nziã wu abewa b'emeefa ɛ̃wuun mpɛn, owi bee mpɛn ŋ'etɔ Tite. 7 Ki ewi bee mpɛn, k'eli kɛn oya o Tite wɛ, eli hɛ̃ owa b'ewi byɛ ndɛ mpɛn. Ngwanyã, ndɛ olieel bee efua e byɛ ki bibi ki emwɛn mɛ̃ bvool, elel e byɛ, y'ebal e byɛ me ndɔɔ yi etsweel mɛ̃. M'emfa okyɛ, esɛ e mɛ̃ ekoo nzuru.

8 Onkyam ŋɛn mɛ̃ nsi kwɛn byɛ ekal y'ãwua m'ɔ̃nkaan wu nswɛn mɛ̃ byɛ, mɛ̃ k'etsam ndɔɔ oyɔ wɛ. Okɛɛn mɛ̃ etsam yɔ tsɔɔn, me ndɔɔ yɛn mɛ̃ emwɛn kwɛn ɔ̃nkaan ondɛ asi kwɛn byɛ ekal y'ãwua me lio etsi-tsiri, 9 kɛn a meba mɛ̃ ndi y'esɛ, ke me ndɔɔ yɛn mɛ̃ esi kwɛn byɛ ekal y'ãwua wɛ, me ndɔɔ yɛn ãwua ã byɛ ãbiri byɛ k'okaal b'ɛ̃kwal. Ke ngwel wɛ, byɛ eyoo ãwua m'emfa ki edzii Nziã. M'emfa okyɛ, bee k'esi mbuul si ngɔmɔ̃ obi wɛ. 10 Ngwanyã, ãwua mã m'emfa ki edzii Nziã ãbiri mbuul k'okaal b'ɔ̃kwal, okaal b'ɔ̃kwal obiri ndɛ k'obvuul. Obobɔ, ndɔɔ yi atsam k'ebekal wɛ. Kɛn ãwua m'ãya m'efua bvi ɔ̃kiri ãbiri k'epfu. 11 M'esa ãwua mama mã m'emfa ki edzii Nziã onse byɛ, mɔ̃ bu: Osa b'ãndɔɔ y'ãŋã, osɔɔ b'odzeel, obee b'ãndɔɔ m'ãbi, okal ye buɔ m'osa b'obi, odzii o k'amwɛn mɛ̃ bvool, okal y'ebal me ndɔɔ yi atsweel mɛ̃, owa b'etumbu me wu osi obi! Taa-taa, m'emfa okyɛ, byɛ ŋ'esuo kwɛn byɛ eli anki-nkyam onse ndɔɔ oyɔ.

12 Okɛɛn mɛ̃ nkel byɛ ɔ̃nkaan, ke me ndɔɔ a wu osi wumɔ̃ obi wɛ, ke me ndɔɔ a wu asi obi hɛ̃ wɛ. Mɛ̃ nkel byɛ ɔ̃nkaan, me ndɔɔ yi esuo ke mviil ã byam, ke nkwel a Nziã, wɛn byɛ bam eli y'ãŋã me ndɔɔ a bee. 13 Obɔ otsɛn bɛn bee ebɔɔ mpɛn.

Bee k'ebɔɔ kɛn a mpɛn wɛ, bee bvool esɛ ekoo nzuru ŋ'emwɛn bee emfa ki éli Tite onse esɛ, me ndɔɔ yɛn byɛ bueel ebvieel ndɛ ɔ̃kwal efyɛ. 14 Ke nkwel a ndɛ, mɛ̃ mbɛɛl ntwel me ndɔɔ a byɛ, byɛ k'ewi mɛ̃ opfuru wɛ. Bee élieel byɛ otaa-taa ãlio mbueel. Ŋe ngyɛɛn mɛ̃ wɛn bee ékebɛɛl ntwel me ndɔɔ a byɛ ke nkwel a Tite, eli hɛ̃ taa-taa. 15 M'emfa okyɛ, dzii e ndɛ me ndɔɔ a byɛ eyii lam li nɛn, ŋ'eyeel ndɛ emfa ki élweel byɛ bueel ndɛ, y'emfa ki éyɔɔ byɛ ndɛ y'okuaal o nzuru bueel, ye bvɛɛ lueel. 16 Mɛ̃ ndi y'osia mpaa b'eta kaã me byɛ m'ãndɔɔ mbueel.