1 M'emfa okyɛ, onge bɛn Nziã me nyiĩ a ndɛ, owi bee ɔ̃sal ondɛ, bee hɛ̃ k'eywɛn ãŋã. 2 M'emfa okyɛ, bee eyɔɔl ãndɔɔ m'opfuru m'abesa m'edziɔɔn, eyɔɔl pfuru, ebee Endɔɔ e Nziã oswɛɛl. Kɛn a bee etee m'otaa-taa, kwɛn ewa mbuul wueel mpwee yi amwɛn kwɛn bee ebesal me nkuũ a Nziã. 3 Kɛn okɛɛn Nsia yi Ngesɛ yi ebetsal bee k'eli kal-a-kal wɛ, yɔ k'eli kal-a-kal wɛ me baal b'ayi k'odziɔɔn. 4 Baal obɔ aywɛn okiool, me ndɔɔ yɛn Satan wu nziã wu ɔ̃kiri wu amaalɔ empeel onse ãyal ã bɔ. Ndɛ abekii bɔ k'amwɛn oyɔɔl b'ofa me nkuul a Nsia yi Ngesɛ yi lweel e Mãsia, ndɛ ndyam wu oli emfa e Nziã. 5 Nsia yi ebetsal bee k'etal bee-myam wɛ, Nsia yi ebetsal bee yɛn ndiri Yeso Mãsia oli Mfam, bvool ndiri bee eli asal a byɛ me ndɔɔ a ndɛ. 6 Ke ngwel wɛ, Nziã tsɔɔn áyɛɛn ndiri: «Yɔɔl kwɛn oyɔɔl ongal onse empeel!✝». Ndɛ hɛ̃ osi kwɛn oyɔɔl ongal hɛ̃ onse ɛ̃kwal ɛ̃ bee, me ndɔɔ yi asa kwɛn oyɛɛ o lweel e Nziã ongal nkal osu o Mãsia.

7 Kɛn a bee bɛn opfel obɔ oli onse bee, eli onge asaan b'ábuo m'ɔ̃bwɛɛ. M'emfa okyɛ, baal amwɛn kwɛn waan li ɛ̃kam olɔ efi ola Nziã, k'efi ola bee wɛ. 8 Bee ebemwɛn fool li emfa bwɛn emfa, kɛn omwwĩ o bee k'obesɛn oŋɔ̃ wɛ. Bee ebeyoo ãwua bibi, kɛn a bee k'ebewɔɔl wɛ. 9 Abetuaal bee mpal bibi, kɛn a Nziã k'abeyiri bee wɛ. Abebal bee, kɛn a k'abebweel bee wɛ. 10 Lio bwɛn a lio, abebii bee obam onge b'ábam Yeso, ãmboo mbueel, kwɛn omwiĩ o ndɛ omɔɔn hɛ̃ onse nzuru a bee. 11 Ngwanyã, onkyam ŋɛn bee eli mwiĩ, lio bwɛn a lio, ebemwɛɛn y'etsam bvi epfu me ndɔɔ a Yeso, kwɛn omwiĩ o ndɛ omɔɔn hɛ̃ onse nzuru a bee yi ekieel ekwa. 12 M'emfa okyɛ, epfu ebesal onse bee, kwɛn omwiĩ osal onse byɛ.

13 Ɔ̃nkaan a Nziã ayɛɛn ndiri: «Mɛ̃ nkiool, obɔ otsɛn bɛn mɛ̃ ngyɛɛn.✝» Onge bɛn bia-byɛ hɛ̃ eli y'okiool baba, bee ekiool, obɔ otsɛn bɛn bee eyɛɛn. 14 Ke ngwel wɛ, bee eyɛɛ bam ngesɛ wɛn, ndɛ wu áseel Mfam Yeso onse b'ákwi-ákwi akieel aseel bee hɛ̃ mboo mɔ̃ ye Yeso, bvool akieel asa kwɛn bee emɔɔn ye byɛ ke nkwel a Yeso. 15 Ãmpal omɔ̃ mbueel m'ebemwɛn ãli me ndɔɔ obvɛ o byɛ, kwɛn nyiĩ a Nziã ekal yam ngamfɛn, kwɛn baal bibi abveel Nziã ãtuɛɛn bibi me ndɔɔ a lweel e ndɛ.

16 Obɔ otsɛn bɛn, bee ãŋã k'ãfa wɛ. Onkyam ŋɛn nzuru a bee ebebii etsii-etsii, ɔ̃fel a bee abekɔɔl ɔ̃nyiɔɔn tsoo bwɛn a tsoo. 17 Ke ngwel wɛ, ãmpal m'ebemwɛn bee meba k'ãli y'otsɛn wɛ bvool k'ãyiil wɛ, kɛn a mɔ̃ ãyɛɛl bee lweel li ɛ̃kam. Lweel olɔ eyiil ɔ̃bu bvool enduru bam ãmpal ã bee. 18 Ki ebebii bee, ke ki abemwɛn wɛ, ki ebebii bee kyɛn k'abewɛn wɛ. Ke ngwel wɛ, ki abemwɛn, eli ki lio etsi-tsiri, kɛn a kyɛn k'abemwɛn wɛ, eli ki ɔ̃bu.